নগাঁও জিলাৰ চামগুৰি আৰক্ষী থানাৰ অন্তৰ্গত পহুকটাত শুকুৰবাৰে পুৱাই এক ভয়াৱহ পথ দুৰ্ঘটনা সংঘটিত হয়। ডিফুৰ পৰা তেজপুৰ অভিমুখী AS-09C-5848 নম্বৰৰ এখন যাত্ৰীবাহী বাছে নিয়ন্ত্ৰণ হেৰুৱাই একে দিশতে গৈ থকা AS-02BC-2984 নম্বৰৰ এখন টেম্প’ক খুন্দিওৱাৰ ফলতেই দুৰ্ঘটনাটো সংঘটিত হয়।
দুৰ্ঘটনাটোত দুয়োখন বাহন পথৰ দাঁতিত বাগৰি পৰাত টেম্প’খনত থকা মাতৃসহ এগৰাকী স্কুলীয়া শিশুৰ লগতে যাত্ৰীবাহী বাছখনৰ প্ৰায় ১০ ৰ পৰা ১৫ জন লোক কম-বেছি পৰিমাণে আঘাত প্ৰাপ্ত হয়।
পাছত ঘটনাস্থলত চামগুৰি আৰক্ষী উপস্থিত হৈ স্থানীয় ৰাইজৰ সহযোগত আহত মাতৃ গৰাকীৰ সৈতে স্কুলীয়া কণমাণি শিশু গৰাকীৰ লগতে আঘাতপ্ৰাপ্ত সকলক ততাতৈয়াকৈ চিকিৎসালয়লৈ প্ৰেৰণ কৰে।
উল্লেখ্য যে দুৰ্ঘটনাটোৰ ফলত বহু সময় ধৰি চামগুৰিৰ ৩৭নং ৰাষ্ট্ৰীয় ঘাইপথত তীব্ৰ যান-জঁটৰ সৃষ্টি হোৱা পৰিলক্ষিত হয়।
ইফালে দীৰ্ঘদিন ধৰি নিৰ্মীয়মান ফ’ৰলেন যুক্ত ৰাষ্ট্ৰীয় ঘাইপথ চোৱাৰ দুৰৱস্থাৰ বাবেই সঘনাই অঞ্চলটোত সৰু-বৰ দুৰ্ঘটনা সংঘটিত হৈ আহিছে বুলি অভিযোগ উত্থাপন কৰে স্থানীয় একাংশ ৰাইজে।
