আজি প্ৰদেশ কংগ্ৰেছে পঞ্চায়তৰ সভাপতিৰ পদৰ প্ৰাৰ্থিত্ব দিয়া এজন লোকক গঁড় চিকাৰত অভিযুক্ত আৰু গোচৰ থকা বাবে মনোনয়ন প্ৰত্যাহাৰ কৰাৰ পিছত অগপই একেই পদক্ষেপ লোৱাৰ সম্ভাৱনা নাকচ কৰিছে।
উল্লেখযোগ্য, মৰিধনশিৰি পঞ্চায়তৰ সভাপতি পদৰ বাবে অগপই একালৰ দুৰ্ধৰ্ষ গঁড় চিকাৰী গণেশ দলেক প্ৰাৰ্থিত্ব দিছে। গণেশ দলেৰ বিৰুদ্ধে অগৰাতলী বনাঞ্চল আৰু ৰংবংৱে থানাত গঁড় চিকাৰ সম্বন্ধীয় দুটাকৈ গোচৰ পঞ্জীয়ন হৈ আছে।
বিশ্বনাথত কংগ্ৰেছে অভিযুক্ত গঁড় চিকাৰীৰ প্ৰাৰ্থিত্ব প্ৰত্যাহাৰ কৰালৈ আঙুলিয়াই দি আজি সংবাদ মাধ্যমে অগপয়ো একেই ব্যৱস্থা ল’ব নেকি, অৰ্থাৎ অভিযুক্ত গঁড় চিকাৰী গণেশ দলেৰ মনোনয়ন প্ৰত্যাহাৰ কৰিব নেকি বুলি সোধা প্ৰশ্নৰ উত্তৰত সম্ভাৱনা অস্বীকাৰ কৰে দলটোৰ বিধায়ক ৰমেন্দ্ৰ নাৰায়ণ কলিতাই।
“অসম গণ পৰিষদে গঁড় হত্যাত জড়িত বুলি প্ৰমাণিত হোৱা লোকক পঞ্চায়ত নিৰ্বাচনৰ টিকট দিয়া নাই।” এইদৰে কয় বিধায়কজনে।
কলিতাই কয় যে গণেশ দলেৰ বিৰুদ্ধে গঁড় হত্যাৰ অভিযোগহে আছে। “তেওঁ অভিযুক্তহে”, ৰমেন্দ্ৰ নাৰায়ণ কলিতাই কয়। “তেওঁক আদালতে গঁড় হত্যাকাৰী বুলি ৰায় দিয়া নাই।” আত্মপক্ষ সমৰ্থন কৰি কলিতাই কয়।
“গঁড় হত্যাত জড়িত বুলি প্ৰমাণিত হ’লে অগপ দলে বিহিত ব্যৱস্থা গ্ৰহণ কৰিব” এইদৰে উদ্ভট মন্তব্য কৰে দায়িত্বশীল জনপ্ৰতিনিধিজনে।
মন কৰিব লগীয়া যে পৰিৱৰ্তন আৰু গঁড় হত্যাৰ ইচ্ছ্যুৰে শাসন দখল কৰা চৰকাৰৰ প্ৰধান অংশীদাৰ অগপ দলটো।
