ৰাজ্যত চলি থকা ক’ৰ’নাৰ সংক্ৰমণৰ সুযোগ গ্ৰহণ কৰি ৰাজ্য চৰকাৰৰ পৃষ্ঠপোষকতাত এন এইচ পি চিয়ে গোগামুখৰ নামনি সোৱণশিৰি জলবিদ্যুৎ প্ৰকল্পলৈ বিভিন্ন সামগ্ৰীৰ পৰিবহন অব্যাহত ৰাখিছে।
আজি গহপুৰ ছাত্ৰ সন্থাই সদৌ অসম ছাত্ৰ সন্থাৰ কেন্দ্ৰীয় সাংগঠনিক সম্পাদক প্ৰজ্ঞান ভূঞাৰ নেতৃত্বত গহপুৰত জলবিদ্যুৎ প্ৰকল্পলৈ সামগ্ৰী কঢ়িওৱা বাহন আৱদ্ধ কৰি তীব্ৰ প্ৰতিবাদ সাব্যস্ত কৰে।
গহপুৰ ছাত্ৰ সন্থাৰ প্ৰতিবাদকাৰী সদস্য সকলে বৃহৎ নদী বান্ধ নিৰ্মাণ বন্ধ কৰক, অসম চৰকাৰ হায় হায়, এন এইচ পি চি মুৰ্দাবাদ ধ্বনিৰে তীব্ৰ প্ৰতিবাদ সাব্যস্ত কৰে।
ঘটনাস্থলী আৰক্ষীৰ বাহিনী উপস্থিত হৈ প্ৰজ্ঞান ভূঞাকে ধৰি গহপুৰ আঞ্চলিক ছান্ত্ৰ সন্থাৰ সভাপতি দিব্যজ্যোতি ভূঞা, সম্পাদক প্ৰণৱ বৰা, জিলা সাংস্কৃতিক সম্পাদক প্ৰাঞ্জল হাজৰিকা, ছয়দুৱাৰ আছুৰ উপদেষ্টা আৰোপ জ্যোতি ভুঞা আৰু ভালেকেইগৰাকী ছাত্ৰ সদস্যক গ্ৰেপ্তাৰ কৰে যদিও পৰৱৰ্তী সময়ত মুকলি কৰি দিয়ে।
ছাত্ৰ কৰ্মীসকলে বহু সময় ধৰি আৱদ্ধ কৰি ৰখা সামগ্ৰী কঢ়িওৱা বাহন কেইখন প্ৰতিবাদকাৰী সকলৰ প্ৰতিবাদৰ ওচৰত সেও মানি উভতি যাবলৈ বাধ্য হয়।
আনহাতে, ক’ৰ’নাৰ সংক্ৰমণৰ সুযোগ গ্ৰহণ কৰি অসম চৰকাৰ আৰু এন এইচ পি চিয়ে গোপনে আৰু পৰিকল্পিতভাৱে নামনি সোৱণশিৰি প্ৰকল্পৰ কাম আগবঢ়াই নিয়া কাৰ্য্যক গৰিহণা দিয়ে সদৌ অসম ছাত্ৰ সন্থাৰ কেন্দ্ৰীয় সদস্য গোপাল দাসে।
গোগামুখত এসপ্তাহ ধৰি সম্পূৰ্ণ ল’কডাউন চলি থকাৰ সময়তো চৰকাৰে নদী বান্ধ প্ৰকল্পৰ সামগ্ৰীৰ যোগান অব্যাহত ৰখা কাৰ্য্য জনস্বাৰ্থ বিৰোধী বুলি গোপাল দাসে কোৱাৰ লগতে বানপানীত ককবকাই থকা অঞ্চলটোৰ ৰাইজৰ খবৰ লবলৈ আহৰি নোহোৱা চৰকাৰে নদী বান্ধ নিৰ্মাণৰ কাম চলায় থকা কাৰ্য্যই এইখন চৰকাৰৰ স্বৰূপ উদঙাই দিছে বুলি কয়।
গোগামুখৰ নিৰ্মাণ কাৰ্য্য বন্ধ নকৰিলে চৰকাৰ আৰু এন এইচ পি চিয়ে আৰু অধিক প্ৰতিবাদৰ সন্মুখিন হ’বলগীয়া হ’ব বুলিও তেওঁ লগতে কয়।