ৰাজ্যত ক’ৰ’না ভাইৰাছৰ সংক্ৰমণৰ আতংক অব্যাহত থকাৰ সময়তে গাহৰিৰ জ্বৰে নতুনকৈ গা কৰি উঠিছে। উজনি অসমত এই ৰোগৰ ফলত বহু গাহৰিৰ মৃত্যু হোৱাত জনসাধাৰণ আতংকিত হৈ পৰিছে।
আজি ৰাজ্যৰ কৃষি তথা পশুপালন বিভাগৰ মন্ত্ৰী অতুল বৰাই গুৱাহাটীৰ দাতিকাষৰীয়া ৰাণী অঞ্চলৰ দেৱজিৎ চৌধুৰীৰ গাহৰি ফাৰ্মত গাহৰিৰ জ্বৰৰ লগতে ল’কডাউনৰ বাবে হোৱা ক্ষয়-ক্ষতি সম্পৰ্কে বুজ লয়।
অতুল বৰাই উজনি অসমত গাহৰিৰ জ্বৰৰ বাবে প্ৰায় ১৩৭৪ টা গাহৰিৰ মৃত্যু হোৱা বুলি উল্লেখ কৰি বিভাগৰ তৰফৰ পৰা ইয়াৰ পৰীক্ষা-নিৰীক্ষা কৰি থকা হৈছে বুলি জানিবলৈ দিয়ে।
উজনি অসমৰ দৰে নামনি অসমত এই ৰোগ বৰ্তমান সময়ত হোৱা নাই বুলি উল্লেখ কৰি উজনি অসমত ৰোগবিধ নিয়ন্ত্ৰণৰ বাবে ব্যৱস্থা গ্ৰহণ কৰিব লাগিব বুলিও বৰাই লগতে কয়।
গুৰুত্বপূৰ্ণ কথা যে, দেৱজিৎ চৌধুৰীৰ ফাৰ্মত প্ৰায় ৫ লাখ গাহৰি পোৱালী এমাহত উৎপাদন হয়।
ল’কডাউনৰ ফলত কৃষক সকলৰ লগতে পশুপালনৰ সৈতে জড়িত লোক সকল যথেষ্ট ক্ষতিগ্ৰস্ত হৈছে।
আনহাতে, মন্ত্ৰী অতুল বৰাই সোমবাৰে এচিয়াৰ সৰ্ববৃহৎ কলৰ বজাৰ দৰংগিৰিলৈ যোৱা বুলিও জানিবলৈ দি ল’কডাউনৰ বাবে ব্যৱসায়ী সকলে কলখিনি বজাৰত বিক্ৰী কৰিবলৈ পৰা নাছিল যদিও প্ৰশাসনে ব্যৱস্থা কৰি দিছে বুলি কয়। মন্ত্ৰী গৰাকীয়ে উৎপাদিত কল বিদেশলৈ পঠোৱাৰ বাবে চৰকাৰে চিন্তা কৰিছে বুলি মত প্ৰকাশ কৰে।
ইপিনে, এইবাৰ ৰাজ্যৰ কৃষি ক্ষেত্ৰত উৎপাদন বৃদ্ধি পাইছে বুলি মন্তব্য কৰি কৃষি মন্ত্ৰী গৰাকীয়ে অইন বছৰতকৈ এইবাৰ প্ৰায় চাৰিগুণ কৃষি সামগ্ৰীৰ উৎপাদন বৃদ্ধি পাইছে বুলি জানিবলৈ দিয়ে।
তদুপৰি, অতুল বৰাই ল’কডাউনৰ ফলত দেশৰ অৰ্থনীতিত বৃহৎ ক্ষতি হৈছে আৰু ৰাজ্য চৰকাৰো কৃষকৰ ফচল নষ্ট হোৱা বাবে সমালোচনাৰ সন্মুখিন হোৱা বুলি স্বীকাৰ কৰে।
