বিগত ৪-৫ মাহ ধৰি মহানগৰীৰ বহুকেইটা এটিএমত ১০০-২০০ টকীয়া নোটৰ অভাৱে মহানগৰবাসীক বিপাঙত পেলাইছে। ফলত মহানগৰৰ সাধাৰণ শ্ৰেণীৰ লোকসকলৰ মাজত হাহাকাৰ পৰিস্থিতিৰো সৃষ্টি হোৱা দেখিবলৈ পোৱা গৈছে।
মহানগৰীৰ বহুকেইটা এটিএমত বৰ্তমান ৫০০-২০০০ টকীয়া নোটহে উপলদ্ধ, যাৰ বাবে মহানগৰবাসী খুচুৰা ধনৰ অভাৱত ভুগিছে। মহানগৰীৰ বিভিন্ন সমস্যাৰ মাজত বৰ্তমান এটিএমত ১০০-২০০ টকীয়া নোটৰ অভাৱে সাধাৰণ শ্ৰেণীৰ মাজত এক নতুন সমস্যা হিচাপে দেখা দিছে।
উল্লেখযোগ্য যে বিমুদ্ৰাকৰণৰ পাছতেই এটিএমসমূহত ধনৰ অভাৱ হোৱাৰ লগতে ৰাজ্যৰ জনসাধাৰণৰ মাজত খুচুৰাৰ নাটনি হৈছিল। সেয়েহে বিমুদ্ৰাকৰণৰ প্ৰভাৱতে এনেদৰে এটিএমসমূহত ১০০-২০০ টকীয়া নোটৰ অভাৱ ঘটা বুলি একাংশ সচেতন মহলে সন্দেহ প্ৰকাশ কৰিছে।
আনহাতে বেংকসমূহত বিশেষকৈ ভাৰতীয় ষ্টেট বেংকত জাননীৰ আকাৰত এখন ফলক আঁৰি থোৱা দেখিবলৈ পোৱা যায় যে ‘১০০ টকাৰ পৰা ২৫০০০ টকালৈকে এটিএমৰ জৰিয়তে লেনদেন কৰক।’ তেনে পৰিপ্ৰেক্ষিতত এটিএমত ১০০-২০০ টকীয়া নোটৰ অভাৱক কেন্দ্ৰ কৰি গ্ৰাহকসকলৰ মাজত ব্যাপক প্ৰতিক্ৰিয়াৰ সৃষ্টি হৈছে।
লগতে কিছুসংখ্যক ভুক্তভোগী গ্ৰাহকে প্ৰশ্ন কৰে যে জৰুৰীকালীন অৱস্থাত যদি ১০০-২০০ টকীয়া নোট নাপায় বা এটি এমত ধনৰ অভাৱ ঘটে, তেন্তে ২৪*৭ এটি এম খোলা ৰখাৰ কি প্ৰয়োজন আছে?
এই সম্পৰ্কত মহেন্দ্ৰ দাস নামৰ এগৰাকী এটিএমৰ গ্ৰাহকে নৰ্থ ইষ্ট নাওক কয় ‘বিমুদ্ৰাকৰণৰ বাবেই এটি এমত ১০০-২০০ টকীয়া নোটৰ অভাব ঘটিছে।’
তেওঁ লগতে কয় ‘অভিজাত শ্ৰেণীৰ মানুহৰ ১০০-২০০ টকীয়া নোটৰ বৰ বিশেষ প্ৰয়োজন নহয়। কিন্তু আমাৰ দৰে সাধাৰণ শ্ৰেণীৰ লোকসকলৰ এনেদৰে খুচুৰা পইচা নাথাকিলে চলিবলৈ বহু অসুবিধা হয়।’
আনহাতে, আন এগৰাকী এটি এম গ্ৰাহক কুলদ্বীপ ইইকীয়াই এই বিষয়ত প্ৰতিক্ৰিয়া প্ৰকাশ কৰে এইদৰে ‘সৰ্ব সাধাৰণ মানুহে যদি এটিএমত গৈ বাৰেপতি ৫০০ অথবা ২০০০ টকীয়া নোট উলিয়াই থাকিবলগীয়া হয়, তেনেক্ষেত্ৰত যদি তেওঁৰ আয় ৬০০০ বা ৭০০০ টকা হয়, তেন্তে তেওঁৰ জমাধনসমূহ সোনকালেই শেষ হৈ যাব। কাৰণ ধন হাতত বেছিসময় নাথাকে।’
উল্লেখযোগ্য যে আমি লগ পোৱা বহুকেইজন সাধাৰণ শ্ৰেণীৰ ৰাইজে ৰিক্সাৱালা অথবা অন্যান্য বাহনক ভাড়া দিওঁতে খুচুৰাৰ অভাৱ হোৱা বুলি আমাক জনায়। এইদৰেই খুচুৰাৰ অভাৱে জুৰুলা ভুগাইছে মহানগৰবাসীক।
ইফালে ৰাজ্যখনৰ ভিন্ন প্ৰান্তৰ এটিএমসমূহতো ১০০-২০০ টকীয়া নোটৰ অভাৱ হোৱা বুলি জানিব পৰা গৈছে।
এইক্ষেত্ৰত বেংক কৰ্তৃপক্ষ অথবা চৰকাৰক এটিএমত ১০০-২০০ টকাৰ নোটৰ নাটনিৰ সমস্যাটো অতি শীঘ্ৰে সমাধান কৰাৰ বাবে দাবী জনায় ভুক্তভোগী জনসাধাৰণে।
