নাগৰিকত্ব সংশোধনী বিধেয়ক সম্পৰ্কত অগপ নেতৃত্বই গ্ৰহণ কৰা স্থিতিৰ বাবে বৰ্তমান দলটো ৰাইজৰ ৰোষত পৰিছে। অতুল বৰা, ফণীভূষণ চৌধুৰীকে ধৰি কেইবাগৰাকী শীৰ্ষ নেতা সন্মুখীন হৈছে অপ্ৰীতিকৰ পৰিস্থিতিৰ।
ইয়াৰ মাজতে আজি আছুৰ নেতৃত্বত কেব বিৰোধী প্ৰতিবাদকাৰীয়ে ডিব্ৰুগড়ৰ অগপ কাৰ্য্যালয় ভাঙি লণ্ডভণ্ড কৰে। শতাধিক প্ৰতিবাদকাৰীয়ে অগপৰ কাৰ্য্যালয়ত সোমাই কম্পিউটাৰ, চকী-টেবুলকে ধৰি বিভিন্ন আচবাব ভাঙি পেলায়।
অগপৰ জিলা উপ-সভাপতি তৰানাথ বুঢ়াগোঁহাইয়ে কয়, ‘নাগৰিকত্ব বিধেয়ক সম্পৰ্কত আলোচনা কৰি সিদ্ধান্ত গ্ৰহণৰ বাবে আমি এখন সভা অনুষ্ঠিত কৰিছিলো, কিন্তু হঠাৎ কেব বিৰোধী বহু প্ৰতিবাদকাৰী আমাৰ কাৰ্য্যালয়ত সোমাই আচবাব-পত্ৰ লণ্ডভণ্ড কৰে।‘
‘কেব বিৰোধী প্ৰতিবাদকাৰীৰ এনে আচৰণ আমি মানি নলওঁ। তেওঁলোকে আমাৰ কাৰ্য্যালয়ৰ সন্মুখত প্ৰতিবাদ কৰিব পাৰে কিন্তু সম্পত্তি নষ্ট কৰাতো এক অগণতান্ত্ৰিক আচৰণ।‘ আন এগৰাকী অগপ কৰ্মীয়ে কয়।
পিছত ঘটনাৰ খবৰ পাই ডিব্ৰুগড়ৰ আৰক্ষী অধীক্ষক ঘটনাস্থলীত উপস্থিত হয়। আৰক্ষীয়ে ইতিমধ্যে এই সম্পৰ্কত তদন্ত আৰম্ভ কৰিছে।
এই ঘটনাৰ পিছতে ডিব্ৰুগড়ত বিজেপি আৰু আৰ এছ এছৰ কাৰ্য্যালয়ৰ সন্মুখত নিৰাপত্তা বাহিনী মোতায়েন কৰা হয়।
উল্লেখযোগ্য যে কালি অৰ্থাৎ শনিবাৰে নিশা কেব বিৰোধী প্ৰতিবাদকাৰীয়ে ডিব্ৰুগড়ৰ বিজেপি বিধায়ক প্ৰশান্ত ফুকনৰ বাসগৃহ ঘেৰাও কৰি প্ৰতিবাদী কাৰ্যসূচী ৰূপায়ন কৰে।
