এতিয়াও শাম কটা নাই মণিপুৰৰ ভয়াৱহ হিংসাই। ৰাজ্যখনত শান্তি পুনৰ স্থাপনত চূড়ান্ত ব্যৰ্থ হৈছে কেন্দ্ৰ তথা ৰাজ্য চৰকাৰ। মণিপুৰৰ এই হিংসাজৰ্জৰ পৰিস্থিতিৰ সৈতে জড়িত গোচৰৰ তদন্তক কেন্দ্ৰ কৰি আজি কঠোৰ হৈ পৰে উচ্চতম ন্যায়ালয়।
গোচৰৰ শুনানি গ্ৰহণ কৰি শীৰ্ষ আদালতে আজি কেন্দ্ৰ আৰু ৰাজ্য চৰকাৰৰ ওপৰত খৰ্গহস্ত হৈ পৰে। উচ্চতম ন্যায়ালয়ে লগতে মণিপুৰৰ হিংসাত্মক কাণ্ডৰ গোচৰৰ তদন্তক লৈ কেন্দ্ৰীয় তদন্তকাৰী সংস্থাসমূহকো তীব্ৰ সমালোচনা কৰে আৰু তদন্ত অত্যন্ত লেহেমীয়া বুলি মন্তব্য কৰে।
মুখ্য ন্যায়াধীশ ডি ৱাই চন্দ্ৰচূড়ে গোচৰৰ পৰ্যবেক্ষণ কৰি ৰাজ্যখনত সংঘটিত কাণ্ডৰ দুটামান গোচৰৰ বাহিৰে বেছিভাগ ক্ষেত্ৰতে কোনো লোকক গ্ৰেপ্তাৰ কৰা হোৱা নাই বুলি আঙুলিয়াই দিয়ে।
ৰাজ্যখনৰ এক বৰ্বৰ হত্যাকাণ্ডৰ প্ৰসঙ্গৰে মুখ্য ন্যায়াধীশ চন্দ্ৰচূড়ে এই ঘটনা সন্দৰ্ভত দুই মাহ পিছতহে এফ আই আৰ পঞ্জীয়ন কৰা তথা বিবৃতি গ্ৰহণ কৰাক লৈও সমালোচনাত মুখৰ হৈ পৰে।
ইফালে চৰকাৰী প্ৰতিনিধি ছলিচিটৰ জেনেৰেল তুষাৰ মেহতাই আদালতৰ এই ভৰ্ৎসনাৰ পিছত ৰাজ্যৰ সকলো থানাত মহিলা আৰু শিশুৰ ওপৰত হোৱা যৌন হিংসাৰ প্ৰতি সংবেদনশীল হ’বলৈ নিৰ্দেশ দিয়া হৈছে বুলি উল্লেখ কৰে।
ছলিচিটৰ জেনেৰেল তুষাৰ মেহতাই আদালতৰ মজিয়াত মণিপুৰত হিংসাত্মক কাণ্ডৰ সৈতে জড়িত ৬,৫২৩ খন এফআইআৰ পঞ্জীয়ন কৰা হৈছে আৰু ইয়াৰে ১১ টা গোচৰ মহিলা আৰু শিশুৰ বিৰুদ্ধে সংঘটিত অপৰাধৰ সৈতে জড়িত বুলি সদৰী কৰে।
ইফালে দুগৰাকী মহিলাক উলংগ কৰি সমদল কৰোৱাৰ লগতে দলবদ্ধ ধৰ্ষণৰ যি ভয়ংকৰ অভিযোগ উত্থাপন হৈছিল, এই গোচৰত এগৰাকী নাবালককে ধৰি সাতজন লোকক গ্ৰেপ্তাৰ কৰা হৈছে বুলি মেহতাই লগতে আদালতক জানিবলৈ দিয়ে।
মুখ্য ন্যায়াধীশ চন্দ্ৰচূড়ে মণিপুৰ আৰক্ষী তদন্ত প্ৰক্ৰিয়া চলাব পৰাকৈ অক্ষম বুলি তীব্ৰ সমালোচনা কৰাৰ লগতে আইন-শৃংখলাহীন হৈ পৰা মণিপুৰত যোৱা দুমাহ ধৰি সাংবিধানিক ব্যৱস্থা একেবাৰে ভাঙি পৰিছে বুলি ক্ষোভ প্ৰকাশ কৰে।
আদালতে লগতে সোমবাৰে হ’বলগীয়া পৰৱৰ্তী শুনানিৰ সময়ত মণিপুৰৰ আৰক্ষী সঞ্চালক প্ৰধানক সোঁশৰীৰে উপস্থিত থাকিবলৈ নিৰ্দেশ দিয়ে আৰু তেওঁক প্ৰতিটো এফআইআৰৰ ওপৰত নিৰ্দিষ্ট কিছু তথ্য সাজু কৰি ৰাখিবলৈও নিৰ্দেশ দিয়ে।
