নৰ্থ-ইষ্ট নাওৰ বাতৰিৰ প্ৰভাৱ; কালুগাঁও জাপিসজীয়া গাঁৱৰ ভৱেন গগৈলৈ আটাছুৰ সহায়ৰ হাত
বৃহস্পতিবাবে সংবাদ মাধ্যমত শিৱসাগৰৰ কালুগাঁও জাপিসজিয়া গাঁৱৰ এজন যুৱকৰ এক কৰুণ কাহিনী প্ৰকাশ পাইছিল। দুয়োখন ভৰি অকামিলা হোৱা ভবেন গগৈ নামৰ যুৱকজনে চুচৰি-চুচৰি সকলো কাম কৰাৰ লগতে বাঁহৰ সামগ্ৰী নিৰ্মাণ কৰি সেই সামগ্ৰী বিক্ৰী কৰি জীৱন নিৰ্বাহ কৰাৰ খবৰ প্ৰকাশ পোৱাৰ পাছতে সৰ্বত্ৰে তীব্ৰ প্ৰতিক্ৰিয়াৰ সৃষ্টি হৈছিল।
২০১৬ চনত ৰাজমিস্ত্ৰীৰ লগত সহযোগী হিচাপে কাম কৰি থকা অৱস্থাত চাদৰ পৰা পৰি কঁকালত গুৰুতৰভাৱে আঘাত পোৱা ভবেন গগৈয়ে উন্নত চিকিৎসা কৰিব নোৱৰাৰ বাবে ঘৰতে শুই বহি থাকিব লগীয়া হয় ফলত তেওঁৰ দুয়োখন ভৰি অকামিলা হৈ পৰে।
পৰিয়ালক পোহ-পাল দিব নোৱাৰাৰ বাবে পত্নী কন্যাইও এবছৰৰ পূৰ্বে এৰি গৈছিল ভবেনক।
ভবেন গগৈৰ এই কৰুণ কাহিনী নৰ্থ-ইষ্ট নাওত প্ৰচাৰ হোৱাত তেওঁক সহায় কৰিবলৈ আগবাঢ়ি আহিছে আটাছুৰ শিৱসাগৰ মহকুমা সমিতি, শিৱসাগৰ জিলা সমিতি, আমগুৰি সমিতি আৰু বৰুৱাপুখুৰী আঞ্চলিক সমিতি।
আটাছুৱে ভবেন গগৈক দুমাহৰ খাদ্য সামগ্ৰীৰ লগতে অত্যাৱশ্যকীয় সামগ্ৰী প্ৰদান কৰে।
আটাছুৰ শিৱসাগৰ মহকুমাৰ কাৰ্যকৰী সদস্য অগ্ৰীম বুঢ়াগোহাঁয়ে কয়, আজি আমি আটাছুৰ ফালৰ পৰা ভবেন গগৈক দুমাহৰ বাবে খাদ্য সামগ্ৰী প্ৰদান কৰিলো। অনাগত দিনত ভবেন গগৈক সকলো প্ৰকাৰে সহায় কৰাৰ লগতে ভবেন গগৈৰ যদি চিকিৎসাৰ প্ৰয়োজন হয় তেন্তে তেওঁৰ চিকিৎসাৰ সম্পূৰ্ণ দায়িত্ব আটাছুৱে গ্ৰহণ কৰিব।
আনহাতে, শাৰিৰীকভাৱে সক্ষম তথা দৰিদ্ৰ লোকৰ বাবে চৰকাৰে যি সুবিধা প্ৰদান কৰে সেই সুবিধা ভবেন গগৈক প্ৰদান কৰিবলৈ আমগুৰি সমষ্টিৰ বিধায়ক প্ৰদীপ হাজৰিকাক আহ্বান জনাই আটাছুৰ বৰুৱা পুখুৰী আঞ্চলিক সমিতিৰ সভাপতি বিশ্বজিৎ আৰন্ধৰাই।