অৱশেষত আজি আনুষ্ঠানিকভাৱে ঘোষণা কৰা হ’ল ধুবুৰী লোকসভা সমষ্টিৰ অগপ-বিজেপিৰ মিত্ৰজোঁটৰ প্ৰাৰ্থীৰ নাম। প্ৰত্যাশিতভাৱে মিত্ৰজোঁটৰ প্ৰাৰ্থী হিচাপে মানকাচৰৰ প্ৰাক্তন বিধায়ক তথা অগপ নেতা জাভেদ ইছলামক দলটোৱে প্ৰাৰ্থিত্ব প্ৰদান কৰে।
জানিব পৰা মতে আজি বিজেপিৰ ৰাজ্যিক সভাপতি ৰণজিৎ দাস, অগপৰ সভাপতি অতুল বৰা, মন্ত্ৰী ভৱেশ কলিতা, অগপৰ প্ৰাক্তন বিধায়ক তথা অগপৰ নেতা ভূপেন ৰায় আৰু প্ৰাৰ্থিত্ব লাভ কৰা জাভেদ ইছলামৰ মাজত হোৱা আলোচনাৰ পাছতে সংখ্যালঘু অধ্যুষিত ধুবুৰী লোকসভা সমষ্টিটোৰ প্ৰাৰ্থীৰ নাম ঘোষণা কৰে।
এইখিনিতে আটাইতকৈ তাৎপৰ্যপূৰ্ণ কথা হ’ল বিজেপিৰ ৰাজ্যিক সভাপতি ৰণজিৎ দাসে ঘোষণা কৰিছে অগপৰ প্ৰাৰ্থীগৰাকীৰ নাম। ইয়াকে লৈ এতিয়া চলিছে ব্যাপক চৰ্চা। দুয়োটা দলে নিৰ্বাচনত যৌথভাৱে অৱতীৰ্ণ হোৱাৰ সিদ্ধান্ত লৈছে যদিও কি কাৰণত অসমৰ তথাকথিত আঞ্চলিক দল অগপ দলটোৱে নিজৰ প্ৰাৰ্থীৰ নাম তেওঁলোকৰ সহযোগী দলৰ ৰাজ্যিক সভাপতিয়ে ঘোষণা কৰিলে সেয়াহে এক ৰহস্যৰ বিষয়।
প্ৰাক নিৰ্বাচনী মিত্ৰতা সম্পৰ্কে লোকসভা নিৰ্বাচনত অগপক প্ৰতিদ্বন্দ্বিতা কৰিবলৈ বিজেপিয়ে তিনিখন আসন এৰি দিছিল। সেই মৰ্মে অগপই লাভ কৰা কলিয়াবৰ সমষ্টিৰ পৰা সদ্য আছু পদত্যাগী নেতা মণিমাধৱ মহন্তক, ধুবুৰী সমষ্টিৰ পৰা জাভেদ ইছলামক প্ৰাৰ্থিত্ব প্ৰদান কৰা হ’ল। কিন্তু এতিয়াও দলটোৱে বৰপেটা সমষ্টিটোৰ বাবে ঠিৰাং কৰিব পৰা নাই প্ৰাৰ্থী।
উল্লেখ্য যে ধুবুৰী সমষ্টিটোত ধাৰাবাহিকভাৱে ২০০৯ চনৰ পৰা সাংসদ ৰূপে কাৰ্য্যনিৰ্বাহ কৰি থকা এ আই য়ু ডি এফৰ মুৰব্বী বদৰুদ্দিন আজমলৰ হাতৰ পৰা সমষ্টিটো মিত্ৰজোঁটৰ প্ৰাৰ্থী জাভেদ ইছলামে আজুৰি আনিবলৈ সক্ষম হ’ব নে নাই বা কি পদক্ষেপ গ্ৰহণ কৰে সেয়া সময়ত লক্ষ্যণীয় হ’ব।