অসম গণ পৰিষদৰ লখিমপুৰ জিলা সমিতিয়ে দেওবাৰে জিলা কাৰ্যালয়ত এখন গুৰুত্বপূৰ্ণ বৈঠকত মিলিত হৈ দলটোৰ ২৯ জন সদস্যক তাৎক্ষণিকভাৱে কাৰ্যকৰী হোৱাকৈ বহিষ্কাৰ কৰাৰ সিদ্ধান্ত লৈছে। দলবিৰোধী কাৰ্যকলাপত লিপ্ত থকা তথা দলৰ অনুশাসন আৰু সাংগঠনিক নীতি উলংঘা কৰাৰ অভিযোগত এই কঠোৰ পদক্ষেপ গ্ৰহণ কৰা হৈছে। দলটোৰ আভ্যন্তৰীণ শৃংখলা ৰক্ষা কৰিবলৈ আৰু নীতি-আদৰ্শক অটুট ৰাখিবলৈ জিলা নেতৃত্বই এই বিশেষ সিদ্ধান্ত লৈছে বুলি জানিব পৰা গৈছে।
এই বহিষ্কাৰৰ ফলত প্ৰতিজন সদস্যই নিজৰ সাংগঠনিক পদবীৰ লগতে অসম গণ পৰিষদৰ প্ৰাথমিক সদস্যপদো হেৰুৱাইছে। বৈঠকৰ সময়ত জিলা সমিতিৰ নেতৃবৃন্দই সমষ্টিটোত দলটোৰ কাম-কাজৰ ওপৰত প্ৰভাৱ পেলোৱা বিভিন্ন বিষয় লৈ বিতংভাৱে আলোচনা কৰে। দলটোৰ সক্ৰিয়তা আৰু মৰ্যাদা বজাই ৰখাৰ স্বাৰ্থতে এনেধৰণৰ অনুশাসনমূলক ব্যৱস্থা গ্ৰহণ কৰাটো প্ৰয়োজনীয় বুলি নেতৃত্বই মত প্ৰকাশ কৰিছে।
দলৰ পৰা বহিষ্কৃত হোৱা সদস্যসকলৰ তালিকাত জয়ন্ত সেনাপতি, প্ৰেম বৰা, ৰাকেশ বৰা, দিগন্ত বৰা, অঞ্জন শইকীয়া, ৰানা সিং, মমী ভূঞা, মমী শইকীয়া, মনোজ কুমাৰ গগৈ, মনোজ বৰুৱা, পৰশজ্যোতি লাহণ, ৰাজ কিশোৰ চুতীয়া, মিন্টু বৰা, হোমেন দাস, যাদৱ শৰ্মা, ভৈৰৱ বৰুৱা, অনুপম বৰপাত্ৰ, কৃষ্ণ কুমাৰ গগৈ, ইমান আলী, তৃষ্ণা দেৱী, প্ৰবীণ শইকীয়া, যাদৱ দাস, আব্দুল ৰহমান, যাদৱ পাথৰি, ব্ৰজেন গগৈ, মুকুল দত্ত, ডিম্পল গগৈ, আশিকুৰ ৰহমান আৰু খালিদ আহমেদৰ নাম আছে। লখিমপুৰ জিলা অগপৰ এই সিদ্ধান্তই এতিয়া অঞ্চলটোৰ ৰাজনীতিত বিশেষ চৰ্চা লাভ কৰিছে।
