পুনৰ এক দুৰ্ঘটনাৰ সন্মুখীন হৈছে এয়াৰ ইণ্ডিয়াৰ এখন বিমান। বৃহস্পতিবাৰে বেংগালুৰু বিমানবন্দৰত অৱতৰণ কৰাৰ সময়ত বিমানখনৰ পিছফালৰ অংশ ৰাণৱেত ঘঁহনি খায়। এই ঘটনাৰ পিছতে যাত্ৰীসকলৰ মাজত তীব্ৰ আতংকৰ সৃষ্টি হয়। অৱশ্যে এই দুৰ্ঘটনাত কোনো যাত্ৰীৰে ক্ষয় ক্ষতি হোৱা নাই আৰু সকলো সুৰক্ষিত বুলি জানিব পৰা গৈছে।
জানিব পৰা মতে, এয়াৰ ইণ্ডিয়াৰ এআই-২৬৫১ নম্বৰৰ এই বিমানখনত মুঠ ১৭৯ জন যাত্ৰী আছিল। নিৰ্ধাৰিত সময় অনুসৰি বিমানখনে দিল্লীৰ পৰা গৈ বেংগালুৰু বিমানবন্দৰত উপস্থিত হৈছিল। কিন্তু অৱতৰণ কৰাৰ সময়তেই এই ভয়ংকৰ ঘটনা ঘটে। বিমানখনৰ পিছফালৰ অংশটো ৰাণৱেত ঘঁহনি খোৱাৰ লগে লগে সমগ্ৰ বিমানখনত প্ৰচণ্ড জোকাৰণিৰ সৃষ্টি হয়। ইয়াৰ ফলত যাত্ৰীসকল ভয়ত কঁপি উঠে আৰু বিমানৰ ভিতৰত এক হুলস্থুলীয়া পৰিৱেশৰ সৃষ্টি হয়। অৱশ্যে পাইলটগৰাকীয়ে অতি দক্ষতাৰে বিমানখন নিৰাপদভাৱে অৱতৰণ কৰিবলৈ সক্ষম হয়। তাৰ পিছত যাত্ৰীসকলক ততাতৈয়াকৈ সুৰক্ষিত স্থানলৈ উলিয়াই অনা হয়। সূত্ৰৰ পৰা জানিব পৰা মতে, এই দুৰ্ঘটনাৰ ফলত বিমানখনৰ যথেষ্ট ক্ষতি হৈছে।
কিন্তু এই ভয়ংকৰ দুৰ্ঘটনাটো কিয় সংঘটিত হ’ল তাক লৈয়ো প্ৰশ্ন উত্থাপন হৈছে। প্ৰাপ্ত তথ্য অনুসৰি, যি সময়ত বিমানখনে অৱতৰণৰ বাবে ৰাণৱেত নামিছিল, ঠিক সেই সময়তেই বিমানবন্দৰৰ পৰা আন এখন বিমান উৰা মাৰিছিল। সেই আনখন বিমানৰ ফলত সৃষ্টি হোৱা টাৰ্বুলেন্স বা বায়ুমণ্ডলীয় জোকাৰণিৰ বাবেই এই অঘটন ঘটে। ইতিমধ্যে সমগ্ৰ ঘটনাটোৰ বাবে এয়াৰ ইণ্ডিয়া কৰ্তৃপক্ষই যাত্ৰীসকলৰ ওচৰত আন্তৰিকতাৰে ক্ষমা বিচাৰিছে।
