ৰক্ষণশীলতাৰ বিৰুদ্ধে থিয় হৈ অসমীয়া চলচ্চিত্ৰত অভিনেত্ৰী হিচাবে আত্মপ্ৰকাশ কৰা অনুপমা ভট্টাচাৰ্য আৰু নাই। কোভিডত আক্ৰান্ত হৈ অভিনেত্ৰীগৰাকীয়ে আজি শেষ নিশ্বাস ত্যাগ কৰে। অভিনেত্ৰীগৰাকীক শনিবাৰে কোভিডত আক্ৰান্ত হোৱাৰ পিছত জিএমচিএইছত ভৰ্তি কৰোৱা হৈছিল। আজি বিয়লি ৫.৪৫ বজাত তেওঁৰ মৃত্যু ঘটে।
মৃত্যুৰ সময়ত অভিনেত্ৰীগৰাকীৰ বয়স হৈছিল ৯৪ বছৰ।
১৯২৮চনৰ ১৯ আগষ্টত শিৱসাগৰৰ আমোলাপট্টীত প্ৰখ্যাত বেজবৰুৱা পৰিয়ালত জন্ম গ্ৰহণ কৰিছিল অনুপমা ভট্টাচাৰ্যই।
তেওঁৰ পিতৃৰ নাম আছিল গোপাল বেজবৰুৱা আৰু মাতৃৰ নাম গুণদা বেজবৰুৱা। সৰুৰে পৰা অভিনয়ৰ প্ৰতি ৰাপ থকা অনুপমা ভট্টাচাৰ্যই ভ্ৰাম্যমানৰ মঞ্চত অভিনয় কৰিবলৈ আৰম্ভ কৰিছিল। তেওঁৱেই অসমৰ ভ্ৰাম্যমানৰ প্ৰথমগৰাকী অভিনেত্ৰী।
অনুপমা ভট্টাচাৰ্যই ফুলেশ্বৰী গাৰ্লছ হাইস্কুলত শিক্ষা গ্ৰহণ কৰিছিল আৰু মাত্ৰ ৯ বছৰ বয়সতে উদয় ভট্টাচাৰ্যৰ সৈতে বিয়া হ’বলগীয়া হৈছিল। কিন্তু বিয়াৰ কিছমিাহ পিছতেই উদয় ভট্টাচাৰ্যৰ মৃত্যু হোৱাত দিশহাৰা হৈ পৰিছিল অনুপমা ভট্টাটাৰ্য।
ফণী শৰ্মাই পৰিচালনা কৰা ছবি ছিৰাজত শিৱপ্ৰসাদ ভট্টাচাৰ্যই সংগীত পৰিচালনা কৰিছিল।
ছিৰাজ ছবিত অভিনয় কৰা অনুপমা ভট্টাচাৰ্যই শিৱপ্ৰসাদ ভট্টাচাৰ্যৰ সৈতে পুনৰ বিয়াত বহে যদিও কন্যা সন্তান ৰুণ্মীৰ জন্মৰ পিছত শিৱপ্ৰসাদ ভট্টাচাৰ্যৰ মৃত্যু ঘটে।
ছিৰাজৰ ফাটেমা নামৰ চৰিত্ৰটোত অভিনয় কৰা অনুপমা ভট্টাচাৰ্যই নিমিলা অংক নতুন পৃথিৱী, মানৱ আৰু দানৱ, সৰা পাত, ৰাংধালি, মন আৰু মৰম, বিপ্লৱী আদিকে ধৰি ১৪খনৰো অধিক ছবিত অভিনয় কৰিছিল ।
ছিৰাজ উদুল্লা, কিয়, ভোগজৰা, কাশ্মিৰী কুমাৰী আদি নাটকত তেওঁ কৰা অভিনয়ে সকলোকে আকৰ্ষণ কৰিছিল।
অভিনয় প্ৰতিভাৰ স্বীকৃতি স্বৰূপে অনুপমা ভট্টাচাৰ্যলৈ আগবঢ়োৱা হৈছিল কলাগুৰু বিষ্ণুৰাভা বঁটা, আইদেউ সন্দিকৈ বঁটাকে ধৰি বিভিন্ন বঁটা আৰু সন্মান।
