কৰ’না ভাইৰাছৰ বিৰুদ্ধে যুঁজ দিবলৈ অভিনেত্ৰী আইমী বৰুৱাৰ ১ লাখ টকাৰ সাহায্য

ক’ৰ’ণা ভাইৰাছৰ বিৰুদ্ধে যুঁজ দিবলৈ ৰাজ্যিক স্বাস্থ্য মন্ত্ৰী পিয়ুষ হাজৰিকাৰ পত্নী তথা অভিনেত্ৰী আইমী বৰুৱাই আগবঢ়াইছে ১ লাখ টকাৰ সাহায্য ।

ৰাজ্য চৰকাৰৰ আৰোগ্য নিধিলৈ এই সাহায্য আগবঢ়োৱা বুলি ঘোষণা কৰে অভিনেত্ৰী আইমী বৰুৱাই।

ফেচবুকত নিজৰ পেইজৰ পৰা আপলোড কৰা এক ভিডিওৰ জৰিয়তে তেওঁ এই কথা সদৰী কৰিছে।

নিজৰ ব্যক্তিগত ফালৰ পৰা এই ধন আগবঢ়োৱা বুলি উল্লেখ কৰে অভিনেত্ৰী গৰাকীয়ে।

“লকডাউনৰ সময়ছোৱাত বিভিন্নজনে বিভিন্ন সমস্যাৰ সন্মুখীন হৈছে। কাৰোবাৰ ঘৰত যদি ৰুগীয়া, কাৰোবাৰ আকৌ ভাতসাঁজৰ বাবে চিন্তা। সেয়েহে আজি ব্যক্তিগত ফালৰ পৰা ১ লাখ টকা অসম আৰোগ্য নিধিলৈ আগবঢ়াইছো,”- ভিডিওটোত আইমীয়ে এইদৰে কয়।

উল্লেখযোগ্য যে, কালি যুৱ প্ৰজন্মৰ হাৰ্টথৰ্ব জুবিন গাৰ্গ আৰু অভিনেতা যতীন বৰাইয়ো ১ লাখ টকাকৈ অসম আৰোগ্য নিধিলৈ আগবঢ়ায়।

তদুপৰি, অসমৰ শাসক-বিৰোধী জনপ্ৰতিনিধিসকলৰ লগতে চৰকাৰৰ কৰ্মচাৰীসকলেও ইতিমধ্যে এইক্ষেত্ৰত দান-বৰঙণি আগবঢ়াইছে।

মাৰাত্মক কৰ’নাভাইৰাছৰ বিৰুদ্ধে যুঁজাৰ বাবে চৰকাৰী পুঁজিলৈ আপুনিও বৰঙণি আগবঢ়াব পাৰে।

অসম চৰকাৰৰ অসম আৰোগ্য নিধিলৈ তলৰ বেংক একাউণ্টত বৰঙণি পঠিয়াব পাৰে—

Assam Arogya Nidhi, A/c No. 32124810101, SBI, IFSC Code: SBIN0010755