নাগৰিকত্ব সংশোধনী বিধেয়কক লৈ কৌশলী স্থিতি লৈ অহা অগপ নেতৃত্বৰ বিৰুদ্ধে ক্ষুব্ধ হোৱা একাংশ কটনিয়ানে অগপৰ মুখ্য কাৰ্য্যালয় ঘেৰাও কৰি তিনি মন্ত্ৰীৰ প্ৰতিকৃতি দাহ কৰাৰ পাছতেই প্ৰতিক্ৰিয়া প্ৰকাশ কৰিছে অগপৰ নতুন ছাত্ৰ সংগঠন অসম ছাত্ৰ পৰিষদে।
অসম ছাত্ৰ পৰিষদৰ ৰাজ্যিক সভাপতি ত্ৰিনয়ন বৰুৱাই অগপৰ তিনিজন নেতাৰ প্ৰতিকৃতি দাহ কৰাটো ‘দুখলগা’ বুলি কোৱাৰ উপৰি ৰাষ্ট্ৰীয় দলৰ উচটনিতে একাংশ কটনিয়ানে এনেদৰে প্ৰতিবাদ কৰে বুলিও মন্তব্য কৰে।
“অগপ ৮৫৫জন চহিদৰ কেঁচা তেজেৰে জন্ম হোৱা এটা দল। কিন্তু ২০-৩০জন ল’ৰা ওলাই আহি এনে এটা দলৰ কাৰ্য্যালয়ৰ সন্মুখতে এইদৰে নেতৃত্বৰ প্ৰতিকৃতি দাহ কৰাটো অতি দুখলগা কথা। ৰাষ্ট্ৰীয় দলৰ উচটনিত হয়তো তেওঁলোকে এনেদৰে প্ৰতিবাদ কৰিছে। কটন বিশ্ববিদ্যালয়ৰ বহু ল’ৰাক চিনি পাওঁ, তেওঁলোক কি স্থিতিত আছে বা দলত আছে। ৰাষ্ট্ৰীয় দলৰ ছত্ৰছায়াত জাতীয়তাবাদৰ ভেটিত গঢ় লৈ উঠা দলক অপমান কৰা হৈছে। সেই অপমান দেখি লজ্জিত হৈছো, দুখ পাইছো”, সংবাদ মাধ্যমৰ আগত প্ৰতিক্ৰিয়া প্ৰকাশ কৰি এইদৰে কয় বৰুৱাই।
তাৎপয্যপূৰ্ণভাৱে, কেবৰ ইচ্ছুক বাদ কৰি অন্যান্য বহু চিন্তা কৰিব লগীয়া বিষয় আছে বুলিও বৰুৱাই মন্তব্য কৰে।
““কেব” ইছ্যুটো কেন্দ্ৰীয় চৰকাৰে ঠিক কৰিব বা সংসদত পাছ হ’ব, এতিয়াও বিল হোৱা নাই। তাতকৈয়ো ভাবিব লগীয়া চিন্তা বহুত আছে। গুৱাহাটী বিশ্ববিদ্যালয়ত তৃতীয় ষান্মষিকৰ ৰাজনৈতিক বিজ্ঞানৰ প্ৰশ্ন কাকত ফাদিল হ’ল, ছেবাৰ কাণ্ড হৈ থাকে, ছাত্ৰ-ছাত্ৰীৰ সমস্যাৰ এই বিষয়বিলাকতো গুৰুত্ব দিব লাগে”, নৱগঠিত ছাত্ৰ সংগঠনটোৰ সভাপতিজনৰ মন্তব্য।
তেওঁ আৰু কয়, ““কেব”ৰ বিৰুদ্ধে প্ৰতিবাদেই সমাধান হ’ব নোৱাৰে। বিভিন্ন ৰাজনৈতিক আৰু অ-ৰাজনৈতিক দলে বিভিন্ন ধৰণে প্ৰতিবাদ কৰিছিল। প্ৰতিবাদ আমিও কৰিছিলো। অসমৰ গাঁৱে-ভুঞে গৈ প্ৰতিবাদ কৰিছিলো। তিনিচুকীয়া ডিব্ৰুগড়ৰ বিভিন্ন অঞ্চলত নিজেই গৈ “কেব”ৰ বিৰুদ্ধে প্ৰচাৰ চলাইছিলো, তথাপি আঞ্চলিকতাবাদৰ উত্থান আমি দেখা নাই।”
ইপিনে, “কেব”ৰ ক্ষেত্ৰত অগপ দলৰ স্থিতিয়েই তেওঁলোকৰো স্থিতি বুলি বৰুৱাই সদৰী কৰে।
““কেব”ৰ ইছ্যুটো সংসদীয় ইছ্যু, এইটো কৰিছে কেন্দ্ৰীয় চৰকাৰে। অগপ দল পূৰ্বৰ স্থিতিতে আছে, অৰ্থাৎ বিৰোধ কৰি আছে। দলৰ স্থিতিয়েই আমাৰ ছাত্ৰ পৰিষদৰো স্থিতি।”, বৰুৱাই কয়।
সকলোৱে যদি ৰাস্তাই-ঘাটে আন্দোলন কৰি থাকে তেন্তে বৌদ্ধিকভাৱে কোনে ভাবিব বা ছাত্ৰ সমাজক কোনে সুৰক্ষা দিব বুলিও তেওঁ প্ৰশ্ন কৰে।
উল্লেখ কৰিব পাৰি যে, কটন বিশ্ববিদ্যালয়ৰ সমাজতত্ত্ব বিভাগৰ স্নাতকোত্তৰ তৃতীয় ষান্মসিকৰ ছাত্ৰ ত্ৰিনয়ন বৰুৱাই কিছু দিন আগলৈকে কটনৰ ছাত্ৰ সমাজক “কেব”ৰ বিৰুদ্ধে হোৱা আন্দোলনত সন্মুখৰ পৰা নেতৃত্ব দিছিল।
