শুনি চকু কপালত উঠা ঘটনা! মুম্বাইত ৬ হাজাৰ কেজি ওজনৰ সমগ্ৰ দলংখনেই চুৰি হৈ গ’ল। দেখি মূৰত হাত দিলে নিৰ্মাণ কোম্পানীটোৱে। পশ্চিম চহৰৰ উপকণ্ঠ অঞ্চলৰ বৃহৎ নলাৰ ওপৰত ৯০ ফুট দীঘল এখন অস্থায়ী লোহাৰ দলং স্থাপন কৰা হৈছিল। সেইখন হেনো নিশাৰ ভিতৰতে অদৃশ্য হৈ পৰিল। এই ঘটনাত চাৰিজন লোকক গ্ৰেপ্তাৰ কৰিছে আৰক্ষীয়ে।
এতিয়া প্ৰশ্ন উত্থাপন হৈছে যে ইমান বৃহৎ দলং এখন চুৰি কৰাটো কেনেকৈ সম্ভৱ? অৱশ্যে চুৰি কৰি নিয়া আদানীৰ কোম্পানীয়ে নিৰ্মাণ কৰা দলংখন উদ্ধাৰ কৰা বুলি জানিব পৰা গৈছে।
লগতে পঢ়ক: ‘অশিক্ষিত নেতাই দেশ চলাইছে’; বিতৰ্কিত মন্তব্য কৰি ট্ৰ’ল হোৱাৰ পিছতে স্পষ্টীকৰণ কাজলৰ
বাংগুৰ নগৰ আৰক্ষী থানাই জনোৱা মতে, পশ্চিম মালাডত নিৰ্মাণ কৰা হৈছিল এই দলংখন। বৃহৎ নলাটোৰ এটা ফালৰ পৰা আনটো ফাললৈ বৃহৎ সংখ্যক হাই ভল্টেজৰ বিদ্যুতৰ তাঁৰ কঢ়িয়াই নিব পৰাকৈ এই অস্থায়ী দলংখন নিৰ্মাণ কৰা হৈছিল। কেইমাহ পূৰ্বে যেতিয়া তাত এখন নতুন স্থায়ী দলং নিৰ্মাণ কৰা হ’ল, তেতিয়া অস্থায়ী দলংখন অন্য স্থানলৈ স্থানান্তৰিত কৰা হয়।
যোৱা ২৬ জুনত নিৰ্মাণ কোম্পানীটোৰ লোকে দলংখন চুৰি হোৱা দেখি হতভম্ব হৈ পৰে। তেওঁলোকে লগে লগে আৰক্ষীৰ ওচৰত এজাহাৰ দাখিল কৰে।
তদন্তৰ অন্তত আৰক্ষীয়ে গম পায় যে শেষবাৰৰ বাবে ৬ জুনত দলংখন তাতেই আছিল। তাৰপিছত ক’লৈ গ’ল? অঞ্চলটোৰ চিচিটিভি ফুটেজ পৰীক্ষা কৰি আৰক্ষীয়ে জানিব পাৰে যে যোৱা ১১ জুনত এখন বৃহৎ বাহন দলং এলেকাত অহাযোৱা কৰা দেখা গৈছিল।
লগতে পঢ়ক: পত্নীক ভালপোৱাৰ বাবে সলনি কৰিছিল জাৰ্চি নম্বৰ! কিংবদন্তি ক্ৰিকেটাৰ ৰাহুল দ্ৰাবিড়ৰ প্ৰেম কাহিনী
তদন্তকাৰী দলে জানিব পাৰে যে সেই গাড়ীখনত এটা গেছ কাটিং মেচিন আছিল। যাৰ সহায়ত ডাঠ লোহাৰ পাটবোৰ কাটিছিল। ইয়াৰ পিছতে আৰক্ষীয়ে অভিযুক্ত নিৰ্মাণ কোম্পানীটোৰ এজন শ্ৰমিক আৰু তেওঁৰ চাৰিজন সংগীক গ্ৰেপ্তাৰ কৰে। তেওঁলোকক সোধা-পোছা কৰাৰ অন্তত ইতিমধ্যে উদ্ধাৰ হৈছে চুৰি দলংখন। অৱশ্যে তাৰ অৱস্থা আৰু আগৰ দৰে নাই।
