আজি পাঁচ আগষ্ট। ১৬৬৯ খ্ৰীষ্টাব্দৰ আজিৰ দিনটোতে অসমৰ ইতিহাসত সংঘটিত হৈছিল এক কৰুণ ঘটনা।
দেশ আৰু জাতিৰ বাবে আজি দিনটোতে দহ হাজাৰ অসমীয়াই মোগলৰ হাতত প্ৰাণ বিসৰ্জন দিছিল।
দলিবাৰীৰ ওচৰৰ আলাবৈ নামৰ পথাৰত আহোম সেনাপতি মহাবীৰ লাচিত বৰফুকনৰ নেতৃত্বত মোগল সেনাপতি ৰামসিংহৰ মাজত হৈছিল তয়াময়া ৰণ। এই ৰণত মোগলৰ হাতত প্ৰাণ হেৰুৱাইছিল দহ হাজাৰ অসমীয়া সৈনিকে।
দেশ আৰু জাতিৰ বাবে আলাবৈ ৰণত প্ৰাণ আহুতি দিয়া এই দহ হাজাৰ অসমীয়া সৈনিকক আজি শ্ৰদ্ধা নিবেদন কৰে আহোম সেনা অসমে।
শিৱসাগৰৰ ঐতিহাসিক তলাতল ঘৰৰ প্ৰঙ্গণত আজি আহোম সেনাৰ উদ্যোগত এই মহান বীৰ সকলক স্মৰণ কৰি আহোম সম্প্ৰদায়ৰ ৰীতি নীতিৰে মৃতক সকলৰ আত্মাৰ সদগতিৰ বাবে পূজা অৰ্চনা কৰে।
লগতে দাবী কৰে আলাবৈ ৰণৰ বিষয়ে অধ্যায়ণ কৰাৰ। যাতে নতুন প্ৰজন্মই এই ৰণৰ বিষয়ে জানিব পাৰে। লগতে সেই স্থানত আলাবৈ ৰণৰ এখন উদ্যান বনাই উক্ত স্থানক অসমৰ এখন পৰ্যটনস্থলী হিচাপে গঢ় দিবলৈ অসম চৰকাৰ তথা অসমৰ মুখ্যমন্ত্ৰীলৈ আহ্বন জনায় আহোম সেনাই।
