পাঁচ বছৰৰ আগতে কোভিড-১৯ মহামাৰী আৰম্ভ হোৱাৰ পিছত চীনত পুনৰ নতুন ভাইৰাছৰ প্ৰাদুৰ্ভাৱ! এইবাৰ এই ভাবুকিৰ নাম হিউমেন মেটাপনিউমোভাইৰাছ (HMPV)। সূত্ৰসমূহৰ পৰা জানিব পৰা মতে, এই ভাইৰাছ দ্ৰুতগতিত বিয়পি পৰাৰ ফলত মানুহৰ মাজত ফ্লুৰ দৰে আৰু কোভিড-১৯ৰ দৰে লক্ষণ দেখা দিছে।
অৱশ্যে আশা কৰা মতেই বেইজিঙে এই সন্দৰ্ভত এতিয়ালৈকে কোনো আনুষ্ঠানিক বিবৃতি দিয়া নাই। কিন্তু চীনৰ পৰা বিয়পি পৰা কৰ’না ভাইৰাছৰ স্মৃতি এতিয়াও সমগ্ৰ বিশ্বতে সতেজ হৈ আছে। সেয়ে, আতংক আৰু উৰাবাতৰি দুয়োটা দ্ৰুতগতিত বিয়পি পৰিছে।
ছ’চিয়েল মিডিয়া আৰু বিভিন্ন বাতৰিত দাবী কৰা হৈছে যে চীনত মৃত্যু মিছিল আৰম্ভ হৈছে, যাৰ ফলত চিকিৎসালয় আৰু শ্মশানৰ ওপৰত চাপ পৰিছে। বিভিন্ন ভিডিঅ’ত চিকিৎসালয়সমূহত অতিমাত্ৰা ভিৰ দেখা গৈছে।
ইয়াৰ লগতে ইনফ্লুৱেঞ্জা এ, এইচ এম পি ভি, মাইকোপ্লাজমা নিউমোনিয়া আৰু কোভিড-১৯ মাল্টি ভাইৰাছ সংক্ৰমণ একেলগে বৃদ্ধি পাইছে। চীনে জৰুৰীকালীন অৱস্থা ঘোষণা কৰা বুলিও একাংশ সূত্ৰই দাবী কৰিছে। যদিও আনুষ্ঠানিকভাৱে এতিয়াও জানিব পৰা হোৱা নাই।
চিকিৎসকে কয় যে এইচ এম পি ভিৰ ফলত সাধাৰণতে কৰ’না ভাইৰাছৰ দৰে চৰ্দিৰ নিচিনা লক্ষণ দেখা দিয়ে। অৱশ্যে কিছুমান ক্ষেত্ৰত লক্ষণসমূহ কোভিড-১৯ৰ দৰে ভয়াৱহ হ’ব পাৰে।
ৰয়টাৰৰ এক প্ৰতিবেদন অনুসৰি চীনৰ ৰোগ নিয়ন্ত্ৰণ কৰ্তৃপক্ষই ইতিমধ্যে নিউমোনিয়াক সংক্ৰামক ৰোগ হিচাপে চিনাক্ত কৰিছে, যাৰ উৎস জানিব পৰা হোৱা নাই। ইয়াৰ বাবে পাইলট নিৰীক্ষণ ব্যৱস্থাও আৰম্ভ কৰা হৈছে। প্ৰাথমিকভাৱে জানিব পৰা মতে, শীতকালত শ্বাস-প্ৰশ্বাসজনিত ৰোগৰ সংখ্যা বৃদ্ধি পাব পাৰে বুলি শংকাৰ বাবেই এই পদক্ষেপ গ্ৰহণ কৰা হৈছে।
চীনৰ ৰাষ্ট্ৰীয় ৰোগ নিয়ন্ত্ৰণ আৰু প্ৰতিৰোধ কৰ্তৃপক্ষই জনোৱা মতে, লেব আৰু ৰোগ নিয়ন্ত্ৰণ সংস্থাসমূহৰ বাবে বিশেষ প্ৰতিবেদন আৰু পৰীক্ষণ প্ৰক্ৰিয়া আৰম্ভ কৰা হ’ব।
জনা গৈছে যে ১৬ ডিচেম্বৰৰ পৰা ২২ ডিচেম্বৰৰ ভিতৰত তীব্ৰ শ্বাস-প্ৰশ্বাসজনিত ৰোগৰ সংখ্যা বৃদ্ধি পায়। বিশেষকৈ ১৪ বছৰৰ তলৰ শিশুৰ মাজত এইচ এম পি ভি সংক্ৰমণ বৃদ্ধি পাইছে। এই ধাৰা চীনৰ উত্তৰ অংশত অধিক লক্ষ্য কৰা হৈছে।
সেই স্থানত থকা স্বাস্থ্য বিশেষজ্ঞসকলে জনায় যে এইচ এম পি ভিৰ বিৰুদ্ধে মোকাবিলাত এন্টিভাইৰেল ঔষধ ব্যৱহাৰত সাৱধান থাকিব লাগে, কিয়নো এতিয়াও এই ভাইৰাছৰ ভেকচিন নাই।
