ৰঞ্জীৰ প্ৰস্তুতিঃ ৰাহানেৰ পিছত এইবাৰ উপেক্ষিত পূজাৰাৰ পোষ্ট, উৎসুক অনুৰাগী
ভাৰত-দক্ষিণ আফ্ৰিকা টেষ্ট শৃংখলাৰ প্ৰথমখন টেষ্টত ইতিমধ্যে শোচনীয় পৰাজয়বৰণ কৰিছে ভ্ৰমণকাৰী ভাৰতে। ভাৰতৰ এই পৰাজয়ৰ পাছতে ক্ৰিকেট বিশেষজ্ঞ তথা অনুৰাগীসকলে হতাশা প্ৰকাশ কৰিছে। মূলতঃ শৃংখলাটোৰ বাবে দল নিৰ্বাচনক লৈ উঠিছে প্ৰশ্ন।
বিশেষকৈ দুই তেষ্ট বিশেষজ্ঞ আজিংক্যা ৰাহানে আৰু চেটেশ্বৰ পূজাৰাক দলত স্থান নিদিয়াক লৈ যথেষ্ট বিতৰ্কৰ সৃষ্টি হৈছে। দক্ষিণ আফ্ৰিকাৰ বাউন্সী উইকেটত এই দুই অভিজ্ঞ তাৰকাৰ স্থানত যুৱ খেলুৱৈক প্ৰাধান্য দিয়াক লৈ বিশেষজ্ঞসকলে শংকা প্ৰকাশ কৰিছিল।
এই শংকা যে অমূলক নাছিল ভাৰতৰ কালিৰ পৰাজয়ে সেয়া প্ৰমাণ কৰিলে। এই পৰাজয়ৰ পিছত দলৰ পৰা ৰাহানে-পূজাৰাক বাদ দিয়া বিষয়টোৱে পুনৰ চৰ্চা লাভ কৰিছে।
বিগত দুবাৰৰ বিশ্ব টেষ্ট চেম্পিয়নশ্বিপৰ ফাইনেলত ধাৰাবাহিকভাৱে প্ৰৱেশ কৰিছে ভাৰতে। অৱশ্যে দুয়োবাৰেই ৰানাৰ্ছ আপতে সন্তুষ্ট থাকিবলগীয়া হৈছে ভাৰতীয় দল। আনহাতে চলিত বিশ্ব টেষ্ট চেম্পিয়নশ্বিপ (২০২৩-২০২৫)ত কালিৰ শোচনীয় পৰাজয়ৰ ফলত ভাৰত এতিয়া পঞ্চম স্থানলৈ অৱনমিত হৈছে।
সেয়ে দলত ৰাহানে আৰু পূজাৰাৰ দৰে অভিজ্ঞ বেটাৰৰ অনুপস্থিতিত আশ্চৰ্য প্ৰকাশ কৰিছে সকলোৱে। ভাৰত এতিয়া দক্ষিণ আফ্ৰিকা শৃংখলাত ব্যস্ত থকাৰ বিপৰীতে ৰাহানে-পূজাৰা ব্যস্ত দেশৰ মাটিত বেটিং অনুশীলনত।
দক্ষিণ আফ্ৰিকা ভ্ৰমণলৈ নিৰ্বাচিত নোহোৱাৰ বাবে দুয়োগৰাকী তাৰকা বেটাৰ এতিয়া ৰঞ্জি ট্ৰফীৰ বাবে প্ৰস্তুতি আৰম্ভ কৰিছে। এই অনুশীলনৰ পৰাই কালি এক ভিডিঅ’ পোষ্ট কৰিছিল ৰাহানেই। তাৰকা বেটাৰগৰাকীয়ে পোষ্টটোৰ লগত লিখিছিল, ‘বিশ্ৰামৰ সময় নাই।’
No rest days 🏏 pic.twitter.com/EM218MqMhK
— Ajinkya Rahane (@ajinkyarahane88) December 29, 2023
আজিংক্যা ৰাহানেৰ এক ভিডিঅ’ই সকলোৰে দৃষ্টি আকৰ্ষণ কৰিছিল। ৰাহানেৰ পিছতে আজি পূজাৰায়ো সামাজিক মাধ্যমত অনুৰূপ এক পোষ্ট কৰ। পোষ্টটোত বেটিং অনুশীলনৰ এটা ভিডিঅ’দি কেপচনত লিখা, “ৰঞ্জী ট্ৰফী প্ৰিপাৰেচন মোড”।
Ranji Trophy prep mode: 🔛 pic.twitter.com/kFN3PyvTHx
— Cheteshwar Pujara (@cheteshwar1) December 30, 2023
ৰাহানেৰ দৰে পূজাৰাৰ পোষ্টটোৱেও ব্যাপক চৰ্চা লাভ কৰে। নিশ্চিতভাৱে ৰাহানে আৰু পূজাৰা টেষ্ট ফৰ্মেটত দীৰ্ঘদিন ধৰি ভাৰতীয় বেটিং লাইন আপৰ নিৰ্ভৰযোজ্ঞ বেটাৰ হিচাপে পৰিগণিত হৈ আহিছে। কিন্তু দক্ষিণ আফ্ৰিকা ভ্ৰমণৰ পৰা দুয়ো বাদ পৰাৰ পিছতে প্ৰশ্ন উদয় হৈছিল, সমাপ্তি ঘটিল নেকি দুই তাৰকাৰ কেৰিয়াৰ!
কিন্তু দক্ষিণ আফ্ৰিকাৰ বিপক্ষে চেঞ্চুৰিয়ান টেষ্টত হতাশাজনক পৰাজয়ৰ পিছত ভাৰতীয় দলত ক্ৰিকেট বিশেষজ্ঞ তথা অনুৰাগীসকলে পুনৰ ৰাহানে আৰু পূজাৰাৰ প্ৰয়োজনীয়তাক লৈ মুখৰ হৈ পৰিছে।