অসমৰ চুইজাৰলেণ্ড খ্যাত বাক্সা আৰু ওদালগুৰী জিলাৰ সীমান্তৰ বগামাটিত আজি ৰাইজৰ বাবে মুকলি কৰা হয় বড়ো জনগোষ্ঠীৰ বাথৌ ধৰ্মৰ লোক সকলৰ উপাসনাৰ থলী বাথৌ থানচালি। ৰাজ্যসভাৰ সাংসদ বিশ্বজিৎ দৈমাৰীয়ে নিজা ববীয়াকৈ অৰ্থ ব্যয় কৰি নিৰ্মাণ কৰি উলিওৱা বাথৌ ধৰ্মৰ উপাসনা থলীখন আজি পুৱা মুকলি কৰা হয়।
পুৱা বাথৌ থানচালিৰ মুখ্য দ্বাৰ মুকলি কৰাৰ পিছত ৰাজ্যসভাৰ সাংসদ বিশ্বজিৎ দৈমাৰী, বিটিচিৰ কাৰ্যবাহী সদস্য মহেশ্বৰ বাসুমতাৰীৰ লগতে বাথৌ মহাসভাৰ বিষয়-ববীয়া আৰু সহস্ৰাধিক ভক্তপ্ৰাণ ৰাইজৰ উপস্থিতিত বাথৌ ধৰ্মৰ ধৰ্ম গুৰু মানসিং বৌৰাইৰ প্ৰতিমূৰ্তিটো মুকলি কৰে বিটিচিৰ প্ৰাক্তন কাৰ্যবাহী সদস্য তথা শুক্লাই চেৰফাং বিটিচি পৰিষদীয় সমষ্টিৰ এমচিএলএ গণেশ কছাৰীয়ে।
বন্তি প্ৰজ্বলনৰ পিছত উপাসনা থলীত সমবেত সহস্ৰাধিক ৰাইজে ধৰ্মীয় লোকবাদ্য বজাই বাথৌ ধৰ্মীয় প্ৰাৰ্থনা ‘আৰজ’ গাই মুখৰিত কৰি তোলে ভাৰত-ভূটান সীমান্তৰ বগামাটিৰ আকাশ-বতাহ।
প্ৰায় দুই ঘণ্টা জোৰা প্রার্থনাৰ অন্তত অনুষ্ঠিত হয় এক ৰাজহুৱা সভা। এই সভাত উপস্থিত থাকে তামুলপুৰ বিধানসভা সমষ্টিৰ বিধায়ক ইমানুৱেল মোছাহাৰী, পানেৰী সমষ্টিৰ বিধায়িকা কমলী বসুমতাৰী, বাক্সা জিলাৰ উপায়ুক্ত ৰঞ্জন শৰ্মা, বাক্সাৰ আৰক্ষী অধীক্ষক প্ৰতীক বিজয় কুমাৰ থুবে, বিটিচিৰ কাৰ্যবাহী সদস্য মহেশ্বৰ বসুমতাৰী প্ৰমুখ্যে কেইবাগৰাকী বিশিষ্ট ব্যক্তি।
সভাত উপস্থিত থকা বিশিষ্ট ব্যক্তিসকলক সাংসদ গৰাকীৰ তৰফৰ পৰা একোখনকৈ আৰণাইৰে সম্বৰ্ধনা জনোৱাৰ লগতে একোখনকৈ বাথৌ ধৰ্মীয় প্ৰতীক বাথৌ মমেন্ট’ উপহাৰ দিয়া হয়।
এই উপাসনা থলী পৰিচালনা কৰাৰ বাবে এখন সমিতি গঠন কৰা হৈছে বুলি জানিবলৈ সাংসদ দৈমাৰীয়ে কয় যে ইয়াৰ ৰক্ষণাবেক্ষণৰ দায়িত্ব তেওঁ নিজে আৰু পৰৱৰ্তী সময়ত তেওঁৰ পৰিয়ালে ল’ব।
আনহাতে সভাত উপস্থিত থাকি বিধায়িকা কমলী ৰাণী ব্ৰহ্মই ভাৰত-ভূটান সীমান্তৰ বিভিন্ন ঠাই পৰ্যটনথলী হিচাপে গঢ় লৈ উঠাত বনৰীয়া হাতীৰ লগতে অন্যান্য বন্য জীৱ-জন্তুৰ বিচৰণ ভূমি সংকুচিত হৈ আহিছে বুলি উল্লেখ কৰি বনৰীয়া জীৱ-জন্তু যাতে সকলো স্থানত সুৰক্ষিত হৈ থাকে তাৰ ওপৰতো দৃষ্টি ৰাখিবলৈ সকলোকে আহ্বান জনায়।
সভাত সেনাৰ জি অ’চি দীপক মেহৰা, বাক্সা জিলাৰ উপযুক্ত ৰঞ্জন শৰ্মা, বাক্সা জিলা আৰক্ষী অধীক্ষক প্ৰতীক বিজয় কুমাৰ থুবেইও ভাষণ ৰাখি অসমৰ বিশেষ পৰ্যটন ক্ষেত্ৰ বগামাটিৰ সৌন্দৰ্য্য অটুট ৰাখি পৰ্যটন থলীখন পৰিষ্কাৰ-পৰিচ্ছন্ন কৰি ৰাখিবলৈ পৰ্যটক আৰু বগামাটি পৰিচালনাৰ দায়িত্ব লোৱা স্বেচ্ছাসেৱী সংগঠন সমূহক আহ্বান জনায়।
