কোটি-কোটি গ্ৰাহকক বিপদত পেলালে ষ্টেট বেংক অৱ ইণ্ডিয়াই!

কিমান নিৰাপদ দেশৰ সবাতোকৈ বৃহৎ বেংক ষ্টেট বেংক অৱ ইণ্ডিয়া (এছ বি আই)ত থকা আপোনাৰ বেংক একাউন্টৰ তথ্য? বুধবাৰে প্ৰকাশিত এক প্ৰতিবেদনে এতিয়া বেংকটোত একাউন্ট থকা কোটি-কোটি গ্ৰাহকৰ মনলৈ আনিছে এই প্ৰশ্ন।

Techcrunch নামৰ এক প্ৰতিষ্ঠানে প্ৰকাশ কৰা এই প্ৰতিবেদন মতে এছ বি আয়ে তেওঁলোকৰ মুম্বাইৰ এক ছাৰ্ভাৰ ৰখা কেন্দ্ৰৰ অত্যন্ত স্পৰ্শকাতৰ তথ্য মজুত থকা এটা গুৰুত্বপূৰ্ণ ছাৰ্ভাৰ পাৰ্ছৱৰ্ডেৰে সুৰক্ষিত কৰি ৰাখিবলৈ পাহৰি থকাত কোটি-কোটি বেংক একাউণ্টৰ বেংক বেলেঞ্চ, বেংক একাউণ্ট নম্বৰ আদি তথ্য ফাদিল হোৱাৰ সন্দেহ কৰা হৈছে।

ইণ্ডিয়া টুডে’ত প্ৰকাশিত এক বাতৰি মতে Techcrunch এ পিছত এছ বি আইৰ সৈতে যোগাযোগ কৰাত উক্ত ত্ৰুটিটো ঠিক কৰা হয় যদিও কিমান সময়লৈকে ছাৰ্ভাৰটো অসুৰক্ষিত হৈ আছিল সেয়া জানিব পৰা হোৱা নাই। আনহাতে এছ বি আয়েও এইক্ষেত্ৰত কোনো মন্তব্য প্ৰকাশ কৰা নাই।

প্ৰতিবেদনটোত প্ৰকাশ পোৱা মতে অসুৰক্ষিত ছাৰ্ভাৰটো SBI Quickৰ অন্তৰ্গত। SBI Quickৰ দ্বাৰা বেংকটোৰ যিকোনো গ্ৰাহকে মেছেজ বা ফ’ন কলৰ জৰিয়তে বিভিন্ন বেংকিং সেৱাৰ সুবিদ্ধা ল’ব পাৰে।

এছ বি আইৰ ৱেবছাইটত SBI Quickৰ জৰিয়তে গ্ৰাহকে পাব পৰা সুবিধাৰ বিষয়ে উল্লেখ কৰা আছে।

যিহেতু SBI Quickএ বেংকটোৰ এগৰাকী গ্ৰাহকৰ ফ’ন নম্বৰটো তেওঁৰ একাউণ্টেৰে সংযোগ কৰাইছে ফলত চতুৰ ঠগ-প্ৰৱঞ্চকে ফাদিল হোৱা তথ্য ব্যৱহাৰ কৰি অনায়াসে কোনো গ্ৰাহকৰ এটাউণ্টৰ পৰা পইছা সৰকাই নিব পাৰিব।

প্ৰতিবেদনটোত লগতে উল্লেখ কৰা মতে Techcrunch ৰ দলে , ‘ৰিয়েল-টাইম’ত গ্ৰাহকসকললৈ তেওঁলোকৰ ফ’ন নম্বৰ, বেংক বেলেঞ্চ আৰু শেহতীয়া লেন-দেনৰ তথ্য সম্বলিত মেছেজ গৈ থকা ধৰা পেলায়। মাত্ৰ সোমবাৰৰ দিনাই বেংকে এনে ৩০লাখ মেছেজ বন্ধ কৰিছে।‘

দেশৰ অন্যতম বৃহৎ বেংটোত ঘটা এই ভয়ংকৰ গাফিলতিয়ে নিশ্চয়কৈ বেংকটোৰ কোটি কোটি গ্ৰাহকক চিন্তাত পেলাইছে।