কৃত্ৰিম বুদ্ধিমত্তা (AI) আমাৰ পেছাদাৰী আৰু ব্যক্তিগত জীৱনত এক অপৰিহাৰ্য অংশ হৈ পৰিছে। ক্ষীপ্ৰতাৰে আৰু নিখুত ভাবে কাৰ্যক্ষম হোৱা বাবে কৃত্ৰিম বুদ্ধিমত্তাৰ ওপৰত মানুহ অধিক নিৰ্ভৰ্শীল হৈ পৰিছে। যি মানুহৰ নিজস্ব কাৰ্য ক্ষমতা হ্ৰাস কৰাৰ লগতে চিন্তা শক্তিত প্ৰভাৱ পেলাইছে।
পৰিচালনা পৰামৰ্শদাতা অংশুমান দত্তৰ মতে, “যদিও AI-এ কিছুমান বিষয়ত দক্ষতাৰে কাম কৰিব পাৰে তথাপিও স্বাস্থ্য বা আইনী বিষয়ত AIৰ ওপৰত সম্পূৰ্ণ নিৰ্ভশীল হোৱাটো বিপদজনক হ’ব পাৰে।”
আমাৰ সবাতোকৈ ডাঙৰ ভুল হ’ল AIৰ ওপৰত অত্যধিক নিৰ্ভৰ কৰাৰ প্ৰৱণতা। এই সফল প্ৰযুক্তি এসময়ত আপনাৰ বিফলতাৰো কাৰণ হ’ব পাৰে। কল্পনা কৰক, যদি AIৰ-এ কাল্পনিক তথ্যৰ ওপৰত ভিত্তি কৰি বিত্তীয় পৰামৰ্শ দিয়ে, তাৰ পৰিণতি কি হ’ব পাৰে?
সম্প্ৰতি আমি চিকিৎসা সম্পৰ্কিত বহু পৰামৰ্শ গ্ৰহণ কৰোঁ বা বহু জন AIৰ পৰামৰ্শৰ ওপৰত নিৰ্ভশীল হোৱা দেখা যায়। এতিয়া প্ৰশ্ন হয়, চিকিৎসকৰ পৰামৰ্শ অবিহনে AIৰ জৰিয়তে চিকিৎসাৰ পৰামৰ্শ লোৱাটো কিমান যুক্তিসংগত? এইবোৰ বিশ্বাসযোগ্য যেন লাগিলেও, ই জীৱনলৈ স্বাস্থ্যজনিত জটিলতা আনিব পাৰে। AI কোনো চিকিৎসক নহয়। ই ৰাজহুৱা তথ্যৰ ওপৰত প্ৰশিক্ষিত এটা মেচিন মাত্ৰ। ই ব্যক্তিগত চিকিৎসা ইতিহাস বা ঔষধৰ পাৰস্পৰিক ক্ৰিয়া ব্যাখ্যা কৰিব নোৱাৰে। তথাপিও, ব্যৱহাৰকাৰীসকলে প্ৰায়ে লক্ষণৰ ব্যাখ্যা বা চিকিৎসাৰ পৰামৰ্শৰ বাবে AIৰ কাষ চাপে। এইটো এক বিপদজনক পথ। কেৱল যোগ্য স্বাস্থ্যসেৱা প্ৰদানকাৰীয়েহে সঠিক চিকিৎসা পৰামৰ্শ দিব পাৰে। যিটো AIৰ উত্তৰ তলত সতৰ্কবাণীও প্ৰদান কৰে যে বিশেষজ্ঞৰ পৰামৰ্শ লৈহে কোনো সিদ্ধান্ত গ্ৰহণ কৰে।
গৱেষণাই দেখুৱাইছে যে AIৰ ওপৰত অত্যধিক নিৰ্ভৰশীলতাই মানুহৰ জ্ঞানশক্তিক ক্ষতিগ্ৰস্ত কৰিব পাৰে। এম আইৰ এক অধ্যয়নত দেখা গৈছে যে শৈক্ষিক কামৰ AIৰ ব্যৱহাৰ কৰা ছাত্ৰ-ছাত্ৰীৰ মগজুৰ স্মৃতিশক্তি দুৰ্বল হোৱাৰ লগতে আৰু চিন্তা শক্তিও দুৰ্বল হয়। ফল স্বৰূপে সিদ্ধান্ত গ্ৰহণত সমস্যাৰ সৃষ্টি হয়, আাত্মবিশ্বাস হেৰুৱাৰ লগতে চিন্তা কৰিব ক্ষমতাও হেৰুৱাৰ উপক্ৰম হৈছে। সেয়ে AIক নিজৰ অধীন হবলৈ দিয়া উচিত নহয়। AIক এনে দৰে ব্যৱহাৰ কৰা উচিত যাতে ই আপোনাৰ অস্তিত্বলৈ সংকত অনিব নোৱাৰে। গতিকে AIক আপোনাৰ শক্তি হিচাপে গ্ৰহণ কৰক আপোনাৰ দুৰ্বলতা হ’বলৈ নিদিব।
