নাগৰিকত্ব বিধেয়কৰ বিৰুদ্ধে মাত নমতা অগপৰ নেতা তথা মন্ত্ৰী ফণীভূষণ চৌধুৰীক আজি তেওঁৰ সমষ্টিৰ ৰাইজেই পহুখেদা দিয়ে।
খেদি যোৱা ৰাইজৰ পৰা প্ৰাণ বচাই মন্ত্ৰীজনে দৌৰি দৌৰি আঁতৰত ৰখাই থোৱা নিজৰ গাড়ীলৈ যায় আৰু নিৰাপত্তাৰক্ষীয়ে তেওঁক ততাতৈয়াকৈ পলোৱাত সহায় কৰি দিয়ে।
আমালৈ অহা খবৰমতে, অসামৰিক যোগান মন্ত্ৰী ফণীভূষণ চৌধুৰীয়ে আজি বঙাইগাওঁ সমষ্টিৰ মাণিকপুৰ নামৰ ঠাইত এখন দলীয় সভাত অংশগ্ৰহণ কৰিবলৈ গৈছিল।
কিন্তু নাগৰিকত্ব বিধেয়কক লৈ মৌনতাৰ কৌশল লোৱা অগপৰ নেতৃত্বৰ বিৰুদ্ধে দলীয় কৰ্মীৰ চূড়ান্ত বহিঃপ্ৰকাশ ঘটে আৰু নেতাজনক তেওঁৰ নীৰৱতাৰ কৈফিয়ৎ বিচৰাৰ পিছতে ক্ৰোধান্বিত হৈ উঠে দলীয় কৰ্মীসকল।
পৰিস্থিতি ক্ৰমে বেয়ালৈ যোৱাত শাৰীৰিক আক্ৰমণৰ শংকাত আৰু নিজৰ সুৰক্ষাৰ স্বাৰ্থত বিধায়কজনে অলপ আঁতৰতে ৰখাই থোৱা নিজৰ গাড়ীলৈ দৌৰে। আগে-পিছে দৌৰে তেওঁৰ নিৰাপত্তাৰক্ষী আৰু তেওঁক লৰালৰিকৈ গাড়ীত উঠাই আঁতৰাই নিয়ে।
আনহাতে বিজেপিৰ সাংসদ তথা খাদ্য সংসাধনৰ ৰাজ্যিক মন্ত্ৰী ৰামেশ্বৰ তেলীকো আজি নাহৰকটীয়াৰ জয়পুৰত ঘেৰাও কৰে আছুকৰ্মী আৰু স্থানীয় ৰাইজে। ডিব্ৰুগড়ৰ সাংসদজনে জয়পুৰ বৰ্ষাৰণ্য মহোৎসৱৰ বুজ ল’বলৈ জয়পুৰলৈ গৈছিল।
আছুৰ নেতা-কৰ্মীসকলে তেওঁক “কেব”ৰ বিৰোধিতা কৰিবলৈ দাবী জনায় আৰু নিজমুখে সেয়া ক’বলৈ দাবী কৰে। আছুৰ কৰ্মীসকলে তেওঁক ভালেমান সময় ধৰি আবদ্ধ কৰি ৰাখে।