অসম জাতীয় বিদ্যালয়ৰ আৰ্হিত ১৯৯৬ চনত পুৰণিগুদামত স্থাপিত পুৰণিগুদাম বিদ্যানিকেতনে বিগত বৰ্ষৰ দৰে এইবাৰো এশ শতাংশৰ উত্তীৰ্ণৰ সফলতাৰ ধাৰা অব্যাহত ৰাখিবলৈ সক্ষম হোৱাৰ উপৰিও দুগৰাকী ছাত্ৰই অসমৰ ভিতৰত সপ্তম আৰু দশম স্থান লাভ কৰিবলৈ সক্ষম হৈছে।
উল্লেখযোগ্য যে বিদ্যালয়খনৰ পৰা মুঠ ৭০ গৰাকী ছাত্ৰ-ছাত্ৰীয়ে এইবাৰ হাইস্কুল শিক্ষান্ত পৰীক্ষাত অৱতীৰ্ণ হৈছিল। ইয়াৰে অংকুৰ ৰাজ কাশ্যপে সপ্তম স্থান আৰু মিন্টু গায়নে দশম স্থান লাভ কৰাৰ লগতে ১৯ গৰাকী ছাত্ৰ-ছাত্ৰীয়ে ডিষ্টিংচন, ১১ গৰাকী ছাত্ৰ-ছাত্ৰীয়ে ষ্টাৰ মাৰ্ক, ২৫ গৰাকীয়ে প্ৰথম বিভাগ, ১১ গৰাকীয়ে দ্বিতীয় বিভাগ আৰু দুগৰাকী ছাত্ৰই তৃতীয় বিভাগ লাভ কৰে।
কালি অৰ্থাৎ ১৯ মে’ত উত্তীৰ্ণ সকলো ছাত্ৰ-ছাত্ৰীকে বিদ্যালয়ৰ আজীৱন সদস্য কৰাৰ বাবে এখন অভিজ্ঞান সমাৰোহ অনুষ্ঠিত কৰে। বিদ্যালয় পৰিচালনা সমিতিৰ সভাপতি পোনানন্দ ভূঞাৰ সভাপতিত্বত অনুষ্ঠিত হোৱা অভিজ্ঞান সমাৰোহত সকলো ছাত্ৰ-ছাত্ৰীকে একোখনকৈ মান পত্ৰ প্ৰাদন কৰে। এই সভাতে স্থানপ্ৰাপ্ত দুগৰাকী ছাত্ৰ অংকুৰ ৰাজ কাশ্যপ আৰু মিন্টূ গায়নক চামগুৰি বিদ্যুৎ উপ সংমণ্ডলৰ তৰফৰ পৰা ভৱজ্যোতি বৰাৰ নেতৃত্বত অহা এটা দলে বিশেষভাৱে সম্বৰ্ধনা জনায়।
সভাত কবি জীৱন নৰহ, শিক্ষাবিদ কমল শইকীয়া, ভবানন্দ বৰা, সাংবাদিক মুনীন্দ্ৰ শইকীয়া, তপন কুমাৰ বৰা, সাহিত্যিক ৰুমী লস্কৰ বৰা, সমাজকৰ্মী প্ৰফুল্ল শইকীয়াৰ লগতে বহু কেইগৰাকী বিশিষ্ট ব্যক্তি উপস্থিত থাকে। সভাত বিদ্যালয়ৰ এগৰাকী মেধাৱী ছাত্ৰী প্ৰয়াত মায়াংকী কাশ্যবৰ সোঁৱৰণত দুয়োগৰাকী স্থান লাভ কৰা ছাত্ৰক বঁটা প্ৰদা কৰাৰ কথা ঘোষণা কৰাৰ লগতে সমাজকৰ্মী প্ৰফুল্ল শইকীয়াই পিতৃ ফটিক চন্দ্ৰ শইকীয়াৰ সোঁৱৰণত আগবঢ়োৱা আৰ্থিক অনুদান দুয়োগৰাকী স্থান প্ৰাপ্ত ছাত্ৰক অভিজ্ঞান সমাৰোহতে প্ৰদান কৰে।