পাকিস্তানৰ বেলুচিস্তান প্ৰদেশত শনিবাৰৰ পৰা আৰম্ভ হোৱা ভয়ংকৰ হিংসাত্মক ঘটনাত এতিয়ালৈকে ২০০ৰো অধিক লোক নিহত হৈছে। বেলুচ বিদ্ৰোহীৰ সমন্বিত আক্ৰমণৰ প্ৰত্যুত্তৰত পাকিস্তানী নিৰাপত্তা বাহিনীয়ে ৪০ ঘণ্টীয়া প্ৰত্যাক্ৰমণ আৰম্ভ কৰে। সংঘৰ্ষক কেন্দ্ৰ কৰি ৰাজনৈতিক আৰু কূটনৈতিক উত্তেজনাও তীব্ৰতৰ হৈ পৰিছে।
কুৱেটাত অনুষ্ঠিত এক সংবাদমেলত প্ৰাদেশিক মুখ্যমন্ত্ৰী ছাৰফৰাজ বুগটিয়ে কয় যে শুকুৰবাৰ আৰু শনিবাৰে চলোৱা অভিযানত মুঠ মৃত্যু হোৱা লোকৰ সংখ্যা প্ৰায় ২০০। ইয়াৰে ৩১ জন সাধাৰণ নাগৰিক, ১৭ জন নিৰাপত্তা বাহিনীৰ জোৱান আৰু ১৪৫ জন বেলুচ লিবাৰেচন আৰ্মীৰ (বিএলএ) যোদ্ধা। কেৱল শনিবাৰেই এশৰো অধিক লোকে প্ৰাণ হেৰুৱালে।
এই আক্ৰমণৰ দায়িত্ব স্বীকাৰ কৰিছে বেলুচ লিবাৰেচন আৰ্মীয়ে। তেওঁলোকে দাবী কৰে যে কুৱেটা, গ্ৱাদাৰ, মাষ্টুং আৰু নোছকি জিলাত ‘অপাৰেচন হেৰফ (দ্বিতীয় পৰ্যায়)’ৰ অংশ হিচাপে নিৰাপত্তাৰক্ষীৰ ওপৰত আক্ৰমণ সংঘটিত কৰা হৈছিল। বিদ্ৰোহীসকলৰ মতে, নোছকিস্থিত চিটিডিৰ মুখ্য কাৰ্যালয় দখল কৰি ফ্ৰন্টিয়াৰ কৰ্পছৰ কেইবাটাও ইউনিট ধ্বংস কৰি ৩০ জন বন্দীক মুকলি কৰাৰ লগতে অস্ত্ৰ-শস্ত্ৰ জব্দ কৰা হয়।
এই আক্ৰমণৰ পিছত সমগ্ৰ অঞ্চলটোত কটকটীয়া নিৰাপত্তা ব্যৱস্থা গ্ৰহণ কৰা হয়। ২৪ ঘণ্টাৰো অধিক সময় মোবাইল ইণ্টাৰনেট বন্ধ, মূল পথ অৱৰোধ, ৰেল সেৱা বন্ধ কৰি দিয়া হয়। কুৱেটাৰ পথবোৰ সম্পূৰ্ণ নিৰ্জন আছিল।
পাকিস্তানী সেনা আৰু চৰকাৰে এই আক্ৰমণৰ আঁৰত ভাৰত আছে বুলি অভিযোগ উত্থাপন কৰে। প্ৰতিৰক্ষা মন্ত্ৰী খোৱাজা আছিফে এই আক্ৰমণকাৰীসকল ভাৰত সমৰ্থিত বুলি দাবী কৰে।
ইপিনে, পাকিস্তানৰ অভিযোগ পোনপটীয়াকৈ নাকচ কৰিছে ভাৰত চৰকাৰে। বৈদেশিক মন্ত্ৰালয়ৰ মুখপাত্ৰ ৰণধীৰ জয়ছৱালে কয় যে, ‘পাকিস্তানে নিজৰ আভ্যন্তৰীণ ব্যৰ্থতাক ঢাকি ৰাখিবলৈ বাৰে বাৰে এনে ভিত্তিহীন অভিযোগ উত্থাপন কৰে।
তেওঁ লগতে কয় যে পাকিস্তানে বেলুচিস্তানৰ জনসাধাৰণৰ সমস্যা সমাধানত গুৰুত্ব দিয়াৰ পৰিৱৰ্তে মানৱ অধিকাৰ উলংঘাৰ দায়িত্ব এৰাই চলিবলৈ চেষ্টা কৰিছে।
