শেহতীয়াকৈ, আহমেদাবাদত সংঘটিত বিমান দুৰ্ঘটনাত প্ৰাণ হেৰুওৱা এয়াৰ ইণ্ডিয়াৰ যাত্ৰীসকলৰ পৰিয়ালে, এয়াৰ ইণ্ডিয়াই মৃতকৰ পৰিয়ালক ক্ষতিপূৰণ প্ৰদানত জালিয়াতিৰ অভিযোগ উত্থাপন কৰিছে।
প্ৰাপ্ততথ্য অনুসৰি এয়াৰ ইণ্ডিয়াই মৃতকৰ ওপৰত বিত্তীয় নিৰ্ভৰশীলতাৰ সবিশেষ প্ৰদান কৰিবলৈ পৰিয়ালক বাধ্য কৰাইছে বুলি অভিযোগ উত্থাপন কৰিছে মৃতকৰ পৰিয়ালে। উল্লেখ্য যে নিৰ্ভৰশীলতাৰ সৈতে জড়িত নথি-পত্ৰত স্বাক্ষৰ কৰিবলৈ বাধ্য কৰাইছে যাতে ক্ষতিপূৰণৰ পৰিমাণ হ্ৰাস কৰিব পাৰে।
বিমান সংস্থাটোৱে মৃতকৰ আত্মীয়ৰ পৰিয়ালৰ অভিযোগক ভিত্তিহীন বুলি উত্থাপন কৰি কয় যে তেওঁলোকে কেৱল ক্ষতিপূৰণৰ পদ্ধতি অনুসৰণ কৰিছে তাৰোপৰি এইটো এটা আনুষ্ঠানিক প্ৰক্ৰিয়া, ইয়াক মানি চলাটো প্ৰয়োজনীয়। এয়াৰ ইণ্ডিয়াই এই পৰিয়ালসমূহক থকাৰ ব্যৱস্থাৰ লগতে অন্যান্য ব্যৱস্থাৰ জড়িয়তে সহায় কৰি আহিছে বুলই উল্লেখ কৰে।
প্ৰাপ্ত তথ্য অনুসৰি, ইতিমধ্যে ৪৭টা পৰিয়ালক ধন পৰিশোধ কৰা হৈছে আৰু ৫৫টা পৰিয়ালৰ বাবে ধন পৰিশোধ প্ৰক্ৰিয়া চলি আছে। ব্ৰিটেইনৰ এটা আইনী প্ৰতিষ্ঠানে ৪০টাতকৈও অধিক ভুক্তভোগী পৰিয়ালক এয়াৰ ইণ্ডিয়াৰ বিৰুদ্ধে এই অভিযোগ উত্থাপন কৰিছে যে বিমান সংস্থাসমূহে প্ৰশ্নাৱলীৰ জৰিয়তে পৰিয়ালসমূহক বিত্তীয় তথ্য দিবলৈ হেঁচা প্ৰয়োগ কৰিছে।
ইফালে অধিবক্তাসকলেও কয় যে আইনী পৰামৰ্শ অবিহনে পৰিয়ালসমূহে ফৰ্ম পূৰণ কৰিবলৈ বাধ্য হৈছিল, যিয়ে মৃতকৰ ওপৰত আৰ্থিকভাৱে নিৰ্ভৰশীল নেকি বুলি প্ৰশ্ন কৰিছিল।
উল্লেখ্য যে ২০২৫ চনৰ ১২ জুনত আহমেদাবাদত এয়াৰ ইণ্ডিয়াৰ এ আই ১৭১ বিমান দুৰ্ঘটনাগ্ৰস্ত হৈ এজন যাত্ৰীৰ বাহিৰে ২৪১ জন লোকৰ মৃত্যু হৈছিল। এই দুৰ্ঘটনাটোৰ পিছতেই ইয়াৰ সৈতে জড়িত ন ন তথ্য পোহৰলৈ আহিছে।
এই ঘটনাত ক্ষতিগ্ৰস্ত প্ৰতিটো পৰিয়ালক টাটা গ্ৰুপে এক কোটি টকা ক্ষতিপূৰণ দিয়াৰ ইয়াৰ উপৰিও শিক্ষা আৰু স্বাস্থ্যৰ বাবে ৫০০ কোটি টকাৰ ট্ৰাষ্ট স্থাপন কৰাৰ কথাও ঘোষণা কৰিছিল।
