‘বিজেপি নেতৃত্বাধীন কেন্দ্ৰীয় চৰকাৰৰ শাসনৰ সময়ছোৱাত যদি জনজাতিকৰণ নকৰে তথা অন্যান্য দাবীসমূহ মানি নলয়, তেন্তে আগন্তুক লোকসভা নিৰ্বাচনত আদিবাসী জাতীয় মহাসভাই বিজেপিক ব্ৰহ্মপুত্ৰত দলিয়াই দিম।‘ এই মন্তব্য আদিবাসী সুৰক্ষা সমিতিৰ কেন্দ্ৰীয় সভাপতি বলদেব তেলীৰ।
আজি আদিবাসী জাতীয় মহাসভাৰ উদ্যোগত আদিবাসী জাতীয় মহাসভাৰ অন্তৰ্ভুক্ত সংগঠন আদিবাসী সুৰক্ষা সমিতিয়ে দিনৰ ১১ বজাৰ পৰা বিয়লি ৪ বজালৈ গুৱাহাটীৰ লক্ষীধৰ বৰা ক্ষেত্ৰত এক অৱস্থান ধৰ্মঘট কাৰ্য্যসূচী গ্ৰহণ কৰে। লগতে তেওঁলোকৰ দাবী পূৰণ নকৰাৰ বাবে নাগাৰা বাদনেৰেও প্ৰতিবাদ সাব্যস্ত কৰে।
আজি ধৰ্মঘটস্থলীৰ পৰাই বিগত কংগ্ৰেছ চৰকাৰৰ দিনতে সমাধান কৰিব নোৱাৰা জনজাতিকৰণৰ সমস্যাটো সমাধান কৰাৰ প্ৰতিশ্ৰুতি দি শাসনলৈ অহা বিপেজি চৰকাৰৰ দিনত ই এক প্ৰহসনত পৰিণত হোৱা বুলি উল্লেখ কৰে আদিবাসী জাতীয় মহাসভাই।
আদিবাসী সুৰক্ষা সমিতিৰ কেন্দ্ৰীয় সভাপতিগৰাকীয়ে নৰ্থ ইষ্ট নাওৰ আগত ক্ষোভ উজাৰি বিজেপি নেতৃত্বাধীন কেন্দ্ৰীয় তথা ৰাজ্য চৰকাৰখনে আদিবাসীসকলক চূড়ান্ত অৱহেলা কৰি অহা বুলি কয়।
তাৰোপৰি সভাপতি গাৰকীয়ে কয় যে ‘ৰাজ্যৰ বিজেপি চৰকাৰখনে নিৰ্বাচনৰ পূৰ্বে কৈছিল যে চৰকাৰ পৰিৱৰ্তন হ’লে ৬ মাহৰ ভিতৰত ৬ জনগোষ্ঠীক জনজাতিকৰণ কৰিব। কেন্দ্ৰীয় চৰকাৰেও লোকসভা নিৰ্বাচনৰ পূৰ্বে সেই একে প্ৰতিশ্ৰুতিয়েই প্ৰদান কৰিছিল যদিও সময় উকলি যাবৰ হ’ল, কিন্তু আদিবাসীসকলৰ সমস্যাসমূহ সমাধান কৰিব নোৱাৰিলে।‘
লগতে সভাপতি গৰাকীয়ে ডনাৰ মন্ত্ৰী জিতেন্দ্ৰ সিঙে অসমৰ পৰা আলোচনাৰ বাবে অহা সংগঠনৰ নেতা সকলে কেৱল ফটো উঠিবৰ বাবেহে অহা বুলি কোৱা বুলি এক গুৰুতৰ অভিযোগ উত্থাপন কৰে।
আনকি দিল্লীলৈ আলোচনাৰ বাবে জনগোষ্ঠীয় নেতাসকলক মাতি নি একপ্ৰকাৰৰ ভেকো-ভাওনা কৰে বুলিও গুৰুতৰ অভিযোগ তুলি আদিবাসী জাতীয় মহাসভাই ‘বিজেপি নেতৃত্বাধীন কেন্দ্ৰীয় চৰকাৰ অসমৰ সংগঠনসমূহৰ পক্ষত নাই’ বুলি আজিৰ প্ৰতিবাদস্থলীত উল্লেখ কৰে।
আজি ধৰ্মঘটস্থলীতে জনজাতিকৰণৰ অন্তৰ্ভুক্ত হোৱাটো আদিবাসীসকলৰ জন্মগত অধিকাৰ বুলি দাবী কৰি বলদেৱ তেলীয়ে আদিবাসী চাহ শ্ৰমিকসকলক ভূমি পট্টা প্ৰদান কৰাৰ উপৰিও বেআইনীভাৱে দখল কৰা আদিবাসীসকলৰ ভূমি পট্টা ঘূৰাই দিয়াৰ বাবে দাবী জনায়।
তাৰোপৰি আদিবাসী জাতীয় মহাসভাৰ আন আন দাবীসমূহ হ’ল ক্ৰমে ‘আদিবাসী বিদ্ৰোহী সংগঠনসমূহৰ দাবীসমূহ ৰাজনৈতিক আলোচনাৰ মাজেৰে সমাধান কৰা, অসমত চাহ জনগোষ্ঠী নামটো সলনি কৰি আদিবাসী নামেৰে নামাকৰণ কৰা আৰু উচ্ছেদিত আদিবাসী কৃষকসকলক ভূমি আবণ্টন দি পুনৰ সংস্থাপন কৰা’ আদি।