নতুন কৃষি আইনৰ বিৰুদ্ধে চলি থকা তীব্ৰ প্ৰতিবাদৰ মাজতেই কেন্দ্ৰীয় কৃষি মন্ত্ৰী নৰেন্দ্ৰ সিং তোমৰে দেশৰ কৃষক সকলক উদ্দেশ্য কৰি এখন পত্ৰ লিখিছে।
আঠ পৃষ্ঠাজোৰা পত্ৰখনত কৃষি মন্ত্ৰী গৰাকীয়ে কৃষকসকলক আঠটা প্ৰতিশ্ৰুতি দিয়ে।
চিঠিখনত তেওঁ নূন্যতম সমৰ্থন দামক(এম এছ পি)লৈ কেন্দ্ৰীয় চৰকাৰে কৃষকক লিখিত প্ৰতিশ্ৰুতি দিবলৈ সাজু আছে বুলি উল্লেখ কৰে।
তেওঁ লগতে নূন্যতম সমৰ্থন দাম অব্যাহত আছে আৰু অব্যাহত থাকিব বুলিও স্পষ্ট কৰি দিয়ে।
আনহাতে মন্ত্ৰী গৰাকীয়ে ৰাজনীতিৰ স্বাৰ্থত একাংশ লোকে কৃষকসকলৰ মাজত ভুল তথ্য আগবঢ়াইছে বুলিও উল্লেখ কৰে।
কৃষি মন্ত্ৰীৰ এই চিঠিক কেন্দ্ৰ কৰি প্ৰধান মন্ত্ৰী নৰেন্দ্ৰ মোদীয়ে এটা টুইট কৰা পৰিলক্ষিত হয়।
কৃষি মন্ত্ৰীয়ে লিখা এই চিঠিখন দেশৰ সকলো অন্ন দাতাকেই পঢ়িবলৈ বিনম্ৰতাৰে অনুৰোধ জনাই প্ৰধান মন্ত্ৰী মোদীয়ে।
ইয়াৰ উপৰি মোদীয়ে দেশৰ প্ৰতিজন লোকৰ ওচৰলৈ এই চিঠিখন লৈ যাবলৈ দেশবাসীক আহ্বান জনায়।
চিঠিখনত লিখা আছে, ‘প্ৰধান মন্ত্ৰী নৰেন্দ্ৰ মোদীৰ নেতৃত্বত আমাৰ চৰকাৰে কোনো ভেদাভেদ নোহোৱাকৈ সকলো পৰ্যায়ৰ লোকৰ হিত সাধনৰ লক্ষ্যৰে কাম কৰিছে। যোৱা ছয় বছৰৰ ইতিহাস ইয়াৰ সাক্ষী’।
লগতে কৃষকসকলক এই নতুন আইন কেইখনৰ ওপৰত বিশ্বাস ৰাখিবলৈ অনুৰোধ কৰিছে আৰু এই আইন কেইখনে কৃষি ক্ষেত্ৰত আমূল পৰিৱৰ্তন সাধন কৰিব বুলি কয়।
উল্লেখ্য যে চৰকাৰী পক্ষ আৰু আন্দোলনকাৰী কৃষকসকলৰ মাজত আলোচনা স্তব্ধ হৈ পৰাৰ পিছতেই কৃষি মন্ত্ৰীগৰাকীয়ে এই আঠ পৃষ্ঠাজোৰা চিঠিখন লিখি কৃষকসকলক পতিয়ন নিয়াৰ প্ৰয়াস কৰিছে।
চিঠিখনত উল্লেখ কৰা কেইটামান বিশেষ কথা
১. কৃষকৰ ভূমিৰ শংকা নাই, তেওঁলোকৰ মালিকীস্বত্ব থাকিব।
২. কৃষকসকলক নিৰ্ধাৰিত সময়ত প্ৰাপ্য পৰিশোধ কৰা হ’ব
৩. প্ৰাপ্য পৰিশোধ নকৰিলে জৰিমনা বিহা হ’ব
৪. মুকলি বজাৰত উৎপাদিত সামগ্ৰী ভাল মূল্যত বিক্ৰী কৰাৰ বিকল্প লাভ কৰিব
৫. নূন্যতম সমৰ্থন দাম অব্যাহত আছে আৰু অব্যাহত থাকিব
৬. চুক্তি শস্যৰ বাবেহে হ’ব, ভূমিৰ বাবে নহয়, কৃষকসকলে যেতিয়াই বিচাৰে চুক্তি বাতিল কৰিব পাৰে।
৭. একাংশই কৃষি আইনক লৈ বিভ্ৰান্তি বিয়পাইছে।
কৃষি মন্ত্ৰী গৰাকীয়ে লগতে কয় যে যোৱা কিছুদিনত মই বিভিন্ন ৰাজ্যৰ কৃষি সংগঠন সমূহৰ সৈতে এই বিষয়ত আলোচনা কৰিছো আৰু তেওঁলোকে নতুন কৃষি আইন কেইখনক লৈ যথেষ্ট সন্তুষ্ট।
