কৰ’নাৰ দ্বিতীয়টো ঢৌত দেশৰ জনজীৱন বিপৰ্যস্ত হৈ পৰিছে। চৌদিশে কেৱল মৃত্যুৰ খৱৰ, আক্ৰান্তৰ হাহাকাৰ তথা সম্বলহীন নাগৰিকৰ শংকিত ছবি।
ইয়াৰ মাজতে ভাঙি পৰিছে দেশৰ স্বাস্থ্য ব্যৱস্থাও। পৰ্যাপ্ত বিছনাৰ অভাৱ, দৰৱ, অক্সিজেনৰ নাটনি, আনকি মৃতদেহ সৎকাৰৰ বাবে ঠাইৰো অভাৱ।
যিসকল চিকিৎসকে নিৰন্তৰ সন্মুখৰ শাৰীত থিয় দি কৰ’নাৰ বিৰুদ্ধে যুদ্ধ চলাই গৈছে তেওঁলোকো লাহে লাহে যেন পৰাজিত হৈ মৃত্যুৰ কোলাত ঢলি পৰিছে।
ইণ্ডিয়ান মেডিকেল এছ’চিয়েশ্যন (আইএমএ) জানিবলৈ দিছে যে কেবলমাত্ৰ ২৪ ঘন্টাতেই ৫০গৰাকীকৈ চিকিৎসকে প্ৰাণ হেৰুৱাইছে।
কৰ’নাৰ দ্বিতীয়টো ঢৌত এতিয়ালৈকে মুঠ ২৪৪গৰাকী চিকিৎসকে প্ৰাণ হেৰুৱাইছে। শেহতীয়াকৈ দিল্লীৰ গুৰু তেজ বাহাদুৰ হাস্পাতালত এগৰাকী জুনিয়ৰ আবাসিক চিকিৎসকৰ কৰ’নাত মৃত্যু হৈছে। ২৬বছৰীয়া আনাছ মুজাহিদ হৈছে এতিয়ালৈকে কৰ’নাত প্ৰাণ হেৰুওৱা কনিষ্ঠতম চিকিৎসক।
আনহাতে, জ্যেষ্ঠতম চিকিৎসক হিচাপে কৰ’নাত প্ৰাণ হেৰুৱাইছে বিশাখাপট্টনমৰ এছ সত্যমূৰ্তিয়ে। ইএনটি বিভাগৰ চিকিৎসক অধ্যাপকগৰাকীয়ে ৯০বছৰ বয়সত কৰ’না আক্ৰান্ত হৈ মৃত্যুক সাৱটি লয়।
কৰ’নাৰ প্ৰথমটো ঢৌত মুঠ ৭৩৬গৰাকী চিকিৎসকে প্ৰাণ হেৰুৱাইছিল। সকলো মিলি এতিয়ালৈ প্ৰায় ১হাজাৰ চিকিৎসকে কৰ’নাৰ বলি হ’বলগীয়া হৈছে।
