কেন্দ্ৰ আৰু ৰাজ্যত শাসনাধিষ্ঠ বিজেপিয়ে অসমৰ থলুৱা ৰাইজ আৰু বিভিন্ন জাতীয়-জনগোষ্ঠীয় দল-সংগঠনৰ মতৰ বিপৰীতে নাগৰিকত্ব সংশোধনী বিধেয়ক গৃহীত কৰিব বিচৰা কাৰ্যৰ বিৰুদ্ধে আজি হিলদল ভাঙি ওলাই আহিল অসম চৰকাৰৰ মিত্ৰদল অসম গণ পৰিষদ।
আজি অসমৰ বিভিন্ন প্ৰান্তৰ পৰা অহা অগপৰ দহ সহস্ৰাধিক নেতা-কৰ্মীয়ে বিধেয়কখনৰ বিৰুদ্ধে গুৱাহাটীৰ লতাশিল খেলপথাৰত সমাৱেশত মিলিত হয়। ইয়াৰ পৰাই এক বিশাল প্ৰতিবাদী সমদল উলিয়াই চানমাৰিৰ অসম অভিযান্ত্ৰিক প্ৰতিষ্ঠানৰ খেলপথাৰলৈ যাত্ৰা কৰে প্ৰতিবাদকাৰীসকল।
প্ৰতিবাদত অংশ লৈ আঞ্চলিক দলটোৰ নেতা-কৰ্মীসকলে অসমৰ থলুৱা ৰাইজৰ অস্তিস্বৰ প্ৰতি সংকট নমাই আনিব পৰা নাগৰিকত্ব সংশোধনী বিধেয়কখনৰ বিৰোধিতা কৰি অহা বিভিন্ন জাতীয় সংগঠন আৰু খিলঞ্জীয়া ৰাইজৰ প্ৰতিবাদৰ প্ৰতি বিজেপি চৰকাৰে গুৰুত্ব প্ৰদান নকৰা বিষয়টোক ধিক্কাৰ দিয়ে। লগতে এই বিধেয়ক বাতিল নকৰা পৰ্যন্ত আন্দোলন অব্যাহত থাকিব বুলিও স্পষ্ট কৰি দিয়ে।
প্ৰতিবাদী কাৰ্যসূচীৰ নেতৃত্বত থাকি অগপৰ সভাপতি অতুল বৰাই কয়, “নাগৰিকত্ব সংশোধনী বিধেয়ক, ২০১৬ আমি কোনো কাৰণতে মানি নলওঁ। আমি দিল্লীক সুধিব বিচাৰো- ‘আপোনালোকে অসম স্বদেশীৰ হোৱাটো বিচাৰে নে বিদেশীৰ হোৱাটো বিচাৰে?’ যদি স্বদেশীৰ হোৱাটো বিচাৰে তেনেহ’লে অসমৰ জনমতক উপেক্ষা নকৰিব।”
তেওঁ লগতে নাগৰিকত্ব সংশোধনী বিধেয়ক সন্দৰ্ভত সিদ্ধান্ত গ্ৰহণৰ বাবে গঠন কৰা যুটীয়া সংসদীয় সমিতিয়ে অসমৰ কেৱল গুৱাহাটী আৰু বৰাক উপত্যকাতে শুনানি গ্ৰহণ কৰি পুনৰ শুনানিৰ বাবে অসমলৈ আহিব বুলি কৈও নহা বিষয়টোকো ধিক্কাৰ দিয়ে।
বিধেয়কখন আইনত পৰিণত নহ’বৰ কাৰণে অগপই আন্দোলন অব্যাহত ৰাখিব বুলি মন্তব্য কৰে প্ৰাক্তন মুখ্য মন্ত্ৰী প্ৰফুল্ল কুমাৰ মহন্তই। তেওঁ কয়, “এয়া সাম্ৰাজ্যবাদ নহয় যে চৰকাৰে যি মন যায় তাকে জাপি দিব পাৰিব। আমি আশা কৰো বিজেপি নেতৃত্বাধীন কেন্দ্ৰীয় চৰকাৰৰ সোনকালে শুভবুদ্ধি উদয় হ’ব আৰু এই বিধেয়কখন বাতিল কৰিব।”
প্ৰতিবাদত অংশ লৈ বিশিষ্ট সাংবাদিক অদীপ ফুকনে কয়, “জাতিধ্বংসী বিধেয়কখনৰ বিৰুদ্ধে অসমৰ জাতি-জনগোষ্ঠী দল-সংগঠনৰ প্ৰতিবাদক অগ্ৰাহ্য কৰাৰ ফলত এই প্ৰতিবাদ আৰু যে শক্তিশালী হ’ব সেয়া আজি লতাশিল খেলপথাৰত সমবেত ৰাইজেই প্ৰমাণ কৰি দিছে। আজি সমগ্ৰ অসমৰ জনগণে বন্ধ পালন কৰি, প্ৰতিবাদ কৰি অসমৰ জনগণৰ শত্ৰু কোন, বন্ধু কোন দেখুৱাই দিছে।”
এই কাৰ্যসূচীত অংশ লৈ বিশিষ্ট লেখিকা মাইনী মহন্ত, অধিবক্তা নেকিবুৰ জামান, সত্যন্দ্ৰ কুমাৰ ডেকা, অগপ নেতা বৃন্দাবন গোস্বামী, কেশৱ মহন্ত, বীৰেন্দ্ৰ প্ৰসাদ বৈশ্য, ৰেখা ৰাণী দাস বড়োৱেও ভাষণ প্ৰদান কৰি বিধেয়কখনৰ তীব্ৰ বিৰোধিতা কৰে।
