দেশজুৰি জোকাৰণিৰ সৃষ্টি কৰা বলীউডৰ অভিনেতা সুশান্ত সিং ৰাজপুতৰ মৃত্যু ৰহস্যকলৈ আজিও মানুহৰ মনত সন্দেহৰ উদ্ৰেক ঘটি আহিছে।
সুশান্তৰ পৰিয়ালৰ লগতে আন বহু জনে সুশান্তই আত্মহত্যা কৰাৰ সলনি তেওঁক হত্যাহে কৰা হৈছিল বুলি কৈ আহিছে।
এই ক্ষেত্ৰত বহুতে সুশান্তৰ প্ৰেমিকা ৰিয়া চক্ৰৱৰ্তীলৈ সন্দেহৰ আঙুলি টোৱাইছে।
এনে সময়তে আজি এইমছৰ ফৰেনচিক প্ৰতিবেদনত এই কথা স্পষ্ট ভাবে উল্লেখ কৰা হৈছে যে সুশান্ত সিং ৰাজপুতক কোনেও হত্যা কৰা নাছিল।
ইয়াৰ বিপৰীতে তেওঁ আত্মহত্যাহে কৰিছিল। ৩৪ বছৰীয়া অভিনেতা জনৰ মৰণোত্তৰ পৰীক্ষাৰ প্ৰতিবেদনৰ ভিত্তিত প্ৰথমেই মুম্বাই আৰক্ষীয়ে এই বুলি প্ৰকাশ কৰিছিল যে সুশান্তই আত্মহত্যাহে কৰিছিল।
কিন্তু বহুতেই বিষয়টো সহজ ভাবে ল’ব নোৱাৰাৰ বাবেই এইমছৰ ফৰেনচিক বিভাগক সুশান্তৰ মৃত্যুৰ কাৰণ উদ্ঘাটন কৰাৰ দায়িত্ব অৰ্পন কৰা হৈছিল।
বিভিন্ন তথ্য প্ৰমাণৰ ভিত্তিত আজি এইমছৰ ফৰেনচিক বিভাগে প্ৰকাশ কৰে যে অভিনেতা সুশান্ত সিং ৰাজপুতক হত্যা কৰা হোৱা নাছিল, তেওঁ আত্মহত্যাহে কৰিছিল।
সুশান্তৰ আত্মহত্যাৰ ঘটনাৰ তদন্ত কৰিবলৈ গৈ মুম্বাই আৰক্ষীৰ লগতে নাৰকটিকছ বিভাগে বলীউডৰ ড্ৰাগছৰ সাম্ৰাজ্য খনৰ তথ্যহেউদ্ঘাটন কৰিবলৈ সক্ষম হৈছে।
এই সন্দৰ্ভত ইতিমধ্যে কেইবাজনো লোকক গ্ৰেপ্তাৰো কৰা হৈছে।