আন্দোলনকাৰীসকলৰ প্ৰতি আন এক প্ৰত্যাহ্বান জনাইছে ৰাজ্যিক বিজেপিয়ে। কিয়নো অতদিনে বিভিন্ন দল-সংগঠনৰ প্ৰতিবাদকাৰীসকলে ব্যৱহাৰ কৰি অহা ৰাজপথ দখল কৰিব শাসনাধীষ্ঠ দল বিজেপিয়ে। ইয়াৰ বাবে কাইলৈ বিজেপিৰ প্ৰত্যেকখন জিলা সমিতিয়ে বাহিৰ কৰিব ‘প্ৰতিবাদী সমদল’।
তিনিচুকীয়াত কালি সংঘটিত হোৱা ঘটনাৰ বাবেই বিজেপিৰ ৩৯ খন জিলা সমিতিয়ে প্ৰত্যেক জিলাতে প্ৰতিবাদী সমদল বাহিৰ কৰিব বুলি আজি এক সংবাদমেলযোগে জানিবলৈ দিয়ে ৰাজ্যিক বিজেপিৰ উপ-সভাপতি ড০ প্ৰদীপ ঠাকুৰীয়াই।
উল্লেখ্য যে, কালি তিনিচুকীয়া জিলা বিজেপিৰ লক্ষেশ্বৰ মৰাণ আৰু ভাজপা কিষাণ মৰ্চাৰ সাধাৰণ সম্পাদ ত্ৰৈলোক্য শইকীয়াক একাংশ আন্দোলনকাৰীয়ে খেদি খেদি প্ৰহাৰ কৰা কাৰ্য্যক তীব্ৰ ভাষাৰে গৰিহনা দিয়ে ৰাজ্যিক বিজেপিয়ে।
‘’কালি আন্দোলনকাৰীসকলে গণতান্ত্ৰিক প্ৰতিবাদৰ নামত এক অগণতান্ত্ৰিক পন্থা আৰু গুণ্ডাগিৰিৰ আশ্ৰয় লৈছে। উক্ত ঘৃণনীয় কাৰ্য্যক ৰাজ্যিক সমিতিয়ে তীব্ৰ ভাষাৰে গৰিহনা দিছো।‘’ সংবাদমেলত এইদৰে কয় ড০ ঠাকুৰীয়াই।
প্ৰসংগক্ৰমে উল্লেখ কৰিব পাৰি যে, তিনিচুকীয়াৰ ঘটনাৰ সৈতে জড়িত আছুৰ সাংগঠনিক সম্পাদক ৰাণা গোহাঁই, সদস্য ক্ৰমে ৰিতুপন দহোতীয়া আৰু দীপাংকৰ গোহাঁইক ইতিমধ্যে আৰক্ষীয়ে গ্ৰেপ্তাৰ কৰিছে।
তদুপৰি, উক্ত ঘটনাৰ সৈতে জড়িত সকলোকে দৃষ্টান্তমূলক শাস্তিৰ দাবী তোলে ৰাজ্যিক বিজেপিৰ উপ-সভাপতিগৰাকীয়ে। লগতে জিলা প্ৰশাসন তথা আৰক্ষী প্ৰশাসনক এনে ঘটনাৰ পুনৰাবৃত্তি নহ’বৰ বাবে চোকা নজৰ ৰখাৰ লগতে তৎকালীন পৰিস্থিতিৰ মোকাবিলা কৰিবলৈ কঠোৰ পদক্ষেপ গ্ৰহণ কৰিবলৈয়ো দাবী জনায়।
কাইলৈ প্ৰতিবাদী সমদলৰ অন্তত জিলা বিজেপি সমিতিসমূহে উপায়ুক্তৰ জৰিয়তে ৰাজ্যৰ মুখ্য মন্ত্ৰীলৈ এখন স্মাৰক পত্ৰ প্ৰেৰণ কৰিব।
