চৰকাৰৰ শিক্ষা বিভাগৰ গাফলতি তথা অমনোযোগিতাৰ বাবে অল ইণ্ডিয়া কাউন্সিল ফৰ এডুকেশ্যনে গোলাঘাট অভিযান্ত্ৰিক মহাবিদ্যালয়ৰ স্বীকৃতি বাতিল কৰিছে। উল্লেখযোগ্য যে মহাবিদ্যালয়খন যোৱা ৫ ফেব্ৰুৱাৰীত মুখ্য মন্ত্ৰী সৰ্বানন্দ সোণোৱালে উদ্বোধন কৰিছিল।
প্ৰাপ্ত তথ্য মতে এ আই চি টি ই (AICTE)য়ে মহাবিদ্যালয় কৰ্তৃপক্ষক ২৮ ফেব্ৰুৱাৰীত কলকাতালৈ মাতি নি তথ্যপাতি লৈছিল। আৰু ৪ মাৰ্চত এটা বিশেষজ্ঞৰ দল আহি মহাবিদ্যালয়খনত উপস্থিত হৈ পৰিস্থিতিৰ বুজ লৈছিল। ইয়াৰ পিছতে মঙলবাৰে এ আই চি টি ইয়ে এক বিভাগীয় পত্ৰ যোগে মহাবিদ্যালয়খনৰ স্বীকৃতি বাতিলৰ কথা জনায়।
মহাবিদ্যালয়খনত পৰ্যাপ্ত শিক্ষক-শিক্ষয়িত্ৰী, স্থায়ী অধ্যক্ষ তথা সা-সুবিধা নথকাৰ বাবেই এ আই চি টি ইয়ে মহাবিদ্যালয়খনৰ স্বীকৃতি বাতিল কৰিছে বুলি জানিব পৰা গৈছে।
ইফালে এই খবৰে অনিশ্চয়তাত ভোগাইছে মহাবিদ্যালয়খনৰ ছাত্ৰ-ছাত্ৰী সকলক। মহাবিদ্যালয়খন যদিও মুখ্য মন্ত্ৰীয়ে ফেব্ৰুৱাৰীত উদ্বোধন কৰিছিল। কিন্তু মহাবিদ্যালয়খনত ২০১৮ চনৰ আগষ্ট মাহৰ পৰাই ক্লাছ আৰম্ভ হৈছিল। গতিকে এতিয়া উক্ত ছাত্ৰ-ছাত্ৰী সকলৰ শৈক্ষিক জীৱন অন্ধকাৰৰ দিশলৈ গতি কৰাত তেওঁলোক চিন্তিত হৈ পৰিছে।
