কেৱল দশম শ্ৰেণীলৈকেহে পঢ়া-শুনা কৰিছিল তেওঁ। কিন্তু ডিঙিত ষ্টেথোস্কোপ আৰু হাতত চিৰিঞ্জ লৈ তেওঁ চলাই গৈছিল চিকিৎসা সেৱা। গুজৰাটৰ চুৰাটত আৰক্ষীৰ জালত পৰিছে এজন ভুৱা চিকিৎসক।
আৰক্ষীৰ সূত্ৰই জনোৱা মতে অভিযুক্ত যুৱকজনৰ নাম সঞ্জিত নীলকমল বিশ্বাস। প্ৰায় ৪০ বছৰীয়া এই যুৱকজন পশ্চিম বংগৰ নদীয়া জিলাৰ বাসিন্দা বুলি চিনাক্ত কৰা হৈছে।
সুৰাটৰ শচীন থানা এলেকাৰ এখন গাঁৱত সঞ্জিতে আশা ক্লিনিক নামৰ এখন ফাৰ্মাচী বা ক্লিনিক খুলি বহিছিল। সেই অঞ্চলৰ গাঁওবাসীয়ে তেওঁৰ ওচৰলৈ চিকিৎসাৰ বাবে গৈছিল। কিন্তু তদন্তকাৰীয়ে জানিবলৈ দিয়া মতে সঞ্জিতৰ কোনো ডাক্তৰী ডিগ্ৰী নাছিল আৰু আনকি চিকিৎসা বিজ্ঞানৰ কোনো ন্যূনতম প্ৰশিক্ষণো তেওঁৰ নাছিল। তেনে অৱস্থাতে তেওঁ ৰোগীক এলৰোপেথিক ঔষধ দিয়াৰ লগতে ইনজেকচন পৰ্যন্ত দি আহিছিল।
গোপন সূত্ৰৰ খবৰৰ ভিত্তিত স্বাস্থ্য বিভাগৰ বিষয়াৰ সৈতে শচীন থানাৰ আৰক্ষীয়ে হঠাতে সেই ক্লিনিকখনত অভিযান চলায়। আৰক্ষী যেতিয়া তাত সোমাইছিল, তেতিয়া যুৱকজনে ৰোগী চোৱাত ব্যস্ত আছিল আৰু তেওঁক হাতে-লোটে ধৰা হয়। ক্লিনিকখনত তালাচী চলাই আৰক্ষীয়ে প্ৰচুৰ পৰিমাণে এলৰোপেথিক ঔষধ, চিৰিঞ্জ, ষ্টেথোস্কোপ আৰু সৰু সুৰা অস্ত্ৰোপচাৰৰ সঁজুলি উদ্ধাৰ কৰিবলৈ সক্ষম হয়।
আৰক্ষীৰ এজন বিষয়াই জনাইছে যে ঔষধৰ গুণাগুণ বা ফাৰ্মাকোলজী সম্পৰ্কে কোনো জ্ঞান নোহোৱাকৈ ইনজেকচন দিয়াটো অত্যন্ত বিপজ্জনক। এয়া মানুহৰ জীৱনক লৈ খেলা কৰাৰ দৰেই এটা ভয়ংকৰ অপৰাধ। বৰ্তমান অভিযুক্ত যুৱকজনৰ বিৰুদ্ধে ভাৰতীয় ন্যায় সংহিতা আৰু মেডিকেল প্ৰেকটিচনাৰ এক্টৰ অধীনত গোচৰ ৰুজু কৰা হৈছে। এই অবৈধ ক্লিনিকখন কিমান দিন ধৰি চলি আছিল আৰু তেওঁ ক’ৰ পৰা ইমানবোৰ ঔষধ যোগান ধৰিছিল, সেই বিষয়ে আৰক্ষীয়ে অধিক তদন্ত অব্যাহত ৰাখিছে।
