বৃহস্পতিবাৰে অৰ্থাৎ যোৱা ১২ ডিচেম্বৰৰ দিনা সন্ধিয়া সেনা-আৰক্ষীৰ গুলীত নিহত হোৱা ছাম ষ্টেফ’ৰ্ডৰ ঘৰত উপস্থিত হয় সদৌ অসম ছাত্ৰ সন্থাৰ কেন্দ্ৰীয় নেতৃত্ব।
সংগঠনটোৰ উপদেষ্টা সমুজ্জ্বল কুমাৰ ভট্টাচাৰ্য্য, সভাপতি দীপাংক নাথ আৰু সাধাৰণ সম্পাদক লুৰিণজ্যোতি গগৈ আজি দুপৰীয়া প্ৰায় ১২ বজাত হাতীগাওঁস্থিত চহিদজনৰ ঘৰত উপস্থিত হয় আৰু তেওঁৰ পিতৃ-মাতৃ আৰু পৰিয়ালটোক সমবেদনা জ্ঞাপন কৰে।
আছুৰ নেতৃত্বই তাতে চহিদজনৰ প্ৰতিকৃতিত পুষ্পাঞ্জলি অৰ্পণ কৰে।
চহিদ ছাম ষ্টেফ’ৰ্ড ১২ ডিচেম্বৰত বন্ধু আৰু সম্পৰ্কীয় ভায়েকৰ লগত লতাশিল খেলপথাৰত সদৌ অসম ছাত্ৰ সন্থা আৰু শিল্পীসমাজৰ উদ্যোগত “কেব”ৰ বিৰুদ্ধে হোৱা আন্দোলনত অংশগ্ৰহণ কৰিবলৈ গৈ ঘূৰি আহোঁতে আৰক্ষীৰ গুলীত নিহত হয়।
আছুৰ প্ৰতিবাদস্থলীৰ পৰা ঘৰলৈ ঘূৰি অহাৰ সময়তে পাঁচ শতাধিক লোকে সান্ধ্য আইন নামানি হাতীগাওঁ অঞ্চলত উত্তাল প্ৰতিবাদ সাব্যস্ত কৰিছিল আৰু কিছু সংখ্যকে হিংসাত্মক কাৰ্য্যসূচীৰ আশ্ৰয় লৈছিল। পৰিস্থিতি নিয়ন্ত্ৰণৰ নামত আৰক্ষীয়ে গুলীচালনা কৰাত হাতীগাঁৱৰ শংকৰ পথত ৰাজপথতে ঢলি পৰে ছাম।
উল্লেখযোগ্য যে মৃত্যুৰ সময়ত ছামৰ বয়স আছিল ১৭ বছৰ আৰু তেওঁ দশম শ্ৰেণীত অধ্যয়নৰত আছিল। ছামে জনপ্ৰিয় কন্ঠশিল্পী মানস ৰবিনৰ লগত ড্ৰাম বজাইছিল। ছামৰ পৰিয়ালে তেওঁ বজোৱা ড্ৰামছেটটোৰ ওপৰত ছামৰ প্ৰতিচ্ছবি আঁৰি থোৱা দেখা যায়, যিটো দৃশ্য অতিকৈ হৃদয়স্পৰ্শী।
চহিদ ছাত্ৰজনৰ গৃহতে আজি মুখ্য মন্ত্ৰী সৰ্বানন্দ সোণোৱালক কটাক্ষ কৰি সমুজ্জ্বল কুমাৰ ভট্টাচাৰ্য্যই কয়, “সৰ্বানন্দ সোণোৱালৰ নেতৃত্বত চৰকাৰ হ’ল আৰু আমাৰ এজন ছাত্ৰক নিৰ্বিচাৰে গুলীয়াই হত্যা কৰা হ’ল। এই কথা আমি কেতিয়াও সহ্য কৰিব নোৱাৰো। চাৰিগৰাকীকৈ চহিদ হোৱাৰ পাছতো আজিলৈকে মুখ্য মন্ত্ৰী নিমাত হৈ আছে। তেওঁৰ দিনত জাতি-মাটি-ভেটি ৰক্ষা নহয়, এই কথা প্ৰমাণ হৈ গ’ল।”
তদুপৰি, ছাত্ৰজনক নিৰ্বিচাৰে গুলীয়াই হত্যা কৰা আৰক্ষী বিষয়াৰ দৃষ্টান্তমূলক শাস্তিৰ দাবী জনায় ভট্টাচাৰ্য্যই।
তেওঁ কয়, “গুলীয়াই এই আন্দোলন স্তব্ধ কৰিব নোৱাৰে। পৰিয়ালৰ লগতে আমাৰো অপূৰণীয় ক্ষতি হ’ল। আমাৰ মাজৰ পৰা এজন ছাত্ৰ নোহোৱা হ’ল। চৰকাৰে গুলী বন্ধ কৰক, অত্যাচাৰ, দমন বন্ধ কৰক। মুখ্য মন্ত্ৰী আৰু মন্ত্ৰীসভাৰ মন্ত্ৰীসকল যিসকলে গুলীয়াই হত্যা কৰিছে কাকো আমি নিস্তাৰ নিদিওঁ, মনত ৰাখিব”।
আনহাতে, ভট্টাচাৰ্য্যৰ সৈতে চহিদ পৰিয়ালৰ কাষত উপস্থিত হোৱা আছুৰ সভাপতি দীপাংক নাথে অসম চৰকাৰক স্থিতি স্পষ্ট কৰিবলৈ আহ্বান জনায়।
“প্ৰতিবাদী ছাত্ৰৰ ওপৰত কোন ইমান উন্মাদ হৈ পৰিল সেই সন্দৰ্ভত অসম চৰকাৰে স্থিতি স্পষ্ট কৰিব লাগে। সংগ্ৰামী জনতাৰ ওপৰত নিৰ্বিচাৰে গুলীবৰ্ষণ কৰা ব্যক্তিক চিনাক্ত কৰি উচিত শাস্তি দিব লাগে বুলি চৰকাৰৰ ওচৰত দাবী জনালো”, নাথে কয়।
