দেশজুৰি কৰ’না ভাইৰাছৰ ঘটনা দ্ৰুত গতিত বৃদ্ধি পাবলৈ লৈছে।এতিয়ালৈকে দেশত ১১৩৯ জন লোক কৰ’নাত আক্ৰান্ত হৈছে আৰু ইয়াৰ ভিতৰত ৩০জন লোকৰ মৃত্যু হৈছে।
কৰ’নাৰ ভয়াবহতাৰ প্ৰতি লক্ষ্য ৰাখি মোদী চৰকাৰে ১১খন কমিটি গঠন কৰিছে। এই কমিটিসমূহে কৰ’নাৰ বাবে উদ্ভৱ হোৱা জৰুৰীকালীন পৰিস্থিতিৰ মোকাবিলা কৰিবলৈ কাম কৰিব।
গৃহ মন্ত্ৰ্যালয়ৰ ফালৰ পৰা দেওবাৰে কমিটিকেইখন গঠন কৰা হয়। এই কমিটিত মোদী চৰকাৰৰ জ্যেষ্ঠ বিষয়াসকলক অন্তৰ্ভুক্ত কৰা হৈছে।
প্ৰথমখন কমিটিখন জৰুৰীকালীন চিকিৎসা ব্যৱস্থাপনা পৰিকল্পনাৰ বাবে গঠন কৰা হৈছে। ইয়াৰ নেতৃত্ব দিব নীতি আয়োগৰসদস্য ডাঃ বি পালে।
ইয়াৰ উপৰি বাকী কমিটিকেইখন হাস্পাতল, আইছ’লেশ্যন আৰু কোৱাৰেন্টাইনৰ পৰ্যাপ্ততা আৰু ৰোগীৰ নিৰীক্ষণ, পৰীক্ষা তথা ক্ৰিটিকেল কেয়াৰ প্ৰশিক্ষণৰ বাবে গঠন কৰা হৈছে।
তদুপৰি, চিকিৎসা সামগ্ৰী, লোকসকলক খোৱা বস্তু আৰু ঔষধৰ সুবিধা আগবঢ়োৱা, ব্যক্তিগত খণ্ড তথা এন জি অ’ৰ সৈতে সমন্বয় আৰু লকডাউনক লৈও কিমিটি গঠন গঠন কৰা হৈছে।
চীনৰ বুহান চহৰৰ পৰা আৰম্ভ হোৱা কৰ’না ভাইৰাছে এতিয়া সমগ্ৰ বিশ্বৰে প্ৰায় ১৮৩খন দেশত বিয়পি পৰিছে। গোটেই বিশ্বতে ৩৩হাজাৰতকৈয়ো অধিক লোকৰ মৃত্যু হৈছে।
যোৱা ডিচেম্বৰত চীনত প্ৰথম ঘটনাটো পোহৰলৈ অহাৰ পৰা এতিয়ালৈকে প্ৰায় ৭লাখ ১১ হাজাৰ লোক কৰ’নাত আক্ৰান্ত হৈ অসুস্থ হৈ পৰিছে। ইয়াৰ ভিতৰত ১ লাখ ৪৮হাজাৰ লোক সুস্থ হৈ উঠিছে।
