শেহতীয়াভাৱে মুখ্য মন্ত্ৰী সৰ্বানন্দ সোনোৱালে ৰাজ্যত চলি থকা ছিণ্ডিকেট সন্দৰ্ভত কঠোৰ স্থিতি গ্ৰহণ কৰাৰ ঘোষণা কৰিছে। ছিণ্ডিকেটৰ লগত জড়িত যিকোনো ব্যক্তি বা গোটৰ বিৰুদ্ধে কঠোৰ ব্যৱস্থা লোৱাৰ লগতে গ্ৰেপ্তাৰ পৰ্যন্ত কৰিবলৈ নিৰ্দেশ দিছে আৰক্ষী সঞ্চালক প্ৰধানক।
কিন্তু মুখ্য মন্ত্ৰীৰ এই নিৰ্দেশৰ পিছত দীৰ্ঘদিন ধৰি শিৱসাগৰৰ অ’ এন জি চিত চলি থকা ছিণ্ডিকেট এতিয়া বন্ধ হ’বনে বা এইক্ষেত্ৰত শিৱসাগৰ আৰক্ষীয়ে কেনেধৰণৰ ব্যৱস্থা লয় তাক লৈ জিলাখনৰ সচেতন ৰাইজৰ মাজত সৰব চৰ্চা চলিছে।
উল্লেখযোগ্য যে বিগত কেইবা বছৰ ধৰি শিৱসাগৰ অ’ এন জি চিত লোহা, কেমিকেলকে ধৰি ঠিকা কামৰ এক বৃহৎ ছিণ্ডিকেট গঢ়ি উঠিছে। যিকোনো ধৰণৰ ঠিকা কামৰ নিবিদাত অংশগ্ৰহণ কৰিবলৈ হ’লে ঠিকাদাৰসকলে উক্ত ছিণ্ডিকেট চক্ৰটোৱে গঠন কৰি দিয়া এখন কমিটিৰ অনুমোদন ল’বলৈ বাধ্য।
অভিযোগ মতে চক্ৰটোৱে ১০ শতাংশ কমিছন দিয়া লোককহে নিবিদাত অংশগ্ৰহণ কৰিবলৈ দিয়াৰ লগতে কোনটো কাম কোনজন ঠিকাদাৰে লাভ কৰিব সেইয়াও নিদ্ধাৰণ কৰি দিয়ে। উল্লেখযোগ্য যে শিৱসাগৰৰ বিভিন্ন তৈলক্ষেত্ৰত বছৰি কেইবা হাজাৰ কোটি টকাৰ কামৰ নিবিদা আহ্বান কৰা হয়। প্ৰতিটো কামৰ বিপৰীতে ১০ শতাংশ কমিছনৰ নামত ছিণ্ডিকেট চক্ৰটোৱে কেইবাশ কোটি টকা সংগ্ৰহ কৰি আহিছে।
তাৎপৰ্যপূৰ্ণভাৱে নিবিদা প্ৰক্ৰিয়াৰ দায়িত্বত থকা অ’ এন জি চিৰ চিভিল বিভাগৰ চকুৰ সন্মুখতেই চলি থকা এই অন্যায় অনিয়ম দেখিও বিভাগটোৱে নিৰৱ ভূমিকা পালন কৰি আহিছে। অভিযোগ মতে চিভিল বিভাগৰ একাংশ বিষয়া-কৰ্মচাৰীৰ সৈতে ছিণ্ডিকেট চক্ৰটোৰ গোপন বুজাবুজি আছে।
আনহাতে ছিণ্ডিকেট চক্ৰৰ ভাবুকি নামানি একাংশ নিবনুৱা যুৱকে ঠিকা কামৰ নিবিদা দাখিল কৰিবলৈ গৈ চক্ৰটোৰ আক্ৰমণৰ বলি হ’বলগীয়া হোৱা বহুকেইটা ঘটনা সংঘটিত হৈছে। এনে ঘটনাৰ ভুক্তভোগীয়ে ছিণ্ডিকেট চক্ৰৰ বিৰুদ্ধে শিৱসাগৰ থানাত এজাহাৰ দাখিল কৰিছিল যদিও আৰক্ষীয়ে কোনো ধৰণৰ ব্যৱস্থা গ্ৰহণ নকৰাৰ অভিযোগ আছে। একাংশ ঠিকাদাৰৰ অভিযোগ মতে ছিণ্ডিকেট বাহিনীৰ লগত একাংশ ৰাজনৈতিক নেতা, জাতীয় সংগঠনৰ দুই এক নেতা, অ’ এন জি চিৰ বহু বিষয়া কৰ্মচাৰী জড়িত থকাৰ বাবেই তেওঁলোকে মুকলিকৈ চলাই গৈছে ছিণ্ডিকেট।
এতিয়া প্ৰশ্ন হয় ছিণ্ডিকেটৰ বিৰুদ্ধে মুখ্য মন্ত্ৰীয়ে কঠোৰ ব্যৱস্থা গ্ৰহণৰ নিৰ্দেশ দিয়াৰ পাছত শিৱসাগৰ আৰক্ষীয়ে এইক্ষেত্ৰত কি ব্যৱস্থা গ্ৰহণ কৰিব। উৎখাত হ’বনে নিবিদা বাকচৰ সন্মুখত থকা অবৈধ ছিণ্ডিকেটৰ কাৰ্যালয়? পূৰ্বে ছিণ্ডিকেট চক্ৰই মাৰপিত কৰা ঠিকাদাৰ সকলে দিয়া এজাহাৰৰ ভিত্তিত গ্ৰেপ্তাৰ কৰিবনে ছিণ্ডকেট চক্ৰৰ নেতা-পালিনেতাক? নে পুনৰ আগৰ দৰে দেখিও নেদেখাৰ ভাও ধৰি ছিণ্ডিকেট চলাই যাবলৈ দিব?
