হিন্দী টেলিভিছন জগতৰ বাবে আৰু এক বেয়া খবৰ। বিখ্যাত মডেল তথা অভিনেতা আদিত্য সিং ৰাজপুতৰ ৰহস্যজনক মৃত্যুৱে পুনৰ এবাৰ জোকাৰি গৈছে বলীউদক। সোমবাৰে বিয়লি ঘৰৰ বাথৰুমত উদ্ধাৰ হৈছিল অভিনেতাজনৰ মৃতদেহ। চিকিৎসালয়লৈ নিয়াৰ পিছত চিকিৎসকে তেওঁক মৃত বুলি ঘোষণা কৰে।
টেলিভিছনৰ অতি জনপ্ৰিয় মুখ আদিত্য সিং ৰাজপুত। প্ৰথমতে কেইবাখনো হিন্দী ধাৰাবাহিকত অভিনয় কৰাৰ পিছত কেইবাখনো হিন্দী ছবিতো তেওঁক দেখা গৈছিল। জনপ্ৰিয় ৰিয়েলিটি শ্ব’ৰ এজন সুপৰিচিত মুখো আছিল তেওঁ। অভিনয়, মডেলিঙৰ উপৰিও আদিত্যই মুম্বাই ছবি উদ্যোগত কাষ্টিং ক’অৰ্ডিনেটৰ হিচাপেও কাম কৰিছিল।
অভিনেতা আদিত্য সিং ৰাজপুতে মুম্বাইৰ এটা বিলাসী অট্টালিকাৰ ১১ নং মহলাৰ ফ্লেটত বাস কৰিছিল। বন্ধুসকলে ঘৰলৈ আহি বাথৰুমৰ পৰা উদ্ধাৰ কৰে তেওঁৰ মৃতদেহ। তাৰ লগে লগে তেওঁ বাসগৃহৰ নিৰাপত্তাৰক্ষীক ফোন কৰি ওচৰৰ চিকিৎসালয়লৈ লৈ যায়। তাত চিকিৎসকে আদিত্যক মৃত ঘোষণা কৰে।
সূত্ৰ অনুসৰি, অত্যধিক ড্ৰাগছ সেৱনৰ বাবেই অভিনেতাজনৰ মৃত্যু হয়। অৱশ্যে আদিত্যৰ মৃত্যুৰ কাৰণ সন্দৰ্ভত এতিয়াও চিকিৎসালয় কৰ্তৃপক্ষই আনুষ্ঠানিকভাৱে অৱগত কৰা নাই।
আদিত্য সিং ৰাজপুতে মুম্বাইত মডেল হিচাপে নিজৰ কেৰিয়াৰ আৰম্ভ কৰিছিল। কেইবাখনো হিন্দী ধাৰাবাহিকৰ উপৰিও তেওঁ ৩০০টা বিজ্ঞাপনতো অভিনয় কৰিছে। ‘স্পিটজভিলা ৯’, ‘আৱাজ ছিজন ৯’, ‘বেড বয় ছিজন ৪’ৰ দৰে অনুষ্ঠানত অংশগ্ৰহণ কৰিছিল। আদিত্যই কেইবাটাও বিখ্যাত প্ৰডাকচন কোম্পানীৰ সৈতে কাষ্টিং ক’অৰ্ডিনেটৰ হিচাপেও কাম কৰিছিল।
তেওঁৰ মৃত্যুৰ খবৰ পোহৰলৈ অহাৰ লগে লগে বিনোদন জগতত শোকৰ ছাঁ পৰে। মাত্ৰ ৩২ বছৰ বয়সতে আদিত্যৰ মৃত্যুৱে সুশান্ত সিং ৰাজপুতৰ ৰহস্যজনক মৃত্যুৰ কথাও বহুতকে সোঁৱৰাই দিছে।
ড্ৰাগছৰ প্ৰতি আসক্তিৰ ফলতে কম বয়সতে এগৰাকী সম্ভাৱনাময় প্ৰতিভাৰ অপমৃত্যু ঘটা বুলি বিভিন্নজনে আক্ষেপো কৰিছে।
