বন্দুকধাৰী হ’ল বলীউডৰ ভাইজান ছলমান খান। চিনেমাৰ পৰ্দাত হাতত বন্দুক লৈ চুপাৰষ্টাৰজনে ভিলেইনৰ ওপৰত দমন চলোৱা আপুনি দেখিছে। কিন্তু এইবাৰ বাস্তৱ জীৱনতো বন্দুক হাতত তুলি লৈছে বলিউডৰ ভাইজানে।
নিজৰ সুৰক্ষাৰ বাবেই এই পন্থা অৱলন্বন কৰিছে তেওঁ। ইতিমধ্যে মুম্বাই আৰক্ষীয়ে তেওঁক মৰণাস্ত্ৰৰ অনুজ্ঞাপত্ৰ প্ৰদান কৰিছে।
উল্লেখ্য যে শেহতীয়াকৈ ছলমান খান আৰু তেওঁৰ দেউতাক ছালীম খানে এটা ভয়ংকৰ মৃত্যুৰ ভাবুকি লাভ কৰিছিল। এক বেনামী পত্ৰযোগে কোনো অচিনাক্ত দুৰ্বৃত্তই দুয়োগৰাকী হত্যাৰ ভাবুকি দিছিল।
এই ভাবুকি প্ৰদানৰ আঁৰত তিহাৰ জেলত কাৰাবন্দী হৈ থকা কুখ্যাত গেংষ্টাৰ ল’ৰেন্স বিষ্ণৈলৈ সন্দেহৰ আঙুলি উঠিছিল।
এই ল’ৰেন্স বিষ্ণৈৰ গেঙেই জনপ্ৰিয় পঞ্জাৱী গায়ক সিদ্ধু মুছেৱালাক যোৱা ২৯ মে’ত হত্যা কৰিছিল বুলি অভিযোগ উঠি আহিছে। তাৰ পাছতে বিষ্ণৈয়ে জনাইছিল যে বলিউডৰ অভিনেতা ছলমান খানো মুছেৱালা সদৃশ পৰিস্থিতিৰ সন্মুখীন হ’ব।
বিষয়টো লৈ তৎক্ষণাৎ ছলমান খানে মুম্বাই আৰক্ষীৰ কাষ চাপিছিল। আনহাতে কিছুদিন পূৰ্বে মুম্বাইৰ আৰক্ষী আয়ুক্তক সাক্ষাৎ কৰি মাৰণাস্ত্ৰৰ অনুজ্ঞাপত্ৰৰ আবেদন কৰিছিল ছলমানে।
কিন্তু কিয় ল’ৰেন্স বিষ্ণয়ে ছলমান খানক এই ভাবুকি প্ৰদান কৰিছিল? তাৰ কাৰণ হৈছে ১৯৯৮ চনৰ কৃষ্ণষাঁৰ মৃগ চিকাৰৰ বিখ্যাত ঘটনাটো। এখন চিনেমাৰ দৃশ্যগ্ৰহণৰ সময়ত ছলমান খানে ৰাজস্থানত কৃষ্ণষাঁড় মৃগ চিকাৰ কৰিছিল।
এই লৈ আইনী জটিলতাৰ মাজতো সোমাই পৰিছিল তেওঁ। আনহাতে ল’ৰেন্স বিষ্ণৈ হৈছে ৰাজস্থানৰ বিষ্ণৈ সম্প্ৰদায়ৰ এজন লোক। এই সম্প্ৰদায়টোৱে কৃষ্ণষাঁড় মৃগক পূজা কৰি আহিছে।
সেই ঘটনাৰ আলমতে গেংষ্টাৰ ল’ৰেন্স বিষ্ণৈয়ে ছলমান খানক ইতিপূৰ্বে ২০১৮ চনতো হত্যাৰ ভাবুকি প্ৰদান কৰিছিল।
