২০২৬ বৰ্ষৰ অসম বিধানসভা নিৰ্বাচনৰ পূৰ্বে অসম গণ পৰিষদত তীব্ৰ অন্তৰ্কন্দল আৰু অসন্তুষ্টিৰ সৃষ্টি হোৱা পৰিলক্ষিত হৈছে। আগন্তুক নিৰ্বাচনত অৱতীৰ্ণ হোৱাৰ বাবে দলীয় টিকটৰ পৰা বঞ্চিত হৈ শুকুৰবাৰে অগপৰ জ্যেষ্ঠ নেতা ৰমেন্দ্ৰ নাৰায়ণ কলিতাই দলৰ প্ৰাথমিক সদস্যপদৰ লগতে সকলো পদৰ পৰা আনুষ্ঠানিকভাৱে পদত্যাগ কৰে। দীৰ্ঘদিন ধৰি আঞ্চলিক দলটোৰ সৈতে ওতপ্ৰোতভাৱে জড়িত হৈ থকা জ্যেষ্ঠ নেতাজনে নিৰ্বাচনৰ ঠিক আগে আগে গ্ৰহণ কৰা এই সিদ্ধান্তই ৰাজ্যৰ ৰাজনৈতিক মহলত তীব্ৰ জোকাৰণিৰ সৃষ্টি কৰিছে।
জানিব পৰা মতে, মিত্ৰজোঁটৰ আসন বুজাবুজি আৰু দলীয় নেতৃত্বৰ সিদ্ধান্ত মৰ্মে তেওঁক এইবাৰ প্ৰাৰ্থিত্ব প্ৰদান নকৰাৰ কথা নিশ্চিত হোৱাৰ পাছতেই ক্ষুব্ধ হৈ পৰে জ্যেষ্ঠ নেতাজন। দলীয় নেতৃত্বই তেওঁৰ অৱদান আৰু বলিষ্ঠ স্থিতিক আওকাণ কৰা বুলি অভিযোগ উত্থাপন কৰি তেওঁ নিজৰ পদত্যাগ পত্ৰ দলীয় নেতৃত্বলৈ প্ৰেৰণ কৰে।
এতিয়া নিৰ্বাচনৰ দিন ঘোষণা হোৱাৰ পিছত ৰমেন্দ্ৰ নাৰায়ণ কলিতাৰ দৰে এগৰাকী জ্যেষ্ঠ আৰু প্ৰভাৱশালী নেতাই দল ত্যাগ কৰাটো অসম গণ পৰিষদৰ বাবে এক মোক্ষম আঘাত হিচাপে বিবেচিত হৈছে। তেওঁৰ এই পদত্যাগে সংশ্লিষ্ট সমষ্টিটোৰ লগতে সমগ্ৰ ৰাজ্যৰ নিৰ্বাচনী সমীকৰণত বিশেষ প্ৰভাৱ পেলোৱাৰ সম্ভাৱনা আছে। পৰৱৰ্তী সময়ত তেওঁ আন কোনো ৰাজনৈতিক দলত যোগদান কৰিব নে নিৰ্দলীয় প্ৰাৰ্থী হিচাপে নিৰ্বাচনত প্ৰতিদ্বন্দ্বিতা আগবঢ়াব, সেয়া এতিয়াও স্পষ্ট হোৱা নাই যদিও তেওঁৰ পৰৱৰ্তী ৰাজনৈতিক পদক্ষেপৰ প্ৰতি এতিয়া সকলোৰে দৃষ্টি নিবদ্ধ হৈছে।
