প্ৰথমে ‘কা’ বাতিল, পাছত ৰাজনৈতিক বিকল্প : বৰষাৰাণী বিষয়া

‘ৰাজনৈতিক মেৰপাক বুজি নাপাওঁ, শিল্পী হয় গতিকে জাতিৰ হকে মাত মাতিবলৈ ওলাই আহিছো। কিন্তু কাক ভোট দিব বুলি মানুহৰ মনত প্ৰশ্ন হৈছে। কিন্তু এতিয়া মূল বিষয়টো হৈছে কা বাতিল হ’ব লাগে। পাছত কি ৰাজনৈতিক বিকল্প হ’ব সেয়া অসমৰ ৰাইজে সিদ্ধান্ত ল’ব।‘

দেওবাৰে মহানগৰীৰ লতাশিল খেলপথৰাৰ পৰা চান্দমাৰীলৈকে ‘কা’ৰ বিৰুদ্ধে হোৱা ‘নাৰীকন্ঠ’ শীৰ্ষক প্ৰতিবাদী সমদলত অংশগ্ৰহণ কৰি ৰাজনৈতিক বিকল্প সন্দৰ্ভত এই মন্তব্য কৰে বৰষাৰাণী বিষয়াই।

আনহাতে, অসম চুক্তিক অগ্ৰাহ্য কৰা তথা এই চুক্তি এক ভুল সিদ্ধান্ত আখ্যা দিয়া হিমন্ত বিশ্ব শর্মাক সমালোচনা কৰি বৰষাই কয়, ‘এইটো অতি দুখৰ বিষয়। সেইসময়ত তেওঁৱো উপস্থিত আছিল। অসম চুক্তি ৰূপায়ণ দপ্তৰৰ মন্ত্ৰীও আছিল। অন্তত অসমৰ ৰাইজে দুখ পাইছে। যি নহওঁক ৮৫৫ গৰাকী চহিদে বিদেশী বহিস্কাৰ আন্দোলন কৰিবলৈ আহি প্ৰাণ আহুতি দিছিল।’

ইপিনে, ‘অসম চুক্তিখন আইনী নথি‘ বুলি মন্তব্য কৰি বৰষাই লগতে কয়, ‘এইখন এনেই পেলাই দিব পৰা বা লৈ ঘুৰি ফুৰা কাগজ নহয়। গতিকে এই চুক্তিখন মানি নলওঁ বুলি কোৱাটো গ্ৰহণযোগ্য নহয়।‘

‘অসমে দশক দশক জুৰি বিদেশীৰ বোজা লৈ আহিছে। সকলোৰে এটাই আশা বিদেশী সমস্যাৰ স্থায়ী সমাধান হ’ব লাগে। তেওঁ এতিয়া ৫ লাখ লোকক সংস্থাপন দিম বুলি কৈ আছে, ৫ লাখ কিয় এজনো বিদেশী বোজা অসমে নলয়,‘-হিমন্ত বিশ্ব শৰ্মাক উভটি ধৰি অভিনেত্ৰীগৰাকীয়ে কয়।

তেওঁ লগতে ‘কা’ৰ বিৰুদ্ধে গণতান্ত্ৰিক প্ৰতিবাদ অৱ্যাহত থাকিব বুলিও সদৰী কৰে।