তামিলনাডুৰ বিধানসভা নিৰ্বাচনত অভিনেতা বিজয়ৰ ৰাজনৈতিক দল তামিলগা ভেট্ৰি কাজাগম (টিভিকে) এ বৃহৎ সফলতা অৰ্জন কৰিছে। ২৩৪ খন আসনৰ ভিতৰত টিভিকে দলে ১০৮ খন আসন লাভ কৰি ৰাজ্যখনৰ ৬০ বছৰীয়া পুৰণি দ্ৰাবিড় ৰাজনীতিৰ আধিপত্য ভংগ কৰিছে। এই নিৰ্বাচনত শাসকীয় ডিএমকে দলে এক বৃহৎ পৰাজয়ৰ সন্মুখীন হৈছে আৰু মুখ্যমন্ত্ৰী এম কে ষ্টেলিনে নিজৰ কোলাথুৰ সমষ্টিৰ পৰা পৰাজয় বৰণ কৰিছে। আনহাতে, এআইএডিএমকে দলে ৪৭ খন আসন লাভ কৰি তৃতীয় স্থানলৈ অৱনমিত হৈছে। বৰ্তমান বিজয়ে নিজৰ নৱনিৰ্বাচিত বিধায়কসকলৰ সৈতে চেন্নাইৰ বাসগৃহত মন্ত্ৰীসভা গঠনৰ বিষয়ে আলোচনা কৰিছে।
বিশেষ সূত্ৰৰ পৰা জানিব পৰা মতে, অহা ৭ মে’ তাৰিখে বিজয়ে তামিলনাডুৰ মুখ্যমন্ত্ৰী হিচাপে শপত গ্ৰহণ কৰাৰ সম্ভাৱনা আছে। তেওঁৰ লগতে আন নজন মন্ত্ৰীয়েও একেদিনাই শপত ল’ব পাৰে। কিন্তু চৰকাৰ গঠন কৰিবলৈ প্ৰয়োজনীয় মেজিক সংখ্যাতকৈ দলটো বৰ্তমান ১০ খন আসন পিছ পৰি আছে। সেয়েহে এতিয়া মিত্ৰজোঁটৰ চৰকাৰ গঠন কৰাৰ বাবে আন সৰু দলৰ সৈতে আলোচনা চলি আছে।
চৰকাৰ গঠনৰ বাবে বিজয়ে কংগ্ৰেছ, বাওঁপন্থী দল, ভিচিকে আৰু আইইউএমএলৰ দৰে সৰু আঞ্চলিক দলৰ সৈতে মিত্ৰতা কৰাৰ চেষ্টা চলাইছে আৰু অতি সোনকালেই তেওঁলোকলৈ আমন্ত্ৰণ প্ৰেৰণ কৰা হ‘ব। এই দলসমূহ বৰ্তমান ডিএমকেৰ মিত্ৰজোঁটত আছে। শেহতীয়া নিৰ্বাচনত কংগ্ৰেছে ৫ খন আৰু আন সৰু দলসমূহে দুখনকৈ আসন লাভ কৰিছে। যদি এই দলসমূহে বিজয়ৰ দলক সমৰ্থন কৰে, তেন্তে বিজয়ে অতি সহজেই চৰকাৰ গঠন কৰিব পাৰিব। অৱশ্যে ডিএমকে দলে দাবী কৰিছে যে বাওঁপন্থী আৰু ভিচিকে দলে তেওঁলোকৰ সংগ এৰি নাযায়। কংগ্ৰেছে এই পৰিস্থিতিত ৰাজ্যখনৰ স্বাৰ্থৰ প্ৰতি লক্ষ্য ৰাখি এক সামূহিক সিদ্ধান্ত ল’ব বুলি প্ৰকাশ কৰিছে।
টিভিকেৰ এই ঐতিহাসিক বিজয়ত কেইবাজনো নেতাই গুৰুত্বপূৰ্ণ ভূমিকা পালন কৰিছে আৰু তেওঁলোকে নতুন মন্ত্ৰীসভাত স্থান পোৱাৰ পূৰ্ণ সম্ভাৱনা আছে। ইয়াৰ ভিতৰত উল্লেখযোগ্য হৈছে টি নগৰৰ পৰা জয়ী হোৱা এন আনন্দ বা বুচি আনন্দ, যিয়ে বিজয়ৰ অনুৰাগী ক্লাৱক ৰাজনৈতিক দললৈ ৰূপান্তৰ কৰাত সহায় কৰিছিল। ইয়াৰ লগতে প্ৰাক্তন আয়কৰ বিষয়া অৰুণৰাজ, বিজেপিৰ প্ৰাক্তন ছ’চিয়েল মিডিয়া ৰণনীতিবিদ চিটিআৰ নিৰ্মল কুমাৰ আৰু ৰাজনৈতিক ৰণনীতিবিদ আধাৱ অৰ্জুনাৰ দৰে নেতাই এই নিৰ্বাচনত গুৰুত্বপূৰ্ণ অৱদান আগবঢ়াইছে।
নতুন চৰকাৰত মন্ত্ৰী পদ পাবলগীয়া আন কেইগৰাকীমান প্ৰভাৱশালী নেতাৰ ভিতৰত এআইএডিএমকেৰ প্ৰাক্তন জ্যেষ্ঠ নেতা কে এ চেংগোট্টাইয়ান অন্যতম, যিয়ে নিজৰ দীৰ্ঘদিনীয়া ৰাজনৈতিক অভিজ্ঞতা টিভিকেৰ লগত সংযোগ কৰিছে। ইয়াৰ উপৰিও আৰ কে নগৰৰ পৰা জয়ী হোৱা মেৰী উইলছন, জনপ্ৰিয় অভিনেতা তথা কণ্টেণ্ট ক্ৰিয়েটৰ ৰাজমোহন, প্ৰাক্তন বিধায়ক প্ৰভাকৰ আৰু মুখ্যমন্ত্ৰী ষ্টেলিনক প্ৰায় ৯০০০ ভোটত পৰাস্ত কৰি চৰ্চালৈ অহা ভি এছ বাবুৰ দৰে নেতাসকলেও বিজয়ৰ দলটোক শক্তিশালী কৰি তুলিছে। এই সকলো অভিজ্ঞ আৰু নতুন বিধায়কে এতিয়া মন্ত্ৰীসভাৰ গুৰুত্বপূৰ্ণ দায়িত্ব লাভ কৰাৰ সম্ভাৱনা আছে।
