বিজেপি সাংসদ তপন কুমাৰ গগৈক শিৱসাগৰত আজি সদৌ অসম ছাত্ৰ সন্থাৰ কৰ্মীসকলে ক’লা পতাকা দেখুৱাই নাগৰিকত্ব (সংশোধনী) আইনৰ বিৰুদ্ধে প্ৰতিবাদ সাব্যস্ত কৰে।
আজি বিয়লী সাংসদগৰাকী শিৱসাগৰৰ আৱৰ্ত ভৱনত উপস্থিত হোৱাৰ উমান পাই একাংশ আছু কৰ্মীয়ে আৱৰ্ত ভৱনৰ সন্মুখত উপস্থিত হৈ ক’লা পতাকা প্ৰদৰ্শন কৰাৰ লগতে আৱৰ্ত ভৱন ঘেৰাও কৰে।
প্ৰতিবাদকাৰী সকলে আৱৰ্ত ভৱন ঘেৰাও কৰা বাবে দীৰ্ঘসময় ধৰি আৱৰ্ত ভৱনতে আৱদ্ধ হৈ থাকিবলগীয়া হয় বিজেপিৰ নৱ নিৰ্বাচিত সাংসদ গৰাকী।
আছু কৰ্মীসকলে বিজেপি চৰকাৰ আৰু তপন কুমাৰ গগৈক উদ্দেশি বিভিন্ন শ্লোগান দিয়াৰ লগতে আছুত থকা সময়ত বিদেশীৰ বিৰুদ্ধে গগৈয়ে লোৱা স্থিতিৰ বিষয়ে সোঁৱৰাই দিয়ে।
আনহাতে, দীৰ্ঘ সময় ধৰি আৱৰ্ত ভৱনৰ সন্মুখত অৱস্থান কৰি থকা আছু কৰ্মী সকলক শিৱসাগৰ জিলা দণ্ডাধীশ গৰাকীয়ে জিলাখনত বলৱৎ হৈ থকা ১৪৪ ধাৰা ভংগ নকৰিবলৈ অনুৰোধ জনাই প্ৰতিবাদী কাৰ্যসূচী উঠাই লবলৈ আহ্বান জনায়। কিন্তু প্ৰতিবাদকাৰী সকলে তপন গগৈ ওলাই নহা পৰ্যন্ত প্ৰতিবাদ স্থলী এৰি নাযায় বুলি স্পষ্ট কৰি দিয়াত আৰক্ষীয়ে বলপূৰ্বকভাৱে প্ৰতিবাদকাৰী সকলক আটক কৰি শিৱসাগৰ সদৰ থানালৈ লৈ যায়।
আছুৰ শিক্ষা সম্পাদক শৰৎ হাজৰিকাই কয়, ‘‘তপন কুমাৰ গগৈয়ে সদৌ অসম ছাত্ৰ সন্থাৰ সাধাৰণ সম্পাদক হৈ থাকোতে জাতিধ্বংসী কেবৰ বিৰুদ্ধে আন্দোলন কাৰ্যসূচীৰ নেতৃত্ব লৈছিল আৰু আমাক এই জাতিধ্বংশী আইনখনৰ বিৰুদ্ধে প্ৰবল প্ৰতিবাদ কৰিবলৈ উৎসাহিত কৰিছিল। পৰৱৰ্তী সময়ত তেওঁ সাংসদ হল যদিও অসমৰ কোনো এটা সমস্যাত মাত মতা দেখা পোৱা নগল।’’
আছুৰ নেতৃত্বত থকা অৱস্থাত তপন গগৈয়ে যি নাগৰিকত্ব সংশোধনী বিধেয়কৰ বিৰোধিতা কৰি ছাত্ৰ আন্দোলনক নেতৃত্ব দিছিল আজি তেওঁ সেই আইনখনৰে ৰক্ষকৰ ভুমিকাত অৱতীৰ্ণ হৈছে বুলি উল্লেখ কৰি হাজৰিকাই সাংসদ গৰাকীক নিজৰ দায়বদ্ধতাৰ কথা সোঁৱৰাই দিয়াৰ বাবে ক’লা পতাকা প্ৰদৰ্শন কৰে বুলি মন্তব্য কৰে।