অভিনেত্ৰী নন্দিনীৰ কাশ্যপৰ তীব্ৰ বেগত গাড়ী চলোৱাৰ চখেই প্ৰাণ ল’লে নেকি পলিটেকনিকৰ ছাত্ৰ ছামিউল হকৰ? এই প্ৰশ্নৰ উত্থাপন হৈছে নন্দিন কাশ্যপৰ বাহনৰ ইতিহাস পোহৰলৈ অহাৰ পিছত।
উল্লেখ কৰাৰ প্ৰয়োজন নাই যে যোৱা ২৫ জুলাইৰ নিশা গুৱাহাটীৰ দক্ষিণগাঁৱৰ সমীপত অভিনেত্ৰী নন্দিনী কাশ্যপে চলাই অহা বলেৰ’ বাহনৰ খুন্দাত আঘাতপ্ৰাপ্ত হৈ ২৯ জুলাই তাৰিখে গুৱাহাটীৰ এপল’ হাস্পাতালত মৃত্যুৰে সৈতে হাৰ মানে ২২ বছৰীয়া ছামিউল হকে।
উল্লেখ্য যে ২৫ তাৰিখে দুৰ্ঘটনা সংঘটিত হোৱাৰ কেইঘন্টামান আগত গুৱাহাটী পৌৰ নিগমত অস্থায়ী কৰ্মচাৰী হিচাপে যোগ কৰিছিল ছামিউলে। দুৰ্ঘটনাৰ পিছত ছামিউলক প্ৰথমে গুৱাহাটী চিকিৎসা মহাবিদ্যালয়ত ভৰ্তি কৰোৱা হৈছিল যদিও স্বাস্থ্যৰ অধিক অৱনতি ঘটাৰ বাবে তেওঁক এপ’ল’ হাস্পাতাললৈ স্থানান্তৰ কৰা হৈছিল। আনহাতে, ছামিউলৰ মৃত্যুৰ পিছত গুৰুতৰ অভিযোগ উত্থাপন হৈছে। ছামিউলৰ পৰিয়ালৰ লোকৰ অভিযোগ অনুসৰি, গুৱাহাটী চিকিৎসা মহাবিদ্যালয়ত সুচিকিৎসা লাভ কৰা নাছিল ছামিউলে। মাত্ৰ ভাগি যোৱা ভৰিত ফিটা বান্ধি হাস্পাতালৰ বিচনাত পেলাই থোৱা হৈছিল। কিন্তু পিছত স্বাস্থ্যৰ অধিক অৱনতি হোৱাত তেওঁক ততাতৈয়াকৈ এপল’ হাস্পাতাললৈ লৈ যায় পৰিয়ালৰ লোকে। কিন্তু চিকিৎসা লাভত পলম হোৱাৰ বাবে চিকিৎসকে প্ৰাণ ৰক্ষা কৰিব নোৱাৰিলে ভুক্তভোগী ছামিউলৰ।
এতিয়া আহো মূল কথালৈ। নন্দিনীৰ কাশ্যপৰ তীব্ৰ বেগত গাড়ী চলোৱাৰ চখেই প্ৰাণ ল’লে নেকি পলিটেকনিকৰ ছাত্ৰ ছামিউল হকৰ? খবৰ অনুসৰি, নন্দিনী কাশ্যপে দুৰ্ঘটনা সংঘটিত কৰা গাড়ীখন হৈছে AS01FM9199 নম্বৰত পঞ্জীয়নকৃত এখন বগা ৰঙৰ বলেৰ’।
নন্দিনী কাশ্যপে দৈনন্দিন ব্যৱহাৰ কৰা এই গাড়ী খনৰ আছে একাধিকবাৰ যান-বাহন আইন উলংঘা কৰাৰ ইতিহাস। ২০১৪ চনৰ মাৰ্চ মাহৰ পৰা ২০২৫ চনৰ ১০ জুনলৈকে মুঠ ৫ বাৰ আইন উলংঘা কৰি তীব্ৰবেগত গাড়ীখন চলোৱাৰ বাবে নন্দিনী কাশ্যপক জৰিমণা বিহিছে পৰিবহন বিভাগে। প্ৰতিবাৰেই ২ হাজাৰ টকাকৈ মুঠ ১০ হাজাৰ টকাৰ অপৰিশোধিত জৰিমণা এতিয়াও আছে নন্দিনী কাশ্যপৰ এই বাহনখনৰ নামত।
