ইটানগৰৰ ৰাজীৱ গান্ধী বিশ্ববিদ্যালয়ৰ অৰুণাচলৰ জনজাতি অধ্যয়নৰ প্ৰতিষ্ঠানে (AITS) উত্তৰ পূৰ্বাঞ্চলৰ সমসাময়িক সমস্যাৱলীৰ ওপৰত নিৰ্মিত চলচ্চিত্ৰৰ ওপৰত এক চলচ্চিত্ৰ মহোৎসৱৰ আয়োজন কৰিব।
এই চলচ্চিত্ৰ মহোৎসৱ ২০১৯ৰ মাৰ্চৰ ৯-১১ তাৰিখলৈকে অনুষ্ঠিত কৰা হ’ব। এই চলচ্চিত্ৰ মহোৎসৱৰ শিৰোনাম ‘বৰ্ডাৰলেণ্ড নেৰেটীভ’ ৰখা হৈছে আৰু উত্তৰ পূৰ্বাঞ্চলৰ ৮খন ৰাজ্যৰ চলচ্চিত্ৰ নিৰ্মাতাসকলৰ বাবে এখন মঞ্চ হ’ব। ইয়াতে সমসাময়িক দৃষ্টিকোণৰ পৰা উত্তৰ পূৰ্বাঞ্চলৰ ঐতিহ্য, চিনাকী আৰু অঞ্চলটোত হোৱা পৰিৱৰ্তনৰ ওপৰত গৱেষণা কৰাৰ বাবে চলচ্চিত্ৰ নিৰ্মাতাসকলক সুযোগ দিব।
বিশ্ববিদ্যালয়খনৰ উপাচাৰ্য অধ্যাপক ছকেট কুশৱালাৰ তত্বাৱদানত এই চলচ্চিত্ৰ মহোৎসৱৰ আয়োজন কৰা হৈছে। সহযোগিতা আগবঢ়াইছে চাৰুকলা আৰু সংগীত, গণসংযোগ আৰু নৃতত্ব বিভাগৰ লগতে সাংস্কৃতিক গৱেষণা আৰু নথিভুক্তকৰণ কেন্দ্ৰই।
বিভাগটোৱে জনাইছে যে এই মহোৎসৱে দৃশ্য সংস্কৃতিক উদগনি দিব আৰু উঠি অহা প্ৰজন্মক দৃশ্যমান পঠনৰ বাবে উৎসাহিত কৰিব।
এই মহোৎসৱৰ প্ৰথম সংস্কৰণৰ ‘হোৱাট উই উইভ’ নামৰ অপ্ৰতিদ্বন্দ্বিতামূলক শাখাত প্ৰতিখন ৰাজ্যৰেই দুগৰাকীকৈ চলচ্চিত্ৰ নিৰ্মাতাক তেওঁলোকৰ চলচ্চিত্ৰ প্ৰদৰ্শনৰ বাবে আহ্বান জনোৱা হ’ব। চলচ্চিত্ৰ প্ৰদৰ্শনৰ পাছত চলচ্চিত্ৰ নিৰ্মাতাসকলৰ সৈতে এটা অন্তৰংগ মত বিনিময়ৰো ব্যৱস্থা কৰা হ’ব।
প্ৰতিযোগিতাতামূলক শাখাৰ বিষয় হৈছে ‘ভেনিশ্বিং ৰূটছ : কলা, সংস্কৃতি আৰু লোকসংস্কৃতি। ২০১৬ৰ ১ জানুৱাৰিৰ পাছত নিৰ্মিত ফিকশ্যন আৰু ননফিকশ্যন দুয়োবিধ ফৰ্মেটৰ চলচ্চিত্ৰ প্ৰতিযোগিতাৰ বাবে যোগ্য বিৱেচিত হ’ব। প্ৰতিযোগিতাৰ প্ৰাইজমানি হৈছে ১ লাখ টকা, এটা ট্ৰফী আৰু এখন অভিনন্দনপত্ৰ। চলচ্চিত্ৰ মহোৎসৱত পেনেল আলোচনা, বিশিষ্ট ব্যক্তিৰ ভাষণ আৰু দৃশ্য নৃতত্বৰ ওপৰত কৰ্মশালাৰ আয়োজন কৰা হ’ব।