অসম চৰকাৰে স্নাতক আৰু স্নাতকোত্তৰ পৰ্যায়ত অধ্যয়ন কৰি থকা ছাত্ৰসকলৰ বাবে ‘মুখ্যমন্ত্ৰীৰ নিযুত বাবু আঁচনি’ নামৰ এক বিশেষ জলপানী আঁচনি আৰম্ভ কৰিছে। যোৱা ১ জানুৱাৰীত মুখ্যমন্ত্ৰী ডঃ হিমন্ত বিশ্ব শৰ্মাই ঘোষণা কৰা এই আঁচনিখনৰ বাবে শিক্ষা মন্ত্ৰী ৰণোজ পেগুৱে মঙলবাৰে সমৰ্থ প’ৰ্টেলৰ জৰিয়তে আবেদন আহ্বান জনাইছে। এই আঁচনিৰ অধীনত স্নাতক মহলাৰ ছাত্ৰসকলে বছৰি ১০ হাজাৰ টকা আৰু স্নাতকোত্তৰ মহলাৰ ছাত্ৰসকলে বছৰি ২০ হাজাৰ টকাকৈ সাহায্য লাভ কৰিব।
আঁচনিখনৰ সুবিধা ল’বলৈ ছাত্ৰজন অসমৰ স্থায়ী বাসিন্দা হোৱাৰ লগতে তেওঁৰ পৰিয়ালৰ বাৰ্ষিক আয় ৪ লাখ টকাতকৈ কম হ’ব লাগিব। কেৱল স্নাতক আৰু স্নাতকোত্তৰ প্ৰথম বৰ্ষৰ নিয়মীয়া ছাত্ৰসকলেহে ইয়াৰ বাবে আবেদন কৰিব পাৰিব। অৱশ্যে বিবাহিত স্নাতক ছাত্ৰ, বাণীকান্ত কাকতি মেধা বঁটাৰ স্কুটাৰ লাভ কৰা শিক্ষাৰ্থী আৰু মুখ্যমন্ত্ৰীৰ জীৱন প্ৰেৰণা আঁচনিৰ সুবিধা ভোগ কৰা স্নাতকোত্তৰ শিক্ষাৰ্থীসকল এই আঁচনিৰ বাবে যোগ্য নহয়।
উচ্চ শিক্ষাৰ ক্ষেত্ৰত ছাত্ৰসকলক আৰ্থিক সকাহ দিয়া আৰু আধাতে পঢ়া এৰা সমস্যা ৰোধ কৰাই এই আঁচনিৰ মূল লক্ষ্য। চৰকাৰে জানিবলৈ দিয়া মতে, এই সুবিধা লাভ কৰিবলৈ ছাত্ৰসকলে শিক্ষানুষ্ঠানত নিয়মীয়া উপস্থিতিৰ লগতে উন্নত চৰিত্ৰ আৰু শৃংখলাবদ্ধতা বজাই ৰাখিব লাগিব। ৰেগিং বা অনুশাসনহীনতাৰ দৰে ঘটনাত জড়িত থাকিলে সংশ্লিষ্ট ছাত্ৰজনৰ এই সুবিধা কৰ্তন কৰা হ’ব বুলিও চৰকাৰে স্পষ্ট কৰি দিছে।