২০২৪ চনৰ ১০ মাৰ্চত ব্যস্ত ৰাজপথত, একেটা বৰ্ষতে ১৭ অক্টোবৰত বৰমাত, ২০ মে’ত কাজিৰঙাত আৰু বাগৰিত আৰু ২০২৫ চনৰ ১০ জুনত নলবাৰীত গতিৰ সীমাৰেখা পাৰ কৰি গাড়ী চলোৱাৰ বাবে জৰিমণা লগোৱা হৈছে নন্দিনী কাশ্যপৰ এই বাহনখনৰ ওপৰত। নকলেও হ’ব যে এয়া মাত্ৰ পৰিবহন বিভাগৰ কেমেৰাত ধৰা পৰাৰ তথ্যহে। ধৰা নপৰাকৈ যে বহুবাৰ গতিৰ সীমাৰেখা পাৰ কৰি গাড়ী চলোৱা হৈছে সেয়া সহজেই অনুমেয় । সেয়েহে, প্ৰশ্ন উত্থাপন হৈছে, যান-বাহন আইন ভংগ কৰি তীব্ৰ গতিত গাড়ী চলোৱাটো চখলৈ পৰিণত হৈছিল নেকি নন্দিনী কাশ্যপৰ? অভিযোগ অনুসৰি, ছামিউল হকক খুন্দিওৱাৰ সময়তো নন্দিনী কাশ্যপে তীব্ৰগতিত চলাই আছিল বলেৰ’ বাহনখন।
কেৱল এয়াই নহয়, নন্দিনী কাশ্যপৰ বাহন খনত লাগি আছিল প্ৰেছৰ ষ্টিকাৰ। সেয়েহে, প্ৰশ্ন উত্থাপন হৈছে অভিনেত্ৰী নন্দিনী কাশ্যপ সাংবাদিক আছিল নে অভিনেত্ৰী? সংবাদমাধ্যমত কৰ্মৰত নোহোৱাকৈ কেনেকৈ ব্যক্তিগত বাহনত প্ৰেছৰ ষ্টীকাৰ লগালে নন্দিনীয়ে?
অভিযোগ অনুসৰি, উক্ত দুৰ্ঘটনাৰ পিছত নন্দিনীয়ে কৈছিল যে তেওঁ ছামিউলৰ চিকিৎসাৰ সম্পূৰ্ণ খৰচ বহন কৰিব, মাত্ৰ কথাটো সংবাদ মাধ্যমক জনাব নালাগে। কিন্তু পৰৱৰ্তী সময়ত নন্দিনীয়ে চিকিৎসাৰ খৰচ বহন কৰিবলৈ অস্বীকাৰ কৰে। এফালে চিকিৎসাৰ খৰচ বহন কৰিবলৈ নন্দিনীৰ অস্বীকাৰ আৰু আনফালে গুৱাহাটী চিকিৎসা মহাবিদ্যালয়ত চিকিৎসাৰ গাফিলতি, যাৰ ফলত মাটি বিক্ৰী কৰি ছানিউলক এপল’ হাস্পাতাললৈ নিবলগা হয় পৰিয়ালটোৱে।
ইফালে আৰক্ষীৰ ভূমিকাকলৈও অসন্তুষ্টি প্ৰকাশ কৰিছে ছামিউলৰ পৰিয়ালে। আৰক্ষীয়ে কোনোধৰণৰ সহযোগিতা নকৰাৰ অভিযোগ উত্থাপন কৰি পৰিয়ালটোৱে কয় যে নন্দিনী কাশ্যপে নিজে আহি এবাৰো ছানিউলৰ খবৰ লোৱা নাছিল। দুৰ্ঘটনাৰ পিছত আৰক্ষীয়ে কোনো গোচৰ ৰুজু নকৰিলে আৰু নন্দিনী কাশ্যপৰ স্বাস্থ্য পৰীক্ষা নকৰাকৈ ঘৰলৈ যাবলৈ দিয়ে, আনকি বাহনখনো জব্দ নকৰিলে। ইয়াৰ পিছত সংবাদ মাধ্যমৰ হেঁচাত ২৮ জুলাইত আৰক্ষীয়ে দিছপুৰ থানালৈ মাতি নি সোধপোচ কৰি যাবলৈ দিয়ে। ২৯ জুলাইত ছানিউলৰ মৃ্ত্যুৰ পিছত ৰাইজৰ প্ৰতিক্ৰিয়া তীব্ৰ হৈ উঠাৰ পিছতহে আৰক্ষীয়ে দুৰ্ঘটনা সংঘটিত কৰা বাহনখন জব্দ কৰি নন্দিনী কাশ্যপক গ্ৰেপ্তাৰ কৰে। এতিয়া স্বাভাৱিকতে আৰক্ষীৰ ভূমিকাক লৈ প্ৰশ্নৰ উত্থাপন হৈছে। লগতে প্ৰশ্ন উত্থাপন হৈছে যে নন্দিনী কাশ্যপৰ মূৰৰ ওপৰত কোনো ক্ষমতাধাৰী লোকৰ আাশীৰ্বাদ থকাৰ বাবেই আৰক্ষীয়ে গা এৰা দিছিল নেকি সমগ্ৰ বিষয়টোত।
