আগন্তুক ৰাজ্যসভাৰ নিৰ্বাচনৰ বাবে অসম গণ পৰিষদ (অগপ)-এ পুনৰ বিৰেন্দ্ৰ প্ৰসাদ বৈশ্যক প্ৰাৰ্থী হিচাপে মনোনীত কৰিছে। দলটোৱে এই সিদ্ধান্ত লৈছে বিশেষ চৰ্তৰ আধাৰত। উল্লেখযোগ্য যে, অহা ১৯ জুনত অসমৰ ৰাজ্যসভাৰ দুখন আসনৰ বাবে নিৰ্বাচন অনুষ্ঠিত হ’ব।
অসম বিজেপিয়ে ইতিমধ্যে এখন আসনৰ বাবে প্ৰাৰ্থীৰ নাম ঘোষণা কৰি চূড়ান্ত কৰিছে। বিজেপিয়ে মিত্ৰদল অগপক এখন আসন এৰি দিলে, সেই আসনত পুনৰ বিৰেন্দ্ৰ প্ৰসাদ বৈশ্যক মনোনয়ন দিয়ে অগপে। বৰ্তমানেও এই দুয়োখন আসন বিজেপি আৰু অগপৰ দখলত আছে, য’ত অগপৰ হৈ বিৰেন্দ্ৰ প্ৰসাদ বৈশ্য আৰু বিজেপিৰ হৈ মিছন ৰঞ্জন দাস সাংসদ হিচাপে কাৰ্যনিৰ্বাহ কৰি আছে।
অগপৰ সূত্ৰ অনুসৰি, দলটোৱে এইবাৰ মুঠ ২৭ গৰাকী প্ৰাৰ্থীৰ আবেদন বিবেচনা কৰিছিল। অভ্যন্তৰীণ আলোচনা আৰু বিদ্ৰোহৰ সম্ভাৱনাৰ প্ৰতি লক্ষ্য ৰাখি, দলটোৱে অবশেষত পুনৰ বিৰেন্দ্ৰ প্ৰসাদ বৈশ্যক বাছনি কৰে।
শনিবাৰে গুৱাহাটীস্থিত অগপৰ কেন্দ্ৰীয় কাৰ্যালয়ত অনুষ্ঠিত এখন গুৰুত্বপূৰ্ণ বৈঠকত এই সিদ্ধান্ত গ্ৰহণ কৰা হয়। বৈঠকত উপস্থিত আছিল অগপৰ সভাপতি অতুল বৰা, কাৰ্যকৰী সভাপতি কেশৱ মহন্ত, জ্যেষ্ঠ নেতা তথা সাংসদ ফণীভূষণ চৌধুৰী আৰু আন কিছুমান নেতাসকল।
দলীয় সূত্ৰ অনুসৰি, বৈশ্যক দিয়া এই প্ৰাৰ্থীত্ব বিশেষ চৰ্তৰ সৈতে সংলগ্ন। সেই চৰ্ত অনুসৰি, তেওঁক নিৰ্বাচনৰ দুবছৰ পাছত আসনখন পৰিত্যাগ কৰিব লাগিব। পৰৱৰ্তী সময়চোৱাত অগপে নতুন প্ৰজন্মৰ নেতাক এই আসনলৈ আগবঢ়াব বুলি স্পষ্টকৈ প্ৰকাশ কৰিছে।
উল্লেখযোগ্য যে, তেওঁ ২০০৮-২০১৪ আৰু ২০১৯-২০২৫ কালছোৱাৰ বাবে ৰাজ্যসভাৰ সদস্য আছিল। লগতে, ১৯৯৬ চনত মংগলদৈ লোকসভা সমষ্টিৰ পৰা লোকসভালৈ নিৰ্বাচিত হৈ কেন্দ্ৰীয় তীখা আৰু খনি মন্ত্ৰীৰ দায়িত্বও পালন কৰিছিল। অগপৰ এই সিদ্ধান্তই দলত সংগঠনৰ একতা ৰক্ষা কৰাৰ লগতে অভিজ্ঞতা আৰু প্ৰজন্মৰ মেল বন্ধন ৰাখিবলৈ চেষ্টা কৰা দেখুৱাইছে বুলি আশা কৰিছে।
