চুবুৰীয়া ৰাষ্ট্ৰ বাংলাদেশৰ অনুপ্ৰৱেশকাৰীয়ে জুৰুলা কৰা অসমত এইবাৰ আটক হ’ল অবৈধভাৱে বসবাস কৰি থকা আফগানিস্তানৰ নাগৰিক। সোমবাৰে কৰিমগঞ্জ জিলাৰ পাথাৰকান্দি চহৰৰ মাজমজিয়াত এখন ঘৰৰ পৰা আৰক্ষীয়ে দুজন আফগান নাগৰিকক আটক কৰাৰ পাছতে এই ঘটনা পোহৰলৈ আহিছে।
আটকাধীন আফগান নাগৰিক দুজনৰ এজনৰ নাম বাহাদুৰ খান আৰু আনজন শেৰ খান বুলি আৰক্ষীৰ আগত প্ৰকাশ কৰে।
আৰক্ষীয়ে অনুসন্ধানত লোক দুজনৰ পৰা বহু আপত্তিজনক নথিপত্ৰ জব্দ কৰে। ইয়াৰ ভিতৰত আছে দুখন ম্যাদ উকলা পাছপ’ৰ্ট, ভোটাৰ আই ডি কাৰ্ড, বেংকৰ পাছবুকৰ লগতে আধাৰ কাৰ্ড।
উল্লেখ্য যে আফগানিস্তানৰ নাগৰিক দুজনে বৈধভাৱে ভাৰতত প্ৰৱেশ কৰিছিল কিন্তু ২০১৭ চনত তেওঁলোকৰ ভিছাৰ ম্যাদ উকলি যায়। তাৰ পিছৰে পৰা লোক দুজনে পাথাৰকান্দি চহৰৰ মফিজুল হক তাপাদাৰ নামৰ এজন ব্যক্তিৰ ঘৰত ভাড়া থাকি সুদৰ ৰমৰমীয়া ব্যৱসায় চলাই আহিছিল।
অৱশেষত আৰক্ষীয়ে এক বিশেষ সূত্ৰৰ পৰা লাভ কৰা তথ্যৰ ভিত্তিত অভিযান চলাই দুয়োজনকে আটক কৰিবলৈ সক্ষম হয়। সম্প্ৰতি পাথাৰকান্দি আৰক্ষীয়ে ধৃত দুয়োজনকে সোধা পোচা কৰি আছে।