যোশীমঠত ভাঙি পেলোৱা হ’ব প্ৰায় ১০০০ টা ঘৰ। চৰকাৰী জাননী পোৱাৰ পিছতো স্থানীয় ৰাইজে ঘৰৰ এৰি যাবলৈ অনিচ্ছা প্ৰকাশ কৰিছে। ইমান বছৰৰ স্মৃতি এৰি আন ঠাইলৈ যাবলৈ কোনেও বিচৰা নাই। চৰকাৰে নতুন ঠিকনাৰ ব্যৱস্থা কৰিলেও ৰাইজে নিজৰ ঘৰ এৰি যাবলৈ সন্মতি প্ৰকাশ কৰা নাই।
ইতিমধ্যে যোশীমঠৰ অঞ্চলসমূহ দুৰ্বল বুলি প্ৰশাসনে অৱগত কৰিছিল। এন ডি আৰ এফৰ প্ৰতিবেদনত উল্লেখ কৰা হৈছে যে উত্তৰাখণ্ডৰ যোশীমঠ অঞ্চলৰ ৩৫ শতাংশ অঞ্চল অতি দুৰ্বল। সেই অঞ্চলতে থকাৰ ব্যৱস্থা, দোকান-পোহাৰ আৰু হোটেল আছে। শীঘ্ৰে সকলো ভাঙি পেলাব লাগে বুলি কয় ৰাজ্য প্ৰশাসনে।
যোশীমঠৰ বাসিন্দাসকলৰ বাবে থকাৰ বিকল্প ব্যৱস্থা কৰিছে চৰকাৰে। কিন্তু তালৈ যাবলৈ ইচ্ছুক নহয় বাসিন্দাসকল।
জানিব পৰা মতে যোশীমঠৰ পৰা প্ৰায় ১০০ কিলোমিটাৰ দূৰত্বত থকা গৌচাৰৰ সমীপৰ বামোথ গাঁৱত থকাৰ ব্যৱস্থা কৰা হৈছে। কিন্তু ইমান দূৰলৈ গৈ জীৱিকা নিৰ্বাহ কৰাটো কঠিন হৈ পৰিব বাসিন্দা সকলৰ বাবে।
প্ৰসংগক্ৰমে জানুৱাৰী মাহৰ শেষৰ মাহত সমগ্ৰ যোশিমাঠ চহৰত ইটোৰ পিছত সিটো ঘৰত ফাট মেলিবলৈ ধৰিলে। কিছুমান ঘৰৰ বহু অংশ লৰচৰ কৰি ভাঙি যায়। চৰকাৰৰ তথ্য অনুসৰি সেই সময়ছোৱাত মুঠ ৮৬৮টা ঘৰৰ ক্ষতিসাধন হয়। ইয়াৰে ১৮১টা ঘৰ চামোলি জিলা প্ৰশাসনে ‘বসবাস কৰিব নোৱাৰা’ বুলি চিনাক্ত কৰিছে। প্ৰায় শ শ লোকে ঘৰ এৰি সাহায্য শিবিৰলৈ যাব লগা হৈছে নিৰ্দিষ্ট সময়ৰ বাবে।
