অসম চুক্তিৰ ৬ নং দফা কাৰ্য্যকৰীকৰণৰ বাবে দিহা-পৰামৰ্শসহ প্ৰতিবেদন প্ৰস্তুতৰ বাবে গঠিত উচ্চ স্তৰীয় সমিতিৰ আগত আজি নিজৰ দৃষ্টিকোণ দাঙি ধৰিলে উচ্চ ন্যায়ালয়ৰ জ্যেষ্ঠ অধিবক্তা নেকিবুৰ জামানে।
মত দাঙি ধৰিবলৈ তেওঁক আজি সমিতিখনে নিমন্ত্ৰণ কৰিছিল বুলি সংবাদ মাধ্যমক জানিবলৈ দিয়ে।
সমিতিক সাক্ষাৎ কৰাৰ সময়ত তেওঁ থলুৱা মুছলমানসকলক আন মুছলমানৰ পৰা সুকীয়া ধৰণে বিবেচনা কৰাৰ পৰামৰ্শ আগ বঢ়ায়।
গৰীয়া, মৰীয়া, দেশী, জোলহা, মাইমাল, কাছাৰী মুছলিম, পাংগাল এইসকলক খিলঞ্জীয়া মুছলমান আখ্যা দি তেওঁ এওঁলোকক আন মুছলমানৰ পৰা এটা পৃথক জনগোষ্ঠীৰ মৰ্য্যাদা প্ৰদান কৰিবলৈ আহ্বান জনায়।
নিজৰ যুক্তিৰ সমৰ্থনত সংবাদ মাধ্যমৰ আগত জামানে কয়, “ধৰ্মীয়ভাৱে একাকাৰ কৰি থোৱা বাবে, মুছলমান বুলি কৈ থোৱা বাবে আমি সকলো অধিকাৰৰ পৰা বঞ্চিত হৈছো। কেন্দ্ৰীয় চৰকাৰ, ৰাজ্য চৰকাৰৰ যিমান অনুদান, অনুমোদন আহে, সেইবিলাকৰ পৰা আমি বঞ্চিত হৈছো, আমাৰ ৰাজনৈতিক প্ৰতিনিধি নাই। সেয়ে কমিশ্যনৰ আগত আমি আহ্বান জনাইছো, আমাক, অৰ্থাৎ এই গোষ্ঠীকেইটাক এটা সুকীয়া জনগোষ্ঠীয় মৰ্য্যাদা দিব লাগে।”
জামানে এই জনগোষ্ঠীকেইটাৰ লোকপিয়লৰ ব্যৱস্থা কৰিব লাগে বুলিও দাবী কৰে।
ৱাকফ ব’ৰ্ডৰ সম্পত্তিবোৰ খিলঞ্জীয়া মুছলমানৰ সম্পত্তি বুলি দাবী কৰি জামানে এইবোৰৰ নিয়ন্ত্ৰণ কিন্তু খিলঞ্জীয়া মুছলমানৰ হাতত নাই বুলি মন্তব্য কৰে।
“ৱাকফ ব’ৰ্ডৰ সম্পত্তিবোৰৰ পৰা বছৰি ২-৩ হাজাৰ কোটি টকা আয় হ’ব লাগে, যদিও ৩৫-৪০ হাজাৰ আয় হৈ আছে।”, ৱাকফ ব’ৰ্ডৰ সম্পত্তিৰ ক্ষেত্ৰত দুৰ্নীতিৰ ইংগিত দি জামানৰ মন্তব্য।
তেওঁ লগতে কয়, “আমি মাইনৰিটি পৰিচয় বিচৰা নাই, আমাক এটা সুকীয়া জনগোষ্ঠীৰ মৰ্য্যাদাৰ বাবে দাবী উত্থাপন কৰিছো”।
তেওঁ থলুৱা মুছলমান সকলো প্ৰকাৰৰ চৰকাৰী আঁচনিৰ পৰা বঞ্চিত হৈ আহিছে বুলি কমিটীক জানিবলৈ দিয়া বুলি সংবাদ মাধ্যমক কয়।
উল্লেখ কৰিব পাৰি, যোৱা লোকসভা নিৰ্বাচনৰ পূৰ্বে কেন্দ্ৰীয় চৰকাৰে ততাতৈয়াকৈ অসম চুক্তিৰ ৬ নং দফা কাৰ্য্যকৰীকৰণৰ বাবে প্ৰতিবেদন প্ৰস্তুত কৰিবলৈ এখন উচ্চ স্তৰীয় সমিতি গঠন কৰি দিছিল যদিও কমিটীত অন্তৰ্ভুক্ত কৰা কোনোজনেই চৰকাৰৰ সেই ৰাজনৈতিক অংকৰ “ফিগাৰ” হ’ব নিবিচৰাত সেই সমিতিৰ আপোনা-আপুনি অপমৃত্যু ঘটিছিল।
ইয়াৰ পিছত যোৱা ১৬ জুলাইত গঠন কৰে এখন নতুন সমিতি। গুৱাহাটী উচ্চ ন্যায়ালয়ৰ অৱসৰপ্ৰাপ্ত ন্যায়াধীশ বিপ্লৱ কুমাৰ শৰ্মাক অধ্যক্ষ হিচাপে দায়িত্ব অৰ্পন কৰা হৈছে এই নতুন সমিতিখনৰ।
৬ মাহৰ ভিতৰত প্ৰতিবেদন দাখিল কৰিব লগীয়া সমতিখনে ৰাজ্যৰ বিভিন্ন ক্ষেত্ৰৰ দল-সংগঠন আৰু ব্যক্তিৰ মত গ্ৰহণ কৰি আছে।
