সোমবাৰে কিশোৰ ভাৰতী ষ্টেডিয়ামত কলকাতাৰ প্ৰসিদ্ধ ফুটবল ক্লাব মহামেদান স্প’ৰ্টিং ক্লাবে নতুন ইতিহাস গঢ়িলে। প্ৰথমবাৰৰ বাবে দেশৰ শীৰ্ষ লীগ আই এছ এলত খেলিলে ক্লাবটোৱে। আই লীগত চেম্পিয়ন হোৱাৰ যোগ্যতাৰে এই উত্তৰণ ঘটিল। বিপক্ষ হৈছে শেহতীয়াকৈ ডুৰাণ্ড বিজয়ী নৰ্থইষ্ট ইউনাইটেড।
অৱশ্যে ছন্দহীন ফুটবলৰ বাবে মহামেদানৰ আৰম্ভণিটো ভাল নহ’ল। ডুৰাণ্ড কাপ বিজয়ী নৰ্থইষ্ট ইউনাইটেডৰ দুৰ্দান্ত খেলৰ আগত প্ৰশিক্ষক আন্দ্ৰে চেৰ্নিশ্বভৰ দলটো ১-০ গ’লত পৰাস্ত হয়।
কিশোৰ ভাৰতী ষ্টেডিয়ামত নতুন যাত্ৰা আৰম্ভ হোৱাৰ পূৰ্বে সংবাদমেলত প্ৰশিক্ষক চেৰ্নিশ্বভে কৈছিল যে আমি আই এছ এলৰ অভিজ্ঞতা সম্পূৰ্ণৰূপে গ্ৰহণ কৰিব বিচাৰো। যদিও সেই হেঁপাহ মহামেদন ফুটবলাৰসকলৰ মাজত দেখা নগ’ল।
বিপৰীতে মেচখনৰ সময় বাঢ়ি যোৱাৰ লগে লগে নৰ্থইষ্ট ইউনাইটেডৰ খেলৰ উন্নতি হৈছে৷ অৱশ্যে প্ৰথমাৰ্ধত দুয়োটা দলে অনুৰাগীসকলক নিৰাশ কৰে। ছন্দহীন ফুটবল চলি থাকে। বল দখলৰ ক্ষেত্ৰত আগবাঢ়িছিল যদিও, মহামেদানৰ বেছিভাগ আক্ৰমণেই গ’ল বক্সত উপনীত হোৱালৈ শক্তিহীন হৈ পৰিছিল।
নৰ্থ-ইষ্টৰ আক্ৰমণাত্মক খেলুৱৈসকলে তুলনামূলকভাৱে ভাল আৰম্ভণি কৰে। অৱশ্যে তেওঁলোকেও এটা বা দুটাতকৈ অধিক গ’ল কৰিব পৰা শ্বৰ্ট ল’ব পৰা নাছিল।
দ্বিতীয়াৰ্ধত নৰ্থইষ্ট ইউনাইটেডে নিজকে একত্ৰিত কৰিলে! মহামেদানৰ এলেক্সে আৰম্ভণিতে গ’লত এটা শ্বট মাৰিছিল যদিও সেয়া কামত নাহিল৷ ইয়াৰ পিছত ডুৰাণ্ড বিজয়ী দলটোৱে ক্ৰমান্বয়ে মিডফিল্ডৰ দখল ল’লে। নৰ্থইষ্টৰ দুয়োটা দিশেই সক্ৰিয় হৈ পৰে।
৬০ মিনিটৰ পাছতে মহামেদানৰ ৰক্ষণৰ ওপৰত আক্ৰমণৰ জোৱাৰ উঠে। ডিফেণ্ডাৰ আৰু গ’লৰক্ষকৰ তীব্ৰ প্ৰচেষ্টাৰ বাবে স্ক’ৰব’ৰ্ডৰ কোনো পৰিৱৰ্তন নহ’ল। খেলখনৰ ৭০ মিনিটত মহামেদানৰ বিকাশ জোৰালে নৰ্থ-ইষ্টৰ গ’লত এটা তীব্ৰ শ্বট লয়। বলটো বাওঁফালৰ পোষ্টত স্পৰ্শ কৰি বাহিৰলৈ ওলাই যায়।
আনহাতে নৰ্থইষ্ট ইউনাইটেডৰ উপৰ্যুপৰি আক্রমণত মহামেদানৰ গ’লৰক্ষক ছেত্রীৰ অৱস্থা শোচনীয় কৰি তোলে৷ শেষত জন আব্ৰাহামৰ দলটোৱে অবিৰত আক্ৰমণৰ ফল লাভ কৰে। অতিৰিক্ত সময়ৰ ৯৪ মিনিটৰ শেষত আলাউদ্দিন আজৰাইৰ গ’ল অভিমুখী শ্বটত পৰাস্ত হয় মহামেদানৰ গ’লৰক্ষক। নৰ্থইষ্ট ইউনাইটেড ১-০ ব্যৱধানত জয়ী হৈ আইএছএলত নিজৰ যাত্ৰা আৰম্ভ কৰে।
